Read Dikateny Iombonana Eto Madagasikara Efesianina 1 Bible Online

Efesianina 1 - Dikateny Iombonana Eto Madagasikara bible

Efesianina 1

¹Avy amiko Paoly ity taratasy ity, dia izaho apôstôlin’i Kristy Jesoa noho ny sitrapon’Andriamanitra. Mamangy anareo atỳ Efeso[2] aho, dia ianareo vahoakan’Andriamanitra sady mpino tafaray amin’i Kristy Jesoa.

²Ho aminareo anie ny fahasoavana sy ny fiadanana avy amin’Andriamanitra Raintsika sy i Jesoa Kristy Tompo!

³Hankalazaina anie ilay Andriamanitra sady Rain’i Jesoa Kristy Tompontsika! Fa nitahy antsika Andriamanitra tamin’ny fitahiana rehetra araka ny Fanahy Masina ka nataony miray amin’i Kristy isika sady tonga mponina any an-danitra.

⁴Tsy mbola nahary ny tontolo Izy, dia efa nifidy antsika hiray amin’i Kristy; ka ho masina sady tsy hisy tsiny eo anatrehan’Andriamanitra isika. Noho ny fitiavany antsika,

⁵dia natokan’Andriamanitra isika mba ho Azy[3], mba ho tonga zanany amin’ny alalan’i Jesoa Kristy, fa izany no safidin’ny sitrapony.

⁶Hiderantsika an’Andriamanitra anie ny fahasoavana mamirapiratra izay nomeny antsika maimaimpoana ao amin’ilay Zanany malalany.

⁷Ny ra nafoin-Janany no nahazoantsika ny fanavotana, dia ny famelana ny hadisoantsika[4]. Izany no nanehoan’Andriamanitra ny harem-pahasoavany,

⁸izay natosany be dia be tamintsika ka nahazoantsika fahendrena amam-pahalalana feno.

⁹Dia nampahafantarin’Andriamanitra antsika ilay tsiambaratelon’ny sitrapony, araka ny safidy noheveriny hotontosaina ao amin’ny Zanany.

¹⁰Eny, hotanterahiny mandra-pahatongan’ny fotoanandro farany izany tsiambaratelo izany: dia ny hampivondrona ny zavatra rehetra, ny any an-danitra sy ny eto an-tany, ao amin’i Kristy Filoha tokana.

¹¹Tafaray amin’i Kristy izahay ka tonga anjara lovan’Andriamanitra[5]; satria natokany rahateo izahay, fa izany no fandaharan’Ilay manao ny zavatra rehetra araka izay efa nokasain’ny sitrapony.

¹²Hideranay an’Andriamanitra be voninahitra anie izany, satria izahay no nanantena voalohany an’i Kristy.

¹³Tafaray amin’i Kristy koa ianareo, satria efa renareo ilay hafatra marim-pototra, izany hoe ny Vaovao Mahafaly izay nitondra ny famonjena taminareo, ary efa ninoanareo i Kristy. Ka dia nasiana tombokase maha fananan’Andriamanitra ianareo, tamin’ny nanomezana anareo ny Fanahy Masina Izay nampanantenaina.

¹⁴Io Fanahy Masina io no antoka hahazoantsika ny lova natokan’Andriamanitra ho an’ny vahoakany, mba hahatanteraka ny fanavotana ireo olona natao mba ho fananan’Andriamanitra, hiderantsika ny voninahitr’Andriamanitra izany!

¹⁵Noho izany, rehefa nandre ny finoanareo an’i Jesoa Tompo sy ny fitiavanareo ny vahoakan’Andriamanitra rehetra aho,

¹⁶dia tsy mitsahatra misaotra an’Andriamanitra noho ny aminareo. Mahatsiaro anareo aho amin’ny fivavahako

¹⁷ka mangataka amin’ilay Andriamanitr’i Jesoa Kristy Tompontsika, dia amin’ilay Ray be voninahitra, mba hanomezany anareo ny Fanahy Masina Izay mampahendry anareo sy manambara an’Andriamanitra aminareo ka hahalalanareo Azy tokoa.

¹⁸Mangataka aho ny hanokafan’Andriamanitra ny sainareo handray ny fahazavàny: mba hahafantaranareo ny fanantenana niantsoan’Andriamanitra anareo; sy hahafantaranareo ny haren’ny voninahiny ary ny lova izay natokany ho an’ny vahoakany;

¹⁹ary hahafantaranareo ny hery lehibe sy mihoa-pampana tokoa izay anasoavany antsika mpino, araka ny fiàsany tsy hay tohaina sy mahery vaika.

²⁰Izany hery izany dia nampiasain’Andriamanitra tamin’ny nananganany an’i Kristy ho velona avy tany amin’ny maty ary tamin’ny nampipetrahany Azy eo ankavanany any an-danitra[6].

²¹Any i Kristy dia ambony lavitra noho ny fanapahana sy fahefana ary hery sy fanjakana rehetra eny ana habakabaka[7]; any Izy ambony lavitra noho ny anaram-boninahitra rehetra azo tononina tsy amin’izao fiainana izao ihany fa amin’ny ho avy koa.

²²Fa napetrak’Andriamanitra eo ambany tongotr’i Kristy ny zavatra rehetra[8]; ary i Kristy dia nomen’Andriamanitra ny Fiangonana ho Filoha faratampony.

²³Ny Fiangonana no tenan’i Kristy sady heniky ny hafenoana omen’i Kristy Izay manerana ny zavatra rehetra hatraiza hatraiza[9].