Read Dikateny Iombonana Eto Madagasikara 1 Kôrintianina 13 Bible Online

1 Kôrintianina 13 - Dikateny Iombonana Eto Madagasikara bible

1 Kôrintianina 13

¹Na dia miteny amin’ny fitenin’ny olona sy ny fitenin’ny anjely aza aho, saingy tsy manam-pitiavana, dia zary varahina maneno sy kipantsona mikarantsana fotsiny.

²Na dia manana ny fanomezana hilaza hafatra avy amin’Andriamanitra aza aho ka hahatakatra ny zava-miafina rehetra sady ho feno ny fahaizana rehetra, ary na dia manana ny finoana rehetra ilaina mba hahafindra tendrombohitra aza aho[69], saingy tsy manam-pitiavana, dia tsinontsinona ihany.

³Na dia mizara ny fananako rehetra amin’ny mahantra sy mahafoy ny tenako mba hireharehako aza aho, saingy tsy manam-pitiavana[70], dia tsy misy mahasoa ahy akory izany.

⁴Mahari-po ny fitiavana; be hamoram-po ny fitiavana; tsy mialona ny fitiavana, tsy mirehareha, tsy mieboebo,

⁵tsy manao ny tsy mendrika, tsy mitady ny ho azy, tsy mora sosotra, tsy manao an-dolompo,

⁶tsy mifaly amin’ny tsy rariny ataon’ny olona, fa mifaly amin’ny marina ataon’ny olona.

⁷Ny fitiavana no ahazakana ny zavatra rehetra ka ananana finoana sy fanantenana ary fandeferana amin’ny zavatra rehetra.

⁸Tsy manam-pahataperana ny fitiavana. Ho foana kosa rahatrizay ny filazana hafatra avy amin’Andriamanitra, hitsahatra ny fitenenana fiteny tsy fantatra, ho foana koa ny fahaizana;

⁹satria sombiny no zavatra haintsika, sombiny no hafatr’Andriamanitra voalazantsika.

¹⁰Fa rehefa mby amin’ny tanteraka, dia ho foana ny sombintsombiny.

¹¹Fony mbola zaza aho, dia niteny toy ny zaza, nihevitra toy ny zaza, nisaina toy ny zaza; rehefa tonga olondehibe aho, dia nariako avokoa ny fanaon-jaza.

¹²Ankehitriny tokoa dia mahita manjavozavo toy ny amin’ny fitaratra isika[71], fa rahatrizay vao hahita mifanatrika. Ankehitriny dia sombiny no zavatra fantatro, fa rahatrizay aho vao hahafantatra tsara toy ny ahafantaran’Andriamanitra ahy.

¹³Izao kosa dia ireto telo ireto no mitoetra: ny finoana, ny fanantenana, ny fitiavana; fa ny fitiavana no lehibe indrindra amin’ireo!