Read Dikateny Iombonana Eto Madagasikara 1 Kôrintianina 3 Bible Online

1 Kôrintianina 3 - Dikateny Iombonana Eto Madagasikara bible

1 Kôrintianina 3

¹Koa izaho, ry havako, dia tsy afaka niteny taminareo toy ny amin’ny olona manana ny Fanahin’Andriamanitra; fa toy ny amin’ny olona mbola fehezin’ny maha olombelona no nitenenako taminareo, toy ny amin’ny olona zazavao amin’ny maha kristianina.

²Dia ronono no namahanako anareo fa tsy ventin-kanina, satria tsy mbola nozakanareo[20]. Na ankehitriny izao aza, dia tsy mbola zakanareo

³noho ianareo mbola fehezin’ny maha olombelona. Matoa fialonana sy adiady no mahazo laka eo aminareo, tsy miharihary ve fa fehezin’ny maha olombelona ianareo ka mitondra tena araka ny filamatr’olombelona?

⁴Raha hoy ny anankiray hoe: «Izaho an’i Paoly», ary hoy kosa ny anankiray hoe: «Izaho an’i Apôlao[21]», moa tsy ny fanaon’olombelona ve no ataonareo?

⁵Fa inona moa i Apôlao, ary inona moa i Paoly? Mpanompon’Andriamanitra fotsiny izahay, ka nahatonga anareo ho mpino samy araka izay nomen’ny Tompo hataonay avy:

⁶izaho moa namboly, ary i Apôlao kosa nanondraka, fa Andriamanitra no nampitsimoka.

⁷Tsy izay mamboly na izay manondraka no tena zavatra, fa Andriamanitra Izay mampitsimoka.

⁸Mitovy ihany izay mamboly sy izay manondraka; ary samy homen’Andriamanitra ny valisoa tandrify azy arakaraka ny fisasarany avy.

⁹Fa izahay dia mpiara-miasa amin’Andriamanitra ary ianareo no sahan’Andriamanitra. Trano aorin’Andriamanitra koa ianareo.

¹⁰Araka ny tombon-tsoa nomen’Andriamanitra ahy, dia nametraka ny fototra toy ny mpità-marika mahay aho; ary olon-kafa no mandrafitra eo ambonin’izany. Kanefa aoka samy hitandrina tsara ny fomba andrafetany;

¹¹satria tsy misy mahazo mametraka fototra hafa, ankoatra ilay efa eo, dia i Jesoa Kristy.

¹²Ny arafitra eo ambonin’izany fototra izany dia mety ho volamena, na volafotsy, na vatosoa, na hazo, na bozaka, na mololo;

¹³kanefa dia hiseho ny asan’ny tsirairay amin’ilay andro fitsarana izay hampiharihary izany. Fa amin’ny afo no hisehoan’izany andro izany, ka dia hosedrain’io afo io ny asa vitan’ny tsirairay hahitana izay hamafiny.

¹⁴Raha asa mahatanty afo moa no narafiny teo ambony fototra, dia handraisany valisoa.

¹⁵Raha asa kilan’ny afo kosa, dia hahafaty antoka azy; kanefa ny tenany dia hovonjena ihany, saingy toy ny namakivaky afo.

¹⁶Tsy fantatrareo ve fa tempolin’Andriamanitra ianareo ary ao aminareo ny Fanahin’Andriamanitra?

¹⁷Raha misy olona manimba ny tempolin’Andriamanitra, dia mba hosimbàn’Andriamanitra koa. Fa masina ny tempolin’Andriamanitra, ary ianareo no tempoliny[22]!

¹⁸Aoka tsy hisy hamita-tena. Raha misy aminareo mihevi-tena ho hendry araka ny filamatr’izao tontolo izao, aoka hanjary adala izy mba ho hendry.

¹⁹Fa ny fahendrena araka ny filamatr’izao tontolo izao dia fahadalana eo imason’Andriamanitra; satria izao no voalazan’ny Soratra Masina: «Ny hafetsen’ny olon-kendry no amandrihan’Andriamanitra azy»;

²⁰ary izao koa: «Fantatry ny Tompo ny fisainan’ny olon-kendry fa zava-poana izany[23].»

²¹Noho izany, aoka tsy hisy hanao olona ho reharehany. Fa anareo ny zavatra rehetra,

²²na i Paoly, na i Apôlao, na i Petera, na izao tontolo izao, na fiainana, na fahafatesana, na zavatra ankehitriny, na zavatra ho avy: anareo avokoa izany rehetra izany;

²³ianareo kosa an’i Kristy, ary i Kristy an’Andriamanitra.