Read Dikateny Iombonana Eto Madagasikara 1 Kôrintianina 4 Bible Online

1 Kôrintianina 4 - Dikateny Iombonana Eto Madagasikara bible

1 Kôrintianina 4

¹Aoka izahay hoheverina ho mpanompon’i Kristy sy ho mpitantana ireo tsiambaratelo momba an’Andriamanitra.

²Ny hany takîna amin’ny mpitantana dia ny ho hita fa olona mahatoky.

³Raha izaho dia tsy mampaninona ahy velively na hotsarainareo, na handia fitsaran’olombelona; fa na ny mitsara ny tenako aza tsy ataoko.

⁴Tsy manome tsiny ahy velively ny eritreritro, nefa tsy mahamarina ahy izany fa ny Tompo no mpitsara ahy.

⁵Noho izany, aza mitsara olona alohan’ny fotoana, dia mandra-piavin’ny Tompo: Izy no hampiharihary ireo zavatra afenina anatin’ny maizina sy hampiseho ireo hevitry ny fon’ny olombelona. Ka amin’izay dia samy homen’Andriamanitra ny dera tandrify azy avy ny tsirairay.

⁶Ry havako, nampihariko tamin’ny tenako sy tamin’i Apôlao izany zavatra izany, noho ny aminareo. Ka dia ny tenanay roa lahy no hianaranareo ny dikan’ilay ohabolana hoe: «Aza mihoatra ny faritra izay efa voasoratra[24].» Aoka ianareo tsy hirehareha miandany amin’olona anankiray ka hanabanty anankiray hafa.

⁷Iza moa no nanondrotra anao ho ambonin’ny sasany? Inona no anananao ka tsy noraisinao tamin’Andriamanitra? Ary raha nandray tamin’Andriamanitra ianao, nahoana no dia mirehareha hoatra ny tsy nandray?

⁸Efa tapi-java-nirina ianareo, efa manankarena, tonga mpanjaka, saingy toa tsy noho ny nataonay! Satriko ho tonga mpanjaka tokoa ianareo, mba hiarahanay manjaka aminareo.

⁹Noheveriko fa izahay apôstôly dia nasehon’Andriamanitra ho olona faraidiny mihitsy: mova tsy olona voaheloko ho faty ampahibemaso ka natao ho fizàhan’izao tontolo izao na anjely na olona.

¹⁰Izahay moa adala noho ny amin’i Kristy, fa ianareo kosa hendry satria tafaray amin’i Kristy; izahay osa, fa ianareo kosa matanjaka; izahay tsy misy hajany, fa ianareo kosa heni-boninahitra.

¹¹Mandraka ankehitriny, dia mijalin’ny hanoanana sy hetaheta izahay; tsy manan-kitafy, velesina, tsy manana antom-ponenana.

¹²Miasa mafy izahay mba hahavita tena[25]; raha ozonin’olona, dia mirary soa; raha enjehina, dia miaritra;

¹³raha endrikendrehina, dia mamaly teny malefaka. Mova tsy tonga fakofakon’izao tontolo izao sy faraidin’ny olona rehetra izahay, mandraka ankehitriny.

¹⁴Tsy ny hanome henatra anareo no anoratako izany, fa ny hananatra anareo, araka ny maha zanaka malalako anareo.

¹⁵Na dia miisa iray alina aza ny mpanabe anareo amin’izao maha kristianina anareo izao, dia tsy maro ray tsy akory ianareo: izaho no rainareo ka nahatonga anareo ho tafaray amin’i Kristy Jesoa tamin’ny alalan’ny Vaovao Mahafaly.

¹⁶Koa miangavy anareo aho: manahafa ahy.

¹⁷Noho izany, dia alefako atỳ aminareo i Timôty[26], zanaka malalako sady mahatoky amin’ny fanompoana ny Tompo. Izy no hampahatsiaro anareo ireo lalana nodiaviko nahatafaray ahy amin’i Kristy Jesoa, araka izay ampianariko amin’ny Fiangonana rehetra hatraiza hatraiza.

¹⁸Nisy manko taminareo nirehareha hoatra ny tsy ho tonga hitsidika anareo iny aho.

¹⁹Kanefa ho avy faingana hitsidika anareo aho, raha sitrapon’ny Tompo; ary tsy izay tenin’ireo mpirehareha no hofantariko fa izay zavatra vitany.

²⁰Ny Fanjakàn’Andriamanitra dia tsy teny foana fa hery mahavita zavatra.

²¹Ka asa izay tianareo: ho avy hitsidika anareo aho, ka tsorakazo ve no hoentiko sa fo feno fitiavana sy fahalemem-panahy?