Read Dikateny Iombonana Eto Madagasikara Efesianina 6 Bible Online

Efesianina 6 - Dikateny Iombonana Eto Madagasikara bible

Efesianina 6

¹Ianareo zanaka, mpanaraka ny Tompo ianareo[31] ka maneke ny ray aman-dreninareo, fa rariny izany.

²«Hajao ny rainao sy ny reninao»; izany no didy voalohany miampy ny fampanantenana hoe:

³«mba hahita soa sy ho ela velona eto ambonin’ny tany ianao[32].»

⁴Ary ianareo, ray aman-dreny, aza manao izay hampahatezitra ny zanakareo. Fa tezao amin’ny fanabeazana sy fifehezana araka ny Tompo izy.

⁵Ianareo mpanompo, maneke ny tomponareo ara-nofo amin-tahotra sy fanajana ary amin’ny fahatsorampo toy ny anekenareo an’i Kristy.

⁶Tsy hoe raha eo imason’ny tomponareo ara-nofo ihany no manaiky, toy ny mila sitraka amin’ny olona; fa tontosao amin’ny fo tokoa ny sitrapon’Andriamanitra, toy ny ataon’ny mpanompon’i Kristy.

⁷Ataovy amin’ny fo mirana ny asa fanompoanareo, tahaka ny atao amin’ny Tompo fa tsy amin’ny olona;

⁸satria fantatrareo fa ny olona tsirairay, na mpanompo na tsy mpanompo, dia samy hovalian’ny Tompo, amin’izay soa nataony avy.

⁹Ary ianareo tompo, manaova toy izany koa amin’ny mpanomponareo, ka atsaharo ny fandrahonana; satria fantatrareo fa na ianareo, na ny mpanomponareo, dia samy an’ilay Tompo Izay monina ao an-danitra sady tsy mba mizaha tavan’olona[33].

¹⁰Farany, noho ianareo tafaray amin’ny Tompo dia matanjaha ombàn’ny heriny tsy hay tohaina.

¹¹Itafio avokoa ny fiadiana omen’Andriamanitra, mba hahazoanareo hamahatra tsara eo anatrehan’ireo tetika afitsoky ny devoly.

¹²Tsy olombelona nofo aman-dra tsy akory no ifanandrinantsika, fa ireo fanahy ratsy eny ana habakabaka: dia ireo fanapahana, ireo fahefana, ireo hery mifehy ny sehatry ny haizina.

¹³Noho izany, raiso avokoa ny fiadiana omen’Andriamanitra, mba hahazoanareo manohitra ny fahavalo amin’ny andro ratsy; ka rehefa nandresy ny famelezana rehetra nafitsony ianareo, dia mbola hamahatra tsara ihany.

¹⁴Koa mamahara tsara hatrany ianareo: ny marina no ataovy toy ny etra fehikibonareo; ny rariny no tafio ho toy ny fiarovan-tratra;

¹⁵ny fahavononan-kitory ny Vaovao Mahafaly mampihavana no ataovy toy ny kiraro eny an-tongotrareo;

¹⁶tano lalandava ny finoana ho toy ny ampinga hahazoanareo mamono ny zanatsipîka mirehitra rehetra alefan’ilay Ratsy;

¹⁷raiso ny famonjena ho toy ny fiarovan-doha, ary raiso ny tenin’Andriamanitra ho toy ny sabatra omen’ny Fanahy Masina[34].

¹⁸Mivavaha hatrany ary mangataha ny fanampian’Andriamanitra amin’izany; eny, mivavaha mandrakariva araka izay anentanan’ny Fanahy Masina anareo. Miambena sy mazotoa hatrany mba hahatongavana amin’io tanjona io, ary dia mivavaha ho an’ny vahoakan’Andriamanitra rehetra.

¹⁹Mivavaha ho ahy koa mba homen’Andriamanitra ny teny hotononiko rehefa hiloa-bava aho, ka dia ho sahy hampahafantatra ny tsiambaratelo raketin’ny Vaovao Mahafaly.

²⁰Iraka mitondra izany Vaovao Mahafaly izany aho, na dia migadra aza ankehitriny; koa mivavaha ho ahy mba hilazako izany amim-pahasahiana, araka ny tokony hoteneniko.

²¹I Tisiko[35], hava-malalantsika sady mpanompo mahatoky eo amin’ny asan’ny Tompo, dia hampahafantatra anareo ny vaovao rehetra, mba hahalalanareo ny mahazo ahy sy izay ataoko.

²²Izany indrindra no andefasako azy ho atỳ aminareo, mba hahafantaranareo ny momba anay sy hampahery fo anareo.

²³Ho amin’ny havana rehetra anie ny fiadanana sy ny fitiavana mbamin’ny finoana avy amin’Andriamanitra Ray sy i Jesoa Kristy Tompo.

²⁴Ny fahasoavan’Andriamanitra anie homba izay rehetra tia an’i Jesoa Kristy Tompontsika amin’ny fitiavana tsy mety lefy!