Read Dikateny Iombonana Eto Madagasikara Galatianina 5 Bible Online

Galatianina 5 - Dikateny Iombonana Eto Madagasikara bible

Galatianina 5

¹Hahazo ny fahafahana no nanafahan’i Kristy antsika; koa mijoroa amin’izany, fa aza mety hogiazan’ny zioga maha mpanompo indray.

²Indro fa izaho Paoly no miteny aminareo: raha manaiky hoforana ianareo, dia tsy hahasoa anareo na dia kely akory aza i Kristy.

³Ary ambarako indray amin’ny olona rehetra manaiky hoforana fa manana adidy hahatanteraka ny lalàna manontolo izy.

⁴Tafasaraka amin’i Kristy ianareo miezaka ho marina eo imason’Andriamanitra amin’ny fanoavana ny lalàna; miendaka amin’ny fahasoavan’Andriamanitra ianareo.

⁵Isika kosa dia matoky fa Andriamanitra no mahatonga antsika ho marina eo imasony; izany no andrasantsika ho vokatry ny finoantsika noho ny asan’ny Fanahy Masina.

⁶Fa ho an’izay tafaray amin’i Kristy Jesoa, tsy dia ny hoe maha voafora na tsy maha voafora no tena zavatra fa ny finoana izay miasa amin’ny fitiavana.

⁷Efa tsara fiainga ianareo teo am-pihazakazahana; ka iza indray no misakana anareo tsy ho voataonan’ny zavatra marim-pototra?

⁸Izany fitaomana anareo hiato izany dia tsy avy amin’ilay Andriamanitra miantso anareo.

⁹«Leviora kely foana dia mampibohaka ny koba manontolo[33]», hoy ny ohabolana.

¹⁰Kanefa izaho dia omen’ny Tompo toky momba anareo fa tsy hanan-kevitra hafa noho ny ahy ianareo; saingy ilay mpanakorontana anareo, na zovy na zovy izy, dia hiharan’ny fanamelohan’Andriamanitra.

¹¹Izaho kosa, ry havana, raha mbola mitory tokoa hoe ilaina ny famorana, ahoana indray no mbola anenjehana ahy? Raha izany, dia foana ilay fanafintohinana ateraky ny hazofijalian’i Kristy.

¹²Enga anie ka hanakilema ny tenany mihitsy aza[34] ireo mpanabataba anareo!

¹³Fa ianareo, ry havana, dia efa nantsoina ho amin’ny fahafahana; saingy tsy hoe ilay fahafahana hahazoana manao izay sitraky ny maha olona mpanota, fa aoka hifanompo ianareo amin’ny alalan’ny fitiavana.

¹⁴Satria ny lalàna manontolo dia tanteraka amin’ny didy tokana hoe: «Tiavo ny namanao tahaka ny itiavanao ny tenanao[35]!»

¹⁵Fa raha mifandramatra sy mifampihinana ianareo, tandremo fandrao hifandringana.

¹⁶Izao kosa no teniko: mandehana araka ny fanentanan’ny Fanahy Masina ianareo, dia tsy hahatanteraka ny fanirian’ny maha olona mpanota.

¹⁷Fa ny maha olona mpanota dia manam-paniriana manohitra ny fanirian’ny Fanahy Masina; ary ny Fanahy Masina dia manam-paniriana manohitra ny maha olona mpanota: mifanohitra izy roroa, hany ka tsy izay zavatra sitrakareo no ataonareo[36].

¹⁸Kanefa raha tarihin’ny Fanahy Masina ianareo, dia tsy fehezin’ny lalàna intsony.

¹⁹Fa miharihary ny asan’ny maha olona mpanota, dia ireto: fijangajangana, fahalotoana, fihetsika tsy maotina,

²⁰fanompoan-tsampy, fanaovana ody ratsy, fifankahalana, adiady, fahatezerana, fiafonafonana, fifandrafiana, fisarahana, fitokotokoana,

²¹fialonana, fidorohana, fihinanam-be loatra, sy ny mitovy amin’izany. Ary lazaiko aminareo rahateo, tahaka ny voalazako fahiny koa, fa izay manao toy izany dia tsy hanana anjara amin’ny Fanjakàn’Andriamanitra.

²²Ny vokatry ny Fanahy Masina kosa dia fitiavana, hafaliana, fiadanana, faharetana, hamoram-po, hatsaram-po, toetra mahatoky,

²³fahalemem-panahy, fahononam-po: tsy misy lalàna manohitra ny toy izany.

²⁴Ireo voatokana ho an’i Kristy Jesoa dia efa nanombo teo amin’ny hazofijaliana ilay maha olona mpanota azy ireo mbamin’ny filàndratsiny amam-paniriany.

²⁵Raha ny Fanahy Masina tokoa no manome aina antsika, dia aoka hizotra araka ny fanentanan’ny Fanahy Masina koa isika;

²⁶fa aoka tsy ho be rehaka foana hifampihaika sy hifampialona.