Read Dikateny Iombonana Eto Madagasikara Kôlôsianina 3 Bible Online

Kôlôsianina 3 - Dikateny Iombonana Eto Madagasikara bible

Kôlôsianina 3

¹Natsangana ho velona niaraka tamin’i Kristy ianareo. Noho izany, katsaho ny zavatra any ambony, any amin’izay itoeran’i Kristy eo ankavanan’Andriamanitra[20].

²Saino ny zavatra any ambony fa tsy ny zavatra etỳ an-tany.

³Fa efa maty ianareo, ka ny fiainanareo dia miara-miafina amin’i Kristy ao amin’Andriamanitra.

⁴I Kristy no tena fiainanareo ka rahatrizay hiseho Izy, dia hiara-miseho aminy koa ianareo sady hiray voninahitra aminy.

⁵Vonoy ireo zavatra etỳ an-tany mangeja ny tenanareo: dia ny fijangajangana, ny fahalotoana, ny filàndratsy, ny fitsiriritan-dratsy, ary ny fitiavan-karena (fa fanompoan-tsampy ny fitiavan-karena).

⁶Ireo zavatra ireo no mahatonga ny fahatezeran’Andriamanitra hihatra amin’ny olona tsy manaiky an’Andriamanitra[21].

⁷Toy izany koa ny fitondrantenanareo fahiny, fony ianareo niaina tao anatin’ireo zavatra ireo.

⁸Fa ankehitriny kosa, esory avokoa ireto: fahatezerana, fisafoahana, faharatsiam-panahy, fanevatevana, teny maha menatra aloaky ny vavanareo.

⁹Aza mifandainga ianareo fa efa narianareo ny toetra taloha mbamin’ny asany,

¹⁰ary efa notafînareo ny toetra vaovao: dia ny toetry ny olona havaozin’Andriamanitra hatrany araka ny endrik’Izy Mpahary azy[22], mba ho tonga amin’ny fahalalana tsara an’Andriamanitra.

¹¹Koa amin’izany, tsy misy ny hoe hafa firenena sy Jiosy, voafora sy tsy voafora, olona tsy mivoatra na tratra aoriana[23], mpanompo sy tsy mpanompo; fa i Kristy no zavatra rehetra sady ao aminareo rehetra.

¹²Olomboafidin’Andriamanitra sy voatokany ho Azy ianareo sady efa notiaviny. Noho izany, aoka ianareo hitafy hatsaram-po sy fiantrana, hamoram-po sy fanetrentena, fahalemem-panahy sy fahari-po.

¹³Mifandefera ka mifamelà heloka ianareo, raha misy manana alahelo amin’ny sasany. Aoka ianareo koa mba hamela heloka, tahaka ny efa namelan’ny Tompo heloka anareo[24].

¹⁴Fa ambonin’ny zavatra rehetra, mitafia ny fitiavana izay mamehy ny hatsaram-panahy rehetra ho tanteraka.

¹⁵Aoka hanjaka ao am-ponareo ny fiadanana omen’i Kristy, fa ho amin’izany fiadanana izany no niantsoan’Andriamanitra anareo hitambatra ho tena iray; ary aoka ho feno fisaorana an’Andriamanitra ianareo.

¹⁶Aoka ny tenin’i Kristy hitoetra betsaka ao aminareo, ka hifampianatra sy hifananatra amim-pahendrena tanteraka ianareo; noho ny fahasoavana manenika anareo, dia mihirà amin’ny fonareo tokoa ho an’Andriamanitra ka mikaloa salamo sy hira ary antsa asesiky ny Fanahy Masina[25].

¹⁷Ary ny zavatra rehetra, lazainareo na ataonareo, dia tontosao avokoa amin’ny anaran’i Jesoa Tompo ka isaory an’Andriamanitra Ray amin’ny alalany.

¹⁸Ianareo vehivavy, maneke ny vadinareo, araka ny mety amin’ny maha mpanaraka ny Tompo anareo.

¹⁹Ianareo lehilahy, tiavo ny vadinareo ary aza sosotra aminy.

²⁰Ianareo zanaka, maneke ny ray aman-dreninareo amin’ny zavatra rehetra, fa izany no ankasitrahin’ny Tompo.

²¹Ianareo ray aman-dreny, aza mampisafoaka ny zanakareo, fandrao hamoy fo izy.

²²Ianareo mpanompo, maneke ny tomponareo ara-nofo amin’ny zavatra rehetra. Aza eo imasony ihany no manao izany, toy ny mila sitraka amin’olona; fa maneke amim-pahatsoram-po noho ny fanajànareo an’i Jesoa Tompo.

²³Na inona na inona ataonareo, dia tontosao amin’ny fo tokoa tahaka ny atao amin’i Jesoa Tompo fa tsy amin’olona.

²⁴Eny, fantatrareo fa i Jesoa Tompo no handraisanareo ny valiny, dia ny anjara lova natokana ho an’ny vahoakan’Andriamanitra[26]; satria ny tena Tompo Izay tompoinareo, dia i Kristy.

²⁵Fa izay manao ratsy dia hovaliana amin’izay ratsy nataony, fa tsy mba mizaha tavan’olona Andriamanitra[27].