Read Dikateny Iombonana Eto Madagasikara 1 Kôrintianina 12 Bible Online

1 Kôrintianina 12 - Dikateny Iombonana Eto Madagasikara bible

1 Kôrintianina 12

¹Izaho kosa, ry havako, ny amin’ireo fanomezan’ny Fanahy Masina: Irîko ny hahalalanareo ireo fanomezana ireo.

²Fantatrareo fa fony mbola tsy kristianina ianareo, dia voasintona tany amin’ny sampy moa araka izay nitaomana anareo.

³Koa ampahafantariko anareo fa tsy misy olona tarihin’ny Fanahin’Andriamanitra ka hiteny hanao hoe: «Voaozona i Jesoa!» Ary tsy misy koa afaka hilaza hoe: «I Jesoa no Tompo», raha tsy tarihin’ny Fanahy Masina.

⁴Voazarazara ho samy hafa ny fanomezam-pahasoavana, nefa ny Fanahy Masina dia iray ihany.

⁵Voazarazara ho samy hafa ny fanompoana, nefa ny Tompo dia iray ihany.

⁶Voazarazara ho samy hafa ny asa, nefa Andriamanitra dia iray ihany, loharano ipoiran’ny asa rehetra ao amin’ny olona rehetra.

⁷Samy omena fanomezana maneho ny Fanahy Masina ny olona tsirairay ho fanasoavana ny daholobe.

⁸Ny anankiray dia omen’ny Fanahy teny feno fahendrena; ary ny anankiray omen’izany Fanahy izany teny feno fahalalana.

⁹Ny anankiray omen’izany Fanahy izany finoana; ary ny anankiray omen’izany Fanahy izany fanomezam-pahasoavana hanasitrana marary.

¹⁰Ny anankiray, hanao asa mahagaga; ny anankiray, hilaza hafatra avy amin’Andriamanitra; ny anankiray, hahay manavaka ny Fanahy Masina sy ny fanahy manodoka; ny anankiray, hiteny amin’ny fiteny samy hafa tsy fantatra; ary ny anankiray, hanazava ny fiteny tsy fantatra.

¹¹Izany Fanahy iray izany ihany no loharano ipoiran’ireo fanomezana rehetra ireo, ka mizarazara azy, araka izay sitrapony, amin’ny olona tsirairay[66].

¹²Eny, iray ny tena kanefa misy zavatra maro ao aminy: dia toy izany koa i Kristy. Fa ireo zavatra rehetra anisan’ny tena ireo, na maro aza, dia tena iray ihany[67].

¹³Isika rehetra manko, na Jiosy na hafa firenena, na mpanompo na tsy mpanompo, dia iray ny Fanahy Masina nanaovana batisa antsika mba ho tena iray ihany isika; ary iray ny Fanahy Masina nampisotroana antsika rehetra.

¹⁴Eny, ny tena dia tsy zavatra karazana iray monja no mamorona azy fa maro.

¹⁵Raha ny tongotra hanao hoe: «Tsy tanana aho ka tsy mba isan’ny tena», dia tsy izay akory no tsy haha isan’ny tena azy.

¹⁶Raha ny sofina hanao hoe: «Tsy maso aho, ka tsy mba isan’ny tena», dia tsy izay akory no tsy haha isan’ny tena azy.

¹⁷Raha maso ny tena manontolo, ahoana no handrenesany? Ary raha sofina ny tena manontolo, ahoana no hanamboloany?

¹⁸Eny, efa voalahatr’Andriamanitra araka izay nitiavany azy avy eo amin’ny tena ireo zavatra anisan’ny tena ireo.

¹⁹Tsy ho nisy ny tena, raha karazana iray monja ny zavatra rehetra anisan’ny tena.

²⁰Eny, maro ny zavatra anisan’ny tena, kanefa ny tena dia iray ihany.

²¹Ny maso tsy afaka hilaza amin’ny tanana ila hoe: «Tsy ilaiko ianao!» Ary ny loha tsy afaka hilaza amin’ny tongotra roa hoe: «Tsy ilaiko ianareo!»

²²Fa vao mainka aza ireo heverina ho osa kokoa amin’ny zavatra anisan’ny tena no ilaina kokoa;

²³ireo zavatra anisan’ny tena heverintsika ho kely voninahitra kokoa no omentsika voninahitra kokoa; ary ny tsy misy haja amin’ny zavatra anisan’ny tenantsika no hajaintsika kokoa;

²⁴fa ny misy haja amin’ny zavatra anisan’ny tenantsika dia tsy mila izany. Fa tamin’ny nanamboaran’Andriamanitra ny tenantsika, dia izay kely voninahitra kokoa amin’ny zavatra anisan’ny tena no efa nataony homem-boninahitra kokoa;

²⁵hany ka tsy misy fisaratsarahana eo amin’ny tena, fa mifampiahy avokoa ny zavatra rehetra anisan’ny tena.

²⁶Koa raha mijaly ny zavatra anankiray anisan’ny tena, dia miara-mijaly avokoa ny zavatra rehetra anisan’ny tena; fa raha omem-boninahitra ny zavatra anankiray anisan’ny tena, dia miara-mifaly avokoa ny zavatra rehetra anisan’ny tena.

²⁷Ianareo rehetra no tenan’i Kristy; ianareo tsirairay kosa dia anisan’io tenany io araka ny anjaranareo avy.

²⁸Ary ao amin’ny Fiangonana dia izao no nandaharan’Andriamanitra ny olona: voalohany, ireo apôstôly; faharoa, ireo mpilaza hafatra avy amin’Andriamanitra; fahatelo, ireo mpampianatra; manaraka izany, ireo mandray fanomezam-pahasoavana hanao asa mahagaga, hanasitrana marary, hanampy olona, hitondra olona ary hiteny fiteny samy hafa tsy fantatra[68].

²⁹Izy rehetra tsy akory tsy hoe apôstôly avokoa na mpilaza hafatra avy amin’Andriamanitra, na mpampianatra. Izy rehetra tsy akory tsy hoe nandray fanomezam-pahasoavana hanao asa mahagaga avokoa,

³⁰na hiteny amin’ny fiteny tsy fantatra na hanazava izany.

³¹Kanefa ireo fanomezam-pahasoavana lehibe indrindra no irio fatratra. Ary dia ny lalana faran’izay tsara indrindra no hatoroko anareo izao: