Read Dikateny Iombonana Eto Madagasikara Efesianina 5 Bible Online

Efesianina 5 - Dikateny Iombonana Eto Madagasikara bible

Efesianina 5

¹Koa manafaha an’Andriamanitra ianareo, satria zanaka lalainy[21].

²Ny fitiavana no aoka hanenika ny fitondrantenanareo, tahaka ny nitiavan’i Kristy antsika sy nanolorany tena tamin’Andriamanitra toy ny fanatitra sy sorona manitra mamerovero ho fanasoavana antsika[22].

³Araka ny sahaza ny vahoakan’Andriamanitra, dia aoka tsy ho voatonona eo aminareo akory aza rehefa fijangajangana sy fahalotoana isan-karazany ary fitiavan-karena.

⁴Fadio ny teny vetaveta sy resaka valavala na voso-dratsy izay samy tsy tokony hatao; fa aleo manao tonombavaka fisaorana an’Andriamanitra.

⁵Fantaro tsara izao: tsy hanana anjara lova amin’ny Fanjakan’i Kristy sy Andriamanitra na ny mpijangajanga na ny maloto fitondrantena na ny mpitia harena (fa mpanompo sampy ny mpitia harena).

⁶Aza mety hofitahina amin’izay teny foana ianareo; fa ny zavatra toy izany indrindra no mahatonga ny fahatezeran’Andriamanitra hihatra amin’ireo olona tsy manaiky Azy.

⁷Koa aza mety ho mpiombona amin’ireny olona ireny ianareo.

⁸Tao amin’ny haizina ianareo fahiny, fa ao amin’ny fahazavana kosa ankehitriny[23], noho ianareo tafaray amin’ny Tompo. Koa manaova fitondrantena tahaka ny olona ao amin’ny fahazavana,

⁹satria ny fahazavana[24] dia mamokatra ny soa sy ny rariny ary ny hitsiny isan-karazany.

¹⁰Miezaha mamantatra izay ankasitrahin’ny Tompo.

¹¹Aza miombona amin’ny asa tsy mahavoka-tsoa ataon’ireo olona ao anatin’ny haizina[25], fa aleo aseho ny tena toetr’ireny asa ireny;

¹²(satria mahamenatra na dia ny hilaza izay ataon-dry zareo ao amin’ny miafina aza).

¹³Fa rehefa asehon’ny fahazavana kosa ny tena toetry ny zavatra rehetra, dia hiharihary avokoa;

¹⁴eny, izay rehetra miharihary dia tonga mazava. Izany no ilazana hoe: «Mifohaza ianao izay matory, ary mitsangàna ho velona avy any amin’ny maty, dia hampahazava anao i Kristy[26].»

¹⁵Koa tandremo tsara ny fitondrantenanareo. Aza manao toy ny olona tsy misaina, fa aoka ho tahaka izay misaina.

¹⁶Hararaoty ny fotoana azo anaovan-tsoa, fa ratsy izao andro izao.

¹⁷Aza miadaladala, fa mba fantaro izay sitraky ny Tompo hataonareo.

¹⁸Aza mimamo divay ianareo, satria fanaranam-po amin’ny ratsy no vokatr’izany; fa aoka ho feno ny Fanahy Masina.

¹⁹Manaova salamo sy hira ary antsa asesiky ny Fanahy Masina; antsa sy salamo no kaloy amin’ny fo tokoa ho an’ny Tompo[27].

²⁰Misaora an’Andriamanitra Ray mandrakariva noho ny olona rehetra[28] amin’ny anaran’i Jesoa Kristy Tompontsika.

²¹Aoka hifanoa ianareo noho ny fanajanareo an’i Kristy.

²²Ianareo vehivavy, maneke ny vadinareo toy ny anekenareo ny Tompo;

²³satria ny lahy no filohan’ny vavy, toy ny maha filohan’ny Fiangonana an’i Kristy; fa i Kristy mihitsy no Mpamonjy ny Fiangonana izay tenany.

²⁴Koa tahaka ny aneken’ny Fiangonana an’i Kristy no tokony haneken’ny vavy ny lahy amin’ny zavatra rehetra.

²⁵Ianareo lehilahy, tiavo ny vadinareo, toy ny nitiavan’i Kristy ny Fiangonana sy ny nanolorany tena hamonjy azy.

²⁶Nataony izany mba hahamasina ny Fiangonana, rehefa avy nodioviny tamin’ny rano fampandroana[29] ombàn-teny;

²⁷fa tiany hamirapiratra ny Fiangonana hatolony ho Azy Kristy, ka tsy hisy pentimpentina na ketrona na zavatra toy izany, fa mba ho masina sady tsy hisy tsiny.

²⁸Dia toraka izany koa, tokony ho tahaka ny itiavan’ny lehilahy ny tenany no hitiavany ny vadiny; izay lehilahy tia ny vadiny, dia tia ny tenany.

²⁹Tsy misy tokoa olona mankahala ny tenany fa dia mamelona sy mikarakara azy, tahaka ny ataon’i Kristy amin’ny Fiangonana:

³⁰fantatsika izany, satria anisan’ny tenan’i Kristy isika.

³¹Fa hoy ny Soratra Masina hoe: «Noho izany, dia handao ny ray aman-dreniny ny lehilahy ka hikambana amin’ny vadiny ary dia ho tena iray ihany izy roroa[30].»

³²Mavesa-danja ny tsiambaratelo fonosin’io andinin-tSoratra Masina io, ary dia lazaiko fa miantefa amin’i Kristy sy ny Fiangonana izany.

³³Kanefa miantefa aminareo mivady rehetra koa izany: ka aoka samy ho tahaka ny itiavan’ny lehilahy ny tenany no hitiavany ny vadiny, ary aoka ny vehivavy hanaja ny vadiny.