Read Dikateny Iombonana Eto Madagasikara 1 Kôrintianina 10 Bible Online

1 Kôrintianina 10 - Dikateny Iombonana Eto Madagasikara bible

1 Kôrintianina 10

¹Tiako hotsarovanareo, ry havako, izay nanjo ireo razantsika niara-dia tamin’i Mosesy. Tambanin’ny rahona izy rehetra; ary namakivaky ny Ranomasina Mena izy rehetra[48].

²Natao batisa tao amin’izany rahona sy ranomasina izany izy rehetra mba ho tafaray amin’i Mosesy.

³Nihinana sakafom-panahy iray ihany izy rehetra;

⁴ary nisotro fisotrom-panahy iray ihany izy rehetra; satria nisotro teo amin’ilay vatolampy ara-panahy tafara-dia taminy[49]: ka izany vatolampy izany dia i Kristy.

⁵Kanefa tsy sitrak’Andriamanitra ny ankabeazan-dry zareo ka maty ripaka tany an-taniefitra[50].

⁶Nitranga ireny zavatra ireny ho ohatra fananarana antsika, mba tsy hitsiriritantsika ny ratsy tahaka ny nahavoa an-dry zareo[51].

⁷Aoka ianareo tsy ho mpanompo sampy toy ny nataon’ny sasany tamin’ireny, araka ny voalazan’ny Soratra Masina hoe: «Nipetraka hihinana sy hisotro ny olona ary dia nitsangana hilalao[52].»

⁸Aoka isika tsy ho mpijangajanga toy ny nataon’ny sasany tamin’ireny, izay nahafatesana 23 000 indray andro monja[53].

⁹Aoka isika tsy haka fanahy ny Tompo toy ny nataon’ny sasany tamin’ireny, izay maty voakaikitry ny bibilava[54].

¹⁰Aoka ianareo tsy himonomonona toy ny nataon’ny sasany tamin’ireny, izay maty naripak’ilay anjely mpandringana[55].

¹¹Izany fahoriana rehetra izany dia nihatra tamin’izy ireny ho ohatra fananarana, ary natao an-tsoratra ho fampitandremana antsika izay mby eo an-katoky ny andro farany.

¹²Koa amin’izany, izay manao ny tenany ho mijoro tsara, dia aoka izy hitandrina sao lavo.

¹³Tsy nisy fakampanahy nianjady taminareo afa-tsy izay mpahazo ny olombelona. Fa mitana ny toky nomeny Andriamanitra ka tsy hamela anareo halaim-panahy mihoatra noho izay zakan’ny herinareo. Rehefa ianjadian’ny fakampanahy kosa ianareo, dia homeny hery hahazakanareo sy homeny lalana hahafahanareo.

¹⁴Noho izany, ry hava-malalako, andosiro ny fanompoan-tsampy.

¹⁵Olona manan-tsaina ianareo no itenenako, ka tsaraonareo izay lazaiko.

¹⁶Ny fisotro isaorantsika an’Andriamanitra, moa tsy mampiombona antsika amin’ny ran’i Kristy ve izany? Ary ny mofo izay ifanapahantsika, moa tsy mampiombona antsika amin’ny tenan’i Kristy ve izany[56]?

¹⁷Satria iray ihany ny mofo, dia tena iray ihany isika na dia maro aza, noho isika rehetra miombona anjara amin’ny mofo iray ihany.

¹⁸Jereo ny vahoaka Israely ara-tantara: Ireo mihinana amin’ny fanatitra atao sorona dia miombona amin’Andriamanitra Izay nanokanana ny alitara fisoronana[57].

¹⁹Inona àry no holazaiko? Moa tena zavatra ihany ve ny sampy na ny hena atao sorona ho an’ny sampy?

²⁰Tsia, fa ny zavatra atao sorona amin’ny sampy dia aterina ho an’ny demony fa tsy ho an’Andriamanitra[58]; ka tsy tiako ho mpiombona amin’ny demony ianareo.

²¹Tsy azonareo atao ny hisotro ny fisotro aroson’ny Tompo no sady hisotro ny fisotro aroson’ny demony; tsy azonareo atao ny hiombona anjara amin’ny sakafo aroson’ny Tompo no sady hiombona anjara amin’ny sakafo aroson’ny demony.

²²Sa te hampahasaro-piaro ny Tompo ve isika? Mihevitra ho mahery noho Izy Tompo ve isika[59]?

²³«Azo atao ny zavatra rehetra», hoy aho[60], kanefa tsy ary mahasoa avokoa. «Azo atao ny zavatra rehetra», hoy aho, kanefa tsy ary mampandroso amin’ny finoana avokoa.

²⁴Aza ny soa ho an’ny tena no katsahina fa ny ho an’ny namana.

²⁵Hano avokoa izay hena amidy eny an-tsena, fa aza velom-panontaniana akory noho ny fieritreretana;

²⁶satria «an’ny Tompo izao tany izao sy ny zavatra rehetra ao aminy[61]», hoy ny Soratra Masina.

²⁷Raha asain’ny tsy mpino hisakafo ianareo, ka manaiky hankany, dia hano izay arosony anareo fa aza velom-panontaniana akory noho ny fieritreretanareo.

²⁸Kanefa raha ilazan’olona ianareo hoe: «Hena natao fanatitra tany amin’ny sampy io», dia aza homana, noho ilay nilaza sy noho ny fieritreretana;

²⁹tsy ny fieritreretanareo tsy akory izany lazaiko izany, fa ny an’ilay niteny taminareo. «Fa nahoana kosa moa», hoy ny sasany, «no hofeperan’izay fieritreretan’olon-kafa ny fahafahako?

³⁰Raha isaorako an’Andriamanitra izany sakafo haniko izany, nahoana no dia hanomezan-tsiny ahy amin’ny hanina izay isaorako an’Andriamanitra?»

³¹Koa na mihinana na misotro ianareo, eny, na inona na inona ataonareo, dia ataovy ho voninahitr’Andriamanitra ny zavatra rehetra.

³²Aza manao izay hahasolafaka olona amin’ny ratsy, na Jiosy izy na hafa firenena na ny Fiangonan’Andriamanitra.

³³Mba manaova tahaka ahy, fa iezaho izay hahafaly ny olona rehetra amin’ny zavatra rehetra; ka tsy ny soa ho an’ny tenako no katsahiko, fa ny ho an’ny besinimaro, mba ho voavonjy izy rehetra.