Read Dikateny Iombonana Eto Madagasikara Rômanina 5 Bible Online

Rômanina 5 - Dikateny Iombonana Eto Madagasikara bible

Rômanina 5

¹Noho ny finoana àry dia tonga olo-marina eo imason’Andriamanitra isika sady efa mihavana amin’Andriamanitra[27] amin’ny alalan’i Jesoa Kristy Tompontsika.

²Amin’ny alalan’i Jesoa ihany koa, rehefa mino isika, no ahazoantsika manatona ilay fahasoavana efa misy antsika ankehitriny; ary ny ireharehantsika dia ny fanantenana[28] hanana anjara amin’ny voninahitr’Andriamanitra.

³Tsy izany ihany, fa ireharehantsika[29] koa ny fahoriana mahazo antsika: satria fantatsika fa ny fahoriana mahatonga faharetana;

⁴ny faharetana mahatonga toetra voasedra[30]; ny toetra voasedra mahatonga fanantenana;

⁵ary ny fanantenana tsy mba manodoka, fa efa voarotsaka ao am-pontsika ny fitiavan’Andriamanitra, tamin’ny alalan’ny Fanahy Masina Izay nomena antsika.

⁶Mbola tsy nanan-kery isika no tonga ny fotoanandro voatendrin’Andriamanitra, ka maty hamonjy ny ratsy fanahy i Kristy.

⁷Saika tsy misy aza manaiky ho faty hamonjy olo-marina; ary angamba mety hisy ihany hanana herim-po ho faty hamonjy olona tsara fanahy.

⁸Fa i Kristy kosa maty hamonjy antsika, fony isika mbola mpanota: nahariharin’Andriamanitra tamin’izany ny fitiavany antsika.

⁹Koa, amin’izao isika efa tonga olo-marina eo imason’Andriamanitra noho ny ra nafoin’i Kristy izao, dia vao mainka hovonjena amin’ny alalan’i Kristy tsy hiharan’ny fahatezeran’Andriamanitra.

¹⁰Eny, fony fahavalon’Andriamanitra aza isika, dia nampihavanina taminy noho ny fahafatesan’ny Zanany; vao mainka izao isika efa nampihavanina tamin’Andriamanitra izao, dia tena hovonjena tokoa noho ny fahaveloman’ny Zanany.

¹¹Tsy izany ihany, fa mirehareha ao amin’Andriamanitra koa isika amin’ny alalan’i Jesoa Kristy Tompontsika, Ilay nahazoantsika izao fihavanantsika amin’Andriamanitra izao.

¹²Noho ny nataon’ny olona anankiray, dia i Adama, no nidiran’ny fahotana teo amin’izao tontolo izao, sady nidiran’ny fahafatesana koa noho ny fahotana; ary dia nahatratra ny olona rehetra ny fahafatesana, satria samy nanota izy rehetra[31].

¹³Talohan’ny lalànan’i Mosesy dia efa nisy fahotana teo amin’izao tontolo izao; nefa ny fahotana dia tsy mbola natao hoe fandikana, raha tsy mbola nisy ny lalàna.

¹⁴Na izany aza anefa, hatramin’i Adama ka hatramin’i Mosesy dia efa nanjaka ny fahafatesana, na dia tamin’ireo tsy nanota toraka ny nataon’i Adama izay nandika ny didin’Andriamanitra aza. Ary i Adama dia tandindon’Ilay ho avy.

¹⁵Kanefa tsy azo ampitahaina ny hadisoana vitan’i Adama sy ny fanomezana atolotr’Andriamanitra maimaimpoana. Niharan’ny fahafatesana ny besinimaro, noho ny hadisoan’ny olona anankiray, dia i Adama; nitosaka be nihoatra lavitra noho izany kosa ilay fahasoavana avy amin’Andriamanitra, ilay fahasoavana nomena maimaimpoana ho an’ny besinimaro tao tamin’ny olona anankiray, dia i Jesoa Kristy.

¹⁶Ary tsy tahaka ny vokatry ny fahotana vitan’i Adama ny vokatry ny fanomezana atolotr’Andriamanitra: ny hadisoan’ny olona anankiray notsaraina dia nahatonga fanamelohana; fa ny fanomezana atolotr’Andriamanitra maimaimpoana kosa dia nahatonga ny hadisoana maro havela tanteraka.

¹⁷Eny, tamin’ny alalan’ny olona anankiray ary noho ny hadisoan’io olona iray io no nanjakan’ny fahafatesana; fa ireo mandray ny fahasoavana nitosaka be avy amin’Andriamanitra ary koa ny fahamarinana nomeny maimaimpoana dia vao mainka velomin’Andriamanitra sy ampanjakainy tamin’ny alalan’ny olona anankiray, dia i Jesoa Kristy.

¹⁸Koa ny hadisoana vitan’olona iray, dia i Adama, no nahavoaheloka ny olona rehetra; toy izany koa ny asa marina vitan’olona iray, dia i Jesoa Kristy, no nahatonga ny olona rehetra hovotsorana tanteraka sy hahazo fiainana.

¹⁹Noho ny olona anankiray tsy nanaiky an’Andriamanitra, dia nanjary mpanota ny besinimaro; toy izany koa, noho ny olona anankiray nanaiky an’Andriamanitra, dia hanjary olo-marina eo imason’Andriamanitra ny besinimaro.

²⁰Ny lalàna no tonga, dia ny mba hampitombo be ny hadisoana; nefa koa teo amin’izay nahabe ny fahotana no nihoa-pampana ny fahasoavana.

²¹Koa tahaka ny nanjakan’ny fahotana ka nahafaty antsika no hanjakan’ny fahasoavan’Andriamanitra hahatonga antsika ho marina ka hahavelona antsika mandrakizay amin’ny alalan’i Jesoa Kristy Tompontsika.