Read Dikateny Iombonana Eto Madagasikara 2 Kôrintianina 6 Bible Online

2 Kôrintianina 6 - Dikateny Iombonana Eto Madagasikara bible

2 Kôrintianina 6

¹Mpiara-miasa amin’Andriamanitra izahay, ka mananatra anareo mba tsy hamela ho very maina ny fahasoavana voarainareo taminy.

²Fa hoy Andriamanitra ao amin’ny Soratra Masina: «Tamin’ny fotoana mety, dia namaly ny antsonao Aho; ary tamin’ny androm-pamonjena, dia tonga namonjy anao Aho[25].» Indro ankehitriny no fotoana mety amin’Andriamanitra; indro ankehitriny no androm-pamonjena.

³Mba tsy hahazoan’ny olona manakiana ny fanompoana sahaninay, dia tsy avelanay hisy zavatra mahasolafaka ny olona, na amin’inona na amin’inona.

⁴Fa ahariharinay kosa amin’ny zavatra rehetra fa mpanompon’Andriamanitra izahay, ka dia zakainay amim-pandeferana tokoa ny fahoriana sy ny fahaterena ary ny tebiteby:

⁵nokapohina izahay, nahiboka am-ponja[26], nianjadian-korontana, nampanaovina asa mafy, niari-tory ary nifady hanina.

⁶Ahariharinay fa mpanompon’Andriamanitra izahay amin’ny fahadiovan’ny toetranay, amin’ny fahalalànay, amin’ny faharetanay, amin’ny hamoram-ponay, amin’ny Fanahy Masina manentana anay, amin’ny fitiavana tsy mihatsaravelatsihy asehonay,

⁷amin’ny fitorianay ny marina ary amin’ny hery omen’Andriamanitra anay. Izay rariny no fiadiana ampiasainay hanafihana sy hiarovan-tena,

⁸na omem-boninahitra izahay na alàm-baràka, na ratsy laza izahay na tsara laza. Atao ho mpamitaka izahay nefa mpanambara ny marina,

⁹atao ho tsy fantatra nefa fantatra tsara, atao ho efa maty nefa dia izao velona izao. Faizina izahay, nefa tsy vonoina ho faty;

¹⁰na dia ampalahelovina aza izahay, dia faly mandrakariva; toa mahantra izahay nefa mampanan-karena olona maro; toa tsy manana na inona na inona, nefa manana ny zavatra rehetra.

¹¹Niteny tsotra taminareo Kôrintianina izahay; nosokafanay malalaka taminareo ny fonay.

¹²Tsy tery fo taminareo izahay, fa ianareo no tery fo taminay.

¹³Miteny aminareo toy ny amin’ny zanaka aho: mba ho setrin’ny ataonay, halalaho koa re ny fonareo aminay!

¹⁴Aza miray petsapetsa amin’ny tsy mpino, fa tsy sahaza anareo ny miara-dia aminy. Satria ahoana no ikambanan’ny marina amin’ny ratsy fanahy? Ahoana no hiombonan’ny mazava amin’ny maizina?

¹⁵Ahoana no hifanarahan’i Kristy amin’i Beliala[27]? Anjara inona no hiraisan’ny mpino amin’ny tsy mpino.

¹⁶Ahoana no hifandraisan’ny tempolin’Andriamanitra amin’ny sampy? Fa isika no tempolin’Andriamanitra velona, araka ny voalazan’Andriamanitra hoe: «Honina eo aminy Aho ary handeha eo afovoany, dia ho Andriamaniny Aho ary izy ireo ho vahoakako.»

¹⁷Izany no ilazan’ny Tompo hoe: «Mialà teo aminy ka misaraha aminy; aza mikasika zavatra tsy madio, dia horaisiko ianareo.

¹⁸Ka ho Rainareo Aho, ary ianareo ho zanako lahy sy ho zanako vavy, hoy ny Tompo Tsitoha[28].»