Read Dikateny Iombonana Eto Madagasikara Josoa 10 Bible Online

Josoa 10 - Dikateny Iombonana Eto Madagasikara bible

Josoa 10

¹Ren’i Adôny-Tsedèka, mpanjakan’i Jerosalema, fa azon’i Josoa ary nopotehiny tanteraka i Hay sady novonoiny ny mpanjakany; ka tahaka izay nataony tamin’i Jerikao sy ny mpanjakany no nataony tamin’i Hay. Reny koa fa ireo mponina tao Gibehôna dia efa nanao fanekempihavanana tamin’ny Israelita ka miara-monina aminy.

²Dia raiki-tahotra mafy ny mponina tao Jerosalema satria i Gibehôna dia tanàna lehibe noho i Hay sady tahaka ny anankiray amin’ireo tanàna misy andriana, ary lehilahy mahery fo avokoa no tao aminy.

³Noho izany, dia nandefasan’i Adôny-Tsedèka iraka i Hôkama mpanjakan’i Hebrôna, i Pireama mpanjakan’i Jarmôta, i Jafia mpanjakan’i Lakisy, ary i Debira mpanjakan’i Heglôna[43], ka nilazany hoe:

⁴— Miakara hanampy ahy hamely an’i Gibehôna satria ny mponina ao aminy efa nanao fanekempihavanana tamin’i Josoa sy ny Israelita.

⁵Dia nivondrona ireo mpanjaka amôrita dimy lay, izany hoe ny mpanjaka tao Jerosalema sy Hebrôna mbamin’ny mpanjaka tao Jarmôta sy Lakisy ary Heglôna, ka niakatra niaraka tamin’ny tafiny rehetra hitoby tandrifin’i Gibehôna sy hanao fahirano azy.

⁶Nandefa iraka ho any amin’i Josoa tany an-tobin’i Gilgala kosa ny Gibehônita ka nanao hoe: — Aza arianao izahay mpanomponao, fa miakara faingana hanampy anay ka afaho izahay! Ireo mpanjaka amôrita rehetra monina any an-tendrombohitra manko dia efa nivondrona hamely anay.

⁷Dia niala tao Gilgala i Josoa sy ny tafika manontolo niaraka taminy, indrindra ny lehilahy mahery fo rehetra;

⁸fa hoy ny TOMPO tamin’i Josoa: — Aza atahoranao ny mpanjaka amôrita satria hatolotro ho eo an-tananao ireo ka tsy hisy afaka hanohitra anao!

⁹Dia nandeha nandritra ny alina avy tao Gilgala i Josoa sy ny tafiny ka namely tampoka an’ireo Amôrita.

¹⁰Nakorontan’ny TOMPO teo anoloan’ny Israelita ny Amôrita, ka voan’ny faharesena lehibe teo akaikin’i Gibehôna. Dia nenjehin’ny Israelita teny am-piakarana ho any Bety-Hôrôna ireo, ka nasiany hatrany Hazekà sy hatrany Makedà.

¹¹Fa iny nandositra teo anoloan’ny Israelita iny ry zareo, ka tonga teo am-pidinana avy ao Bety-Hôrôna, dia nandatsahan’ny TOMPO havandra vaventy avy tany an-danitra ambara-pahatongany tao Hazekà; ka be lavitra ny matin’ny havandra noho izay naripaky ny Israelita tamin’ny sabatra.

¹²Tamin’ny andro nanomezan’ny TOMPO fandresena ho an’ny Israelita teo anoloan’ny Amôrita, dia nivavaka tamin’ny TOMPO i Josoa ka niteny teo imason’ny Israelita hoe: — Ry masoandro, mijanona eo ambonin’ny lohasahan’i Aialôna!

¹³Dia nijanona ny masoandro ary niato ny volana ambara-pandresin’ny firenena israelita ny fahavalony. Araka izay efa voasoratra tao amin’ny bokin’i Ilemahitsy[44], dia nijanona teo afovoan’ny lanitra tokoa ny masoandro, ka tsy nety hilentika indray andro manontolo.

¹⁴Ary tsy nisy andro tahaka iny, na taloha na taoriana, izay nihainoan’ny TOMPO hatak’olona; fa niady ho an’i Israely ny TOMPO.

¹⁵Avy eo dia niverina ho any an-toby tany Gilgala i Josoa sy ny Israelita rehetra tafaraka taminy.

¹⁶Kanjo nandositra ireo mpanjaka amôrita dimy ka niafina tao amin’ny zohy tao Makedà[45].

¹⁷Hita fa niafina tao ireo ka nambara tamin’i Josoa izany.

¹⁸Dia nanome baiko i Josoa hoe: — Anakodiavo vato lehibe eo am-bavazohy ary asio olona hiambina azy.

¹⁹Kanefa ianareo aza mijanona any, fa enjeho ny fahavalonareo ka asio avy ao ivohony; aza avela hiditra any an-tanànany, satria efa natolotry ny TOMPO Andriamanitrareo ao an-tananareo izy.

²⁰Rehefa nasian’i Josoa sy ny Israelita ireo Amôrita, dia voan’ny faharesena lehibe tokoa tamin’ny farany, ary faharesena tanteraka; saingy nisy ihany afa-nandositra ka nitsofoka tao amin’ny tanànany mimanda.

²¹Avy teo dia niverina soa aman-tsara ho any amin’i Josoa tao an-toby tany Makedà ny tafiny manontolo. Ary tsy nisy olona sahy nanao vava ratsy tamin’ny Israelita intsony.

²²Taorian’izany, dia nasain’i Josoa novohana ny vavazohy ka havoaka tao ireo mpanjaka dimy mba hoentina eo aminy.

²³Notanterahina izany ka nentina teo amin’i Josoa ireo mpanjakan’i Jerosalema sy i Hebrôna mbamin’ireo mpanjakan’i Jarmôta sy i Lakisy ary i Heglôna.

²⁴Ary nony naseho teo anatrehan’i Josoa ireo mpanjaka ireo, dia namory ny lehilahy israelita rehetra i Josoa ka niteny tamin’ny mpitari-tafika niara-nikatroka taminy nanao hoe: — Manatona ianareo, ka hitsaho ny vozon’ireo mpanjaka ireo[46]. Dia nanatona izy ka nanitsaka ny vozon’ireo mpanjaka ireo.

²⁵Ary hoy i Josoa tamin’ny mpitari-tafika: — Aza matahotra na mivadi-po! Aoka ho sahy sy hahery ianareo fa tahaka izao no hataon’ny TOMPO amin’ny fahavalo rehetra izay hiadianareo.

²⁶Taorian’izany, dia novonoin’i Josoa ho faty ireo mpanjaka ary nahantony tamin’ny hazo dimy ny fatiny sady navelany teo ambara-paharivan’ny andro.

²⁷Tamin’ny filentehan’ny masoandro dia nasain’i Josoa nampidinina ny faty[47], ka natsipy tao amin’ilay zohy efa nieren’ireo mpanjaka ireo ihany ny fatiny; ary vato vaventy mifanongoa no nanentsenana ny vavazohy, ka mbola ao ireny vato ireny mandraka androany.

²⁸Azon’i Josoa tamin’izany andro izany koa ny tanàna Makedà, ka nasainy novonoina tamin’ny sabatra ny mpanjakany sady nasainy naringana avokoa ny olona rehetra tao ka tsy nisy niangana. Tahaka izay nataon’i Josoa tamin’ny mpanjakan’i Jerikao no nataony tamin’ny mpanjakan’i Makedà.

²⁹Dia niala tao Makedà i Josoa sy ny Israelita rehetra niaraka taminy ka nankany Libnà sy nanafika azy.

³⁰Natolotry ny TOMPO teo an-tanan’ny Israelita koa ny tanàna; dia novonoin’ireo tamin’ny sabatra ny mpanjakany sy ny olona rehetra tao ka tsy nisy niangana. Tahaka izay nataon’ny Israelita tamin’ny mpanjakan’i Jerikao no nataony tamin’ny mpanjakan’i Libnà.

³¹Dia niala tao Libnà i Josoa sy ny Israelita rehetra niaraka taminy ka nankany Lakisy ary nanao fahirano azy sy nanafika azy.

³²Natolotry ny TOMPO teo an-tanan’ny Israelita i Lakisy ka azony tamin’ny andro faharoa. Novonoin’ireo tamin’ny sabatra ny olona rehetra tao, tahaka izay nataony tamin’i Libnà.

³³Tamin’izay dia tonga i Hôrama mpanjakan’i Gezera mba hanampy an’i Lakisy, nefa resin’i Josoa izay mbamin’ny tafiny ka tsy nisy niangana.

³⁴Dia niala tao Lakisy i Josoa sy ny Israelita rehetra niaraka taminy, ka nankany Heglôna ary dia nanao fahirano azy sy nanafika azy.

³⁵Azony androtr’io ihany ny tanàna ka naringany sabatra avokoa ny olona rehetra tao; tahaka izay nataony tamin’i Lakisy ihany izany.

³⁶Dia niala tao Heglôna i Josoa sy ny Israelita niaraka taminy ka niakatra ho any Hebrôna, ary nanafika azy.

³⁷Azony ny tanàna ka novonoiny tamin’ny sabatra ny mpanjakany sy ny olona rehetra tao. Azony koa ireo tanàna rehetra manodidina an’i Hebrôna, ary naringany avokoa ny olona rehetra tao ka tsy nisy niangana; tahaka izay nataony tamin’i Heglôna mihitsy izany.

³⁸Avy teo dia niverina ho any Debira i Josoa sy ny Israelita rehetra niaraka taminy ka nanafika azy.

³⁹Azony ny tanàna sy ny mpanjakany mbamin’ireo tanàna manodidina an’i Debira. Naringany tamin’ny sabatra ny mponina rehetra tao ka tsy nisy niangana. Tahaka izay nataon’i Josoa tamin’i Hebrôna sy i Libnà mbamin’ny mpanjakany no nataon’i Josoa tamin’i Debira sy ny mpanjakany.

⁴⁰Nalain’i Josoa ny tany manontolo; noreseny avokoa ireo mpanjaka rehetra tany an-tendrombohitra sy ny faritra atsimo ary ny teny amin’ny lemak’i Sefelà sy ny kisolosolo, ka tsy nisy niangana; naringany avokoa izay rehetra manana aina, araka ny didy nomen’ny TOMPO Andriamanitr’i Israely.

⁴¹Eny, nalain’i Josoa avokoa, nanomboka teo Kadesy-Barnea sy Gazà any atsimo, ka hatrany amin’ny faritanin’i Gôsena[48] sy hatrany Gibehôna kosa any avaratra.

⁴²Koa ny mpanjaka rehetra mbamin’ny taniny manontolo dia nalain’i Josoa tamin’ny famelezana indray mandeha ihany, satria ny TOMPO Andriamanitr’i Israely mihitsy no niady ho an’ny Israelita.

⁴³Avy teo dia niverina ho an-toby tany Gilgala i Josoa sy ny Israelita rehetra niaraka taminy.