Read Dikateny Iombonana Eto Madagasikara Kôlôsianina 4 Bible Online

Kôlôsianina 4 - Dikateny Iombonana Eto Madagasikara bible

Kôlôsianina 4

¹Ianareo tompo, ento araka ny rariny sy ny hitsiny ny mpanomponareo; satria fantatrareo fa ianareo koa mba manana Tompo any an-danitra.

²Mahareta amin’ny fivavahana, ka miambena amin’izany ombàn’ny fisaorana an’Andriamanitra.

³Mivavaha koa ho anay, mba hataon’Andriamanitra afaka malalaka mitory ny teniny izahay, ka hanambara ny tsiambaratelo momba an’i Kristy. Fa ny fitoriana izany tsiambaratelo izany indrindra no mahavoafonja ahy izao.

⁴Mivavaha àry mba hanambaràko izany mazava tsara, araka izay tokony hoteneniko.

⁵Manàna fitondrantena feno fahendrena eo anoloan’izay tsy kristianina, ka hararaoty ny fotoana azo anaovan-tsoa.

⁶Aoka ho mahatehotia sy mahasoa mandrakariva ny teny ataonareo, dia ho fantatrareo izay tokony havalinareo ny olona tsirairay avy.

⁷I Tisiko[28] hava-malalantsika, mpandraharaha mahatoky sady namana mpiray fanompoana amiko eo amin’ny asan’ny Tompo, dia hampahafantatra anareo ny vaovao rehetra momba ahy.

⁸Izany indrindra no nandefasako azy atỳ aminareo, mba hahafantaranareo ny momba anay sy hampahery fo anareo.

⁹Miaraka aminy koa i Ônesimo[29], ilay hava-malala sy mahatoky avy atỳ aminareo; ka dia izy roa lahy no hampahafantatra anareo ny toe-javatra rehetra atỳ aminay.

¹⁰Manao veloma anareo i Aristarka izay miara-voafonja amiko. Manao veloma anareo i Marka (zanak’olo-mpiray tampo izy sy i Barnabà[30]); efa nahazo hafatrafatra momba an’i Marka ianareo, ka raiso tsara izy raha tonga atỳ aminareo.

¹¹Manao veloma anareo koa i Jesoa, ilay atao hoe Josta. Izy telo lahy ireo no Jiosy tonga kristianina izay miara-miasa amiko hampandroso ny Fanjakàn’Andriamanitra, ka nanjary fampaherezana ho ahy tokoa.

¹²Manao veloma anareo i Epafrà[31], izay avy atỳ aminareo; io mpanompon’i Kristy Jesoa io dia mikely aina mandrakariva mivavaka ho anareo, mba hijoroanareo ho olona matotra ary vonona tanteraka hanao izay rehetra sitrak’Andriamanitra.

¹³Vavolombelona aho ny aminy fa misahirana fatratra izy ho anareo sy ho an-dry zareo any Laôdisia ary ho an-dry zareo any Hierapôly[32].

¹⁴Manao veloma anareo i Lioka, ilay dokotera hava-malalantsika, sy i Demasy[33].

¹⁵Veloma any amin’ireo havana any Laôdisia; ary veloma any amin’i Nimfà sy ny Fiangonana mivory ao an-tranony[34].

¹⁶Rehefa voavaky eto aminareo ity taratasy ity, dia ataovy izay hamakiana azy koa any amin’ny Fiangonan’i Laôdisia; ary dia mba vakionareo kosa ilay taratasy[35] avy any Laôdisia.

¹⁷Lazao amin’i Arkipo[36] fa tsy maintsy hotontosainy tsara ny fandraharahana noraisiny ho fanompoana ny Tompo.

¹⁸Soratanako ireto teny ireto: veloma, hoy i Paoly. Tsarovy fa voafonja aho. Homba anareo anie ny fahasoavan’Andriamanitra!