Read Dikateny Iombonana Eto Madagasikara 1 Kôrintianina 1 Bible Online

1 Kôrintianina 1 - Dikateny Iombonana Eto Madagasikara bible

1 Kôrintianina 1

¹Avy amiko Paoly ity taratasy ity, dia izaho voaantso ho apôstôlin’i Kristy Jesoa noho ny sitrapon’Andriamanitra. Mamangy anareo isan’ny Fiangonan’Andriamanitra atỳ Kôrinto[4] aho, ary mamangy anareo koa i Sôstena[5] havantsika. Voatokana ho an’Andriamanitra sy voaantso ho anisan’ny vahoakany ianareo satria efa tafaray amin’i Kristy Jesoa. Eny, anisan’ny vahoakan’Andriamanitra ianareo miaraka amin’izay rehetra miantso ny anaran’i Jesoa Kristy Tompontsika, na aiza na aiza, fa sady Tompon’izy rehetra i Kristy no Tompontsika koa.

³Ho aminareo anie ny fahasoavana sy ny fiadanana avy amin’Andriamanitra Raintsika sy i Jesoa Kristy Tompo!

⁴Velom-pisaorana mandrakariva an’Andriamanitro[6] ny aminareo aho noho ny fahasoavana efa nomeny anareo izay tafaray amin’i Kristy Jesoa.

⁵Eny, noho ianareo tafaray amin’i Kristy Jesoa no mampanankarena anareo amin’ny fanomezana rehetra, dia ny teny sy ny fahalalana rehetra.

⁶Izay nijoroana ho vavolombelona momba an’i Kristy dia efa tafaorina mafy ao aminareo,

⁷ka tsy misy fanomezam-pahasoavana tsy anananareo eo am-piandrasana ny hisehoan’i Jesoa Kristy Tompontsika.

⁸Andriamanitra koa no hampiorina anareo hatramin’ny farany, ka tsy hanananareo tsiny amin’ny andro hiavian’i Jesoa Kristy Tompontsika.

⁹Mitana ny toky nomeny Andriamanitra[7] Izay niantso anareo hiombona amin’ny Zanany, dia i Jesoa Kristy Tompontsika.

¹⁰Ry havako, izao no iangaviako anareo amin’ny anaran’i Jesoa Kristy Tompontsika: mifanaraha ianareo rehetra, ary aza mifanao an-kolafiny; aoka hiray saina sy hevitra ianareo ka hivondrona tsara.

¹¹Nisy avy tamin’ny ankohonan’i Klôà manko efa nitatitra tamiko ny aminareo, fa hoe misy adiady eo aminareo.

¹²Izao no tiako holazaina: Samy miteny izay teneninareo ianareo, ka ny anankiray manao hoe: «Izaho an’i Paoly»; ary hoy kosa ny anankiray: «Izaho an’i Apôlao»; misy kosa manao hoe: «Izaho an’i Petera[8]»; ary hoy indray ny hafa: «Izaho an’i Kristy.»

¹³Heverinareo ve fa voazarazara i Kristy[9]? I Paoly ve no voahombo teo amin’ny hazofijaliana ho famonjena anareo? Sa tamin’ny anaran’i Paoly no nanaovana batisa anareo?

¹⁴Isaorako Andriamanitra fa tsy nisy nataoko batisa ianareo, afa-tsy i Krispo sy i Gaio[10].

¹⁵Ka tsy afaka milaza ianareo fa vita batisa tamin’ny anarako.

¹⁶(Hay koa moa nataoko batisa ny ankohonan’i Stefanasy; afa-tsy ireo, dia tsy misy hafa tsaroako ho nataoko batisa.)

¹⁷Izaho manko tsy nirahin’i Kristy hanao batisa fa hitory ny Vaovao Mahafaly; ary tsy tamin’ny fahendren’olombelona asehon’ny lahateny kanto no nitoriako mba tsy ho foana ny herin’i Kristy voahombo teo amin’ny hazofijaliana.

¹⁸Eny, ny fitoriana momba an’i Kristy voahombo teo amin’ny hazofijaliana dia fahadalana amin’izay ho very, fa herin’Andriamanitra kosa amintsika izay hovonjena.

¹⁹Fa izao no ambaran’ny Soratra Masina: «Hofoanako ny fahendren’ny hendry, holaviko ny fahaizan’ny mahay[11].»

²⁰Aiza ny olon-kendry? Aiza ny mpahay lalàna? Aiza ny mpiady hevitra avy amin’izao tontolo izao[12]? Tsy efa nahariharin’Andriamanitra ho fahadalana ve ny fahendren’izao tontolo izao?

²¹Fa ny fahendren’olombelona dia tsy nahalalan’izao tontolo izao an’Andriamanitra na dia teo amin’izay nihariharian’ny fahendren’Andriamanitra aza. Noho izany, dia sitrak’Andriamanitra ho tamin’ny alalan’ny hafatra miendrika fahadalana izay torînay no hamonjena ny olona izay mino.

²²Eny, mitaky famantarana avy amin’Andriamanitra ny Jiosy, ary ny Grika mitady fahendrena;

²³izahay kosa dia i Kristy voahombo teo amin’ny hazofijaliana no torînay: fanafintohinana ho an’ny Jiosy izany ary fahadalana ho an’ny hafa firenena.

²⁴Kanefa ho an’izay voaantson’Andriamanitra, na Jiosy na hafa firenena, dia i Kristy no herin’Andriamanitra sy fahendren’Andriamanitra;

²⁵satria izay toa fahadalàn’Andriamanitra dia hendry noho ny fahendren’olombelona, ary izay toa fahalemen’Andriamanitra dia mahery noho ny herin’olombelona.

²⁶Mba mijere tena ange ianareo izay voaantson’Andriamanitra, ry havako: araka ny maha olombelona, dia tsy misy firy ianareo no olon-kendry, tsy misy firy no mahery, tsy misy firy no avo razana.

²⁷Kanefa izay noheverin’izao tontolo izao ho adala no voafidin’Andriamanitra hampahamenatra ny hendry; izay noheverin’izao tontolo izao ho osa no voafidin’Andriamanitra hampahamenatra ny matanjaka;

²⁸ary izay noheverin’izao tontolo izao ho ambany sy fanaratsy, dia izay ataony tsy ho zavatra, no voafidin’Andriamanitra hahatsinontsinona izay ataon’izao tontolo izao ho zavatra,

²⁹mba tsy hisy mihitsy olombelona mahazo mirehareha eo anatrehan’Andriamanitra.

³⁰Fa nataon’Andriamanitra tafaray amin’i Kristy ianareo, ka dia i Kristy no fahendrena avy aminy ho antsika: i Kristy no andraisantsika ny fahamarinan’Andriamanitra ary anafahan’Andriamanitra antsika amin’ny fahotana.

³¹Noho izany, araka ny voalazan’ny Soratra Masina, «izay mirehareha, dia ny nataon’ny Tompo no aoka hireharehany[13].»