Read Dikateny Iombonana Eto Madagasikara 2 Kôrintianina 2 Bible Online

2 Kôrintianina 2 - Dikateny Iombonana Eto Madagasikara bible

2 Kôrintianina 2

¹Koa izao no hevitra tapaka tato am-poko: tsy hankany aminareo aho, mba tsy hampalahelo anareo indray.

²Fa raha ampalaheloviko ianareo, dia mba iza indray no hampifaly ahy? Moa tsy ireo nampalaheloviko ihany ve?

³Izany indrindra no nanoratako taminareo[9]: tsy sitrako ny ho tonga atỳ aminareo ka hampalahelovin’ireo olona izay tokony hampifaly ahy. Matoky anareo rehetra aho fa raha faly aho, dia faly koa ianareo rehetra.

⁴Tamin’ny fo ontsa sy ory fatratra ary tamin-dranomaso be no nanoratako taminareo, tsy hoe hampalahelo anareo fa mba hahafantaranareo izato haben’ny fitiavako anareo.

⁵Fa raha nisy taminareo nahatonga alahelo, dia tsy izaho no nampalaheloviny fa ianareo rehetra, na aoka hatao hoe ny sasany taminareo mba tsy hanitatra.

⁶Ampy ho an’izany olona izany ny famaizana vitan’ny maro taminareo;

⁷ka dia aleo mamela heloka sy mankahery azy kosa ianareo, mba tsy hahatonga alahelo tafahoatra hampamoy fo azy.

⁸Noho izany, dia miangavy anareo aho mba hanao izay hahatsapany fa tia azy ianareo.

⁹Satria izao koa no anton’ny nanoratako taminareo: tiako ho fantatra raha voazaha toetra tokoa ianareo, ka hahitako na olona vonon-kanoa ahy amin’ny zavatra rehetra na tsia.

¹⁰Izay olona avelanareo heloka dia mba avelako heloka ihany koa. Izaho anefa, raha nisy heloka navelako, dia noho ianareo no nanaovako izany teo imason’i Kristy,

¹¹fandrao ho voafitak’i Satàna isika, satria fantatsika tsara ny hafetseny[10].

¹²Nony tonga tany Trôasy hitory ny Vaovao Mahafaly momba an’i Kristy aho, dia hitako fa efa novohàn’ny Tompo varavarana sahady aho hiasa tao.

¹³Kanefa tsy nilamin-tsaina aho satria tsy nahita an’i Tito rahalahiko. Koa nanao veloma ny olona tao Trôasy aho, dia niainga nankany Masedônia[11].

¹⁴Kanefa hisaorana anie Andriamanitra Izay mampiombona anay mandrakariva amin’ny fandresen’i Kristy. Ampiasain’Andriamanitra izahay hampiely amin’ny toerana rehetra ny fahalalana an’i Kristy, ho toy ny hanitra mamerovero hatraiza hatraiza.

¹⁵Fa tahaka ny zava-manitra ataon’i Kristy fanatitra ho an’Andriamanitra izahay[12], na amin’ny voavonjy na amin’ny very:

¹⁶fofona mahafaty tokoa izany ho an’ny very, fa fofona mahavelona tokoa ho an’ny voavonjy. Koa iza moa no antonona ho amin’izany asa izany?

¹⁷Izahay dia tsy toy ny sasany manao ny tenin’Andriamanitra ho filàm-bola, fa miteny toy ny olona irahin’Andriamanitra sady mahitsy fo eo anatrehan’Andriamanitra, araka ny maha mpanompon’i Kristy anay.