Read Dikateny Iombonana Eto Madagasikara Filipianina 2 Bible Online

Filipianina 2 - Dikateny Iombonana Eto Madagasikara bible

Filipianina 2

¹Mampahery anareo tokoa ny firaisana amin’i Kristy, mampirisika anareo ny fitiavany, ary miombona amin’ny Fanahy Masina ianareo[8] ka mahay mangoraka sy be hatsarampo.

²Noho izany, dia fenoy tanteraka ny hafaliako: aoka hifanaraka tsara ianareo ka hoentanin’ny fifankatiavana sy hiray fo ary hiray saina;

³aza manao na inona na inona raha asesiky ny fifampiandaniana na ny filàn-dera foana, fa samia manetry tena manoloana ny namana ary aoka samy hanao ny namana ho ambony noho ny tena.

⁴Aza dia samy mihevitra ny soa ho an’ny tena ihany, fa ny ho an’ny namana koa.

⁵Aoka ho ao aminareo ilay toe-tsaina tao amin’i Kristy Jesoa[9]:

⁶Nananany hatrizay hatrizay ny toetra amam-pomba maha Andriamanitra nefa tsy noheveriny hoe tsy maintsy hifikirana ilay fitoviana amin’Andriamanitra[10].

⁷Fa niendahany an-tsitrapo ny fiamboniany; ka naka ny toetra amam-pomba maha mpanompo Izy[11], tonga nitovy tamin’ny olombelona ary niseho sy hita ho olombelona.

⁸Nanetry tena Izy ka nanaiky hatramin’ny fahafatesana, dia ny fahafatesana teo amin’ny hazofijaliana.

⁹Izany no nanandratan’Andriamanitra Azy ho eo amin’ny toerana faratampony, sy nanomezany Azy ilay anarana, izay ambony noho ny anarana rehetra;

¹⁰ka ho fanajana ny anaran’i Jesoa dia handohalika avokoa izay rehetra any an-danitra na etỳ an-tany na any ambanin’ny tany[12],

¹¹ary hiaiky avokoa ny fiteny rehetra fa «i Jesoa Kristy dia Tompo», ho voninahitr’Andriamanitra Ray[13].

¹²Koa amin’izany, ry hava-malalako, efa nanaiky ahy mandrakariva ianareo fony aho teo aminareo, fa vao mainka tokony hanaiky ahy bebe kokoa ianareo ankehitriny amin’izao tsy maha eo ahy izao. Miasà amin-tahotra sy hovitra hahatomombana ny famonjena anareo;

¹³satria miasa ao anatinareo hatrany Andriamanitra hahatonga anareo hikasa sy hahatanteraka izay mifanaraka amin’ny safidim-pony.

¹⁴Amin’izay rehetra atao, dia aza asiana fimonomononana sy fisalasalana,

¹⁵mba ho tsy manan-tsiny sady tsy misy fitaka ianareo, dia ho zanak’Andriamanitra tsy misy kilema eo afovoan’ny olo-meloka sady maditra[14]. Eo afovoan’ireo olona ireo, dia tokony hamirapiratra toy ny kintana eny an’habakabaka ianareo,

¹⁶ka hanolotra azy ireo ny teny manome fiainana. Raha izany no ataonareo, dia hanan-kireharehana momba anareo aho amin’ny andro hiavian’i Kristy, satria hiharihary fa tsy foana tsy akory ny ezaka nataoko sy ny zavatra nisasarako.

¹⁷Mety halatsa-dra ho sorona araraka aho ka hampombaina ilay sorona atolotrareo an’Andriamanitra, dia ny finoanareo[15]. Raha izany tokoa, dia faly aho ary mampiombona anareo rehetra amin’ny hafaliako;

¹⁸aoka hifaly amin’izany koa ianareo, ary hampiombona ahy amin’ny hafalianareo.

¹⁹Raha sitrak’i Jesoa Tompo, dia antenaiko fa ho afaka handefa faingana an’i Timôty ho atỳ aminareo aho, mba hahazoako fampirisihana koa rehefa mahafantatra ny vaovao momba anareo;

²⁰satria i Timôty izao no hany iray fo amiko sady tena miahy anareo.

²¹Eny, ny hafa rehetra dia samy miraharaha izay azy ihany, fa tsy ny an’i Jesoa Kristy.

²²I Timôty kosa dia fantatrareo fa lehilahy voazaha toetra, satria efa niara-niasa tamiko, toy ny zanaka miaraka amin-drainy, ho fampandrosoana ny Vaovao Mahafaly.

²³Koa manantena ny handefa azy faingana ho atỳ aminareo aho, raha vao hitako mazava izay fandehan-javatra momba ahy;

²⁴ary matoky aho fa ny tenako dia ho avy faingana koa, raha sitraky ny Tompo.

²⁵Nefa nihevitra aho fa tokony halefako atỳ aminareo i Epafrôdito[16] havantsika, izay mpiara-miasa sy mpiara-miady amiko, sady iraka nampitondrainareo ny fanampiana izay nilaiko.

²⁶Manina anareo rehetra izy ary sahiran-kevitra mafy noho ny nandrenesanareo azy hoe narary.

²⁷Narary tokoa izy ary efa teo ambavahoana; nefa namindra fo taminy Andriamanitra, ary tsy taminy ihany fa tamiko koa, mba tsy hanampy trotraka ny alaheloko.

²⁸Koa dia nazoto kokoa aho handefa azy, mba hifalianareo indray rehefa mahita azy ary mba hahamaivana kokoa ny alaheloko.

²⁹Koa raiso amin-kafaliana safononoka izy noho ianareo samy tafaray amin’ny Tompo, ary omeo haja ny olona toa azy;

³⁰fa ny asan’i Kristy no saika nahafaty azy: nanao vy very ny ainy izy hanatanteraka izay tsy azonareo natao, dia ny fitondrana ilay fanampianareo hatratỳ amiko.