Read Dikateny Iombonana Eto Madagasikara Efesianina 2 Bible Online

Efesianina 2 - Dikateny Iombonana Eto Madagasikara bible

Efesianina 2

¹Fahiny ianareo dia maty ara-panahy noho ny fahadisoanareo sy ny fahotanareo.

²Niaina araka ny fomban’izao tontolo izao ianareo; narahinareo ilay mpanapaka ny fahefana mifehy eny amin’ny rivotra, dia ilay fanahy izay miasa ankehitriny ao amin’ireo olona tsy manaiky an’Andriamanitra.

³Izahay rehetra koa dia anisan’ireo olona ireo, fa nanao fitondrantena araka ny filàndratsin’ny maha olona mpanota izahay fahiny ka nanao izay danin’ny kibo sy saim-pantatra. Noho izany toetranay izany, dia natao hiharan’ny fahatezeran’Andriamanitra tahaka ny hafa koa izahay.

⁴Kanefa lehibe tokoa ny famindrampon’Andriamanitra, satria fatratra ny fitiavana asehony amintsika;

⁵ka fony mbola maty ara-panahy isika noho ny fahadisoantsika, dia novelominy indray niaraka tamin’i Kristy. Fahasoavan’Andriamanitra no namonjena anareo!

⁶Fa noho isika efa tafaray amin’i Kristy Jesoa, dia niara-natsangan’Andriamanitra ho velona isika sy niara-napetrany any an-danitra.

⁷Nataony izany mba hanehoany amin’ny andro ho avy rehetra ny harem-pahasoavany mihoa-pampana, satria mora fo tamintsika Izy tao amin’i Kristy Jesoa.

⁸Eny, fahasoavan’Andriamanitra no namonjena anareo, tamin’ny alalan’ny finoana! Ary tsy avy aminareo izany famonjena izany, fa fanomezan’Andriamanitra;

⁹tsy vokatry ny ezaka vita, fandrao hisy hirehareha.

¹⁰Fa asan’Andriamanitra isika; Izy no nahary antsika ho tafaray amin’i Kristy Jesoa, mba hanao asa tsara izay voaoman’Andriamanitra rahateo hotontosaintsika amin’ny fiainantsika.

¹¹Ianareo izay hafa firenena, — dia ianareo antsoin’ny Jiosy hoe «tsy voafora», fa izy ireo miantso ny tenany hoe «voafora» (ilazana famantarana ataon’ny olona amin’ny nofony) — , tsarovy izay nanjo anareo fahiny:

¹²lavitra an’i Kristy ianareo tamin’izany andro izany; tsy mba navela ho anisan’ilay firenena Israely voafidin’Andriamanitra; tsy mba tao anatin’ireo fanekempihavanana izay niorina tamin’ny fampanantenàn’Andriamanitra; velona teto amin’izao tontolo izao ianareo, kanefa sady tsy nanan-kantenaina no tsy nanana an’Andriamanitra.

¹³Fa ankehitriny kosa, ao amin’i Kristy Jesoa, ianareo izay lavitra fahiny dia efa tonga akaiky, noho ny ra nafoin’i Kristy.

¹⁴Satria i Kristy mihitsy no nampihavana antsika roa tonta, ka nahatonga ny Jiosy sy ny hafa firenena ho iray; fa tamin’ny nanoloran’i Kristy ny tenany, dia narodany ny rindrina izay nampisaraka antsika sy nahatonga antsika hifankahala.

¹⁵Nofoanan’i Kristy ny lalàna jiosy mbamin’ny didy amam-pitsipiny mba hampiraisany antsika roa tonta amin’ny tenany ka hanaovany antsika ho olom-baovao tokana: toy izany no ahavitan’i Kristy fampihavanana.

¹⁶Ny nahafatesany teo amin’ny hazofijaliana dia nanafoana ny fifankahalana, ka nanambatra antsika roa tonta ho tena iray ihany sady nampihavana antsika tamin’Andriamanitra.

¹⁷Izany no nahatongavan’i Kristy nitory Vaovao Mahafaly fampihavanana taminareo hafa firenena izay lavitra an’Andriamanitra sy taminay Jiosy izay akaiky Azy[10].

¹⁸Koa dia amin’ny alalan’i Kristy no ahazoantsika roa tonta manatona an’Andriamanitra Ray noho ny asan’ny Fanahy Masina iray ihany.

¹⁹Noho izany, tsy olon-ko azy na vahiny intsony ianareo hafa firenena, fa iray zo sy andraikitra amin’ny vahoakan’Andriamanitra sady anisan’ny ankohonan’Andriamanitra.

²⁰Taotrano najoron’Andriamanitra ianareo, ka ny fanorenana dia ny apôstôly sy ny mpaminany[11]; ary i Kristy Jesoa mihitsy no vato fehizoro.

²¹Ao amin’i Kristy no azo antoka ho mafy ny taotrano manontolo ka misondrotra hatrany mba ho tonga tempoly masina ao amin’ny Tompo.

²²Ao amin’i Kristy koa no arafitra miaraka aminay ianareo mba ho tonga trano fonenan’Andriamanitra noho ny asan’ny Fanahy Masina.