Read Dikateny Iombonana Eto Madagasikara Josoa 13 Bible Online

Josoa 13 - Dikateny Iombonana Eto Madagasikara bible

Josoa 13

¹Nony efa tena antitra i Josoa, dia nitenenan’ny TOMPO hoe: — Efa tena antitra ianao ity, nefa midadasika tokoa ny faritany sisa tsy mbola azo:

²dia ny faritany manontolo misy ny Filistinina sy ny Gesorita[57],

³izany hoe ny faritra noheverina ho kanahanita manomboka hatreo amin’ny lohasahan-driaka Sihôra izay sisin-tany atsinanan’i Ejipta ka hatrany amin’ny faritanin’i Hekrôna any avaratra; ao no misy ireo fanjakana dimy tamin’ny Filistinina, dia i Gazà, i Asdôda, i Askelôna, i Gata ary i Hekrôna; ao koa no misy ny Havita[58]

⁴any atsimo. Tsy mbola azo koa ny tanin’ny Kanahanita, manomboka hatreo Harà[59] izay an’ny Tsidônianina ka hatrany Afeka any amin’ny sisin-tanin’ny Amôrita.

⁵Ao ihany koa ny faritanin’i Gebala sy i Libano atsinanana manomboka hatreo Bahala-Gada eo am-pototry ny tendrombohitra Hermôna ka hatrany Lebô-Hamata.

⁶Anisany koa ny faritra be tendrombohitra eo anelanelan’i Libano sy i Misrefôta-Maina izay Tsidônianina avokoa no monina ao. Izaho no handroaka ireny mponina ireny eo anoloan’ny Israelita; fa ianao kosa no hizara antsapaka ny taniny ho lovan’ny Israelita araka izay efa nandidiako anao.

⁷Koa ankehitriny, zarao ireto tany efa azo ireto ho lovan’ny foko sivy sy antsasa-pokon’i Manase[60].

⁸Ny Reobenita sy Gadita miaraka amin’ilay antsasa-pokon’i Manase manko dia efa nahazo ny zaratany nomen’i Mosesy teny atsinanan’i Jôrdàna. Araka izay nomen’i Mosesy mpanompon’ny TOMPO azy[61],

⁹ny tanin’izy telo tonta dia manomboka eo amin’ny tanàna Harôhera amoron’ny lohasahan-driaka Arnôna sy eo amin’ilay tanàna antenatenan’io lohasaha io, any atsimo; dia mahafaoka ny lembalemba rehetra manodidina an’i Medebà ka hatrany Dibôna;

¹⁰dia mahazo ireo tanànan’i Sihôna, ilay mpanjaka amôrita nanjaka tao Hesbôna sy nanan-tany tafapaka hatrany amin’ny sisin-tanin’ny Hamônita;

¹¹ao anatiny koa i Gilehada, ny faritanin’i Gesora sy i Mahekà, ny tendrombohitra Hermôna, ary i Basàna manontolo hatrany Salkà[62];

¹²mbola anisan’izany koa ny fanjakan’i Hôga, iray amin’ireo Refaîta sisa tavela[63] ary nanjaka tao Hastarôta sy Edrehỳ tany Basàna. Resin’i Mosesy avokoa ireo firenena ireo ka noroahiny.

¹³Tsy noroahin’ny Israelita anefa ny mponina tao Gesora sy Mahekà; koa miara-monina amin’ny Israelita ry zareo mandraka androany.

¹⁴Ny fokon’i Levỳ kosa no hany tsy nomen’i Mosesy zaratany holovany. Ny anjarany dia alaina amin’ny sorona dorana amin’ny afo ho an’ny TOMPO Andriamanitr’i Israely araka izay efa nampanantenain’ny Tompo azy[64].

¹⁵Nomen’i Mosesy anjara ny fokon’ny Reobenita ho an’ireo tarika ao aminy.

¹⁶Ny faritaniny dia manomboka eo amin’ny tanàna Harôhera amoron’ny lohasahan-driaka Arnôna sy eo amin’ilay tanàna antenatenan’io lohasaha io, any atsimo, dia mahafaoka ny lembalemba rehetra manodidina an’i Medebà;

¹⁷isan’izany koa i Hesbôna sy ny tanàna rehetra eny amin’io lembalemba io, dia i Dibôna, i Bamôta-Bahala, i Bety-Bahala-Mehôna,

¹⁸i Jahatsa, i Kedemôta, i Mefahata,

¹⁹i Kiriataîma, Sibmà, i Tsereta-Sahary izay eo amin’ilay havoana mandondona ny lohasahan’i Jôrdàna,

²⁰i Bety-Pehôra, ny kisolosolon’i Pisgà, ary i Bety-Jerimôta.

²¹Ankoatra ireo tanàna rehetra teny amin’ny lembalemba ireo, dia ao anatiny koa ny fanjakana manontolo izay an’i Sikôna, ilay mpanjaka amôrita nanjaka tao Hesbôna. Noresen’i Mosesy niaraka tamin’i Sihôna ireo mpanjaka midianita izay nanoa an’i Sihôna ka nonina tao amin’izany tany izany: dia ry i Evỳ, i Rekema, i Tsora, i Hora, ary i Rebà.

²²I Balahama mpimasy, ilay zanakalahin’i Behôra, dia isan’ireo novonoin’ny Israelita tamin’izay.

²³I Jôrdàna sy ny morontsiraka[65] no sisin-tanin’ny Reobenita, ao andrefana. Ireo tanàn-dehibe voatanisa ireo, miampy ny tanàna kely miankina aminy, no zaratany nolovan’ny Reobenita ho an’ireo tarika ao anatiny.

²⁴Nomen’i Mosesy anjara koa ny fokon’i Gada; nomena ny Gadita izany ho an’ireo tarika ao anatiny.

²⁵Ny faritaniny dia mahafaoka ny tanàna Jahezera, ny tanàna rehetra ao Gilehada, ary ny antsasaky ny tanin’ny Hamônita tafapaka hatrany Harôhera akaikin’i Rabà;

²⁶dia mitatra hatreo Hesbôna ka hatrany Ramata-Mitsipè sy Betônima, ary hatreo Mahanaîma ka hatrany amin’ny sisin-tanin’i Lô-Dabara.

²⁷Tany amin’ny lohasahan’i Jôrdàna kosa dia nisy an’i Bety-Harama sy i Bety-Nimrà ary i Sokôta sy i Tsafôna, izany hoe ny sisa amin’ny fanjakan’i Sihôna izay nanjaka tao Hesbôna: tao andafy atsinanan’i Jôrdàna no misy izany faritany izany, ka mipaka hatrany amin’ny farihin’i Genesareta any avaratra.

²⁸Ireo tanàn-dehibe voatanisa ireo miampy ny tanàna kely miankina aminy no zaratany nolovan’ny Gadita ho an’ireo tarika ao anatiny.

²⁹Ary nomen’i Mosesy anjara koa ny antsasa-pokon’i Manase; azon’ilay antsasa-poko taranak’i Manase izany ho an’ireo tarika ao anatiny.

³⁰Ny faritaniny dia manomboka eo Mahanaîma ao atsimo ary mahafaoka an’i Basàna manontolo, izany hoe ny fanjakana manontolo izay an’i Hôga mpanjaka tao Basàna, mbamin’ny fitambaran’i Havôta-Jaîro, izay tanàna enimpolo tao Basàna;

³¹ao anatiny koa ny antsasak’i Gilehada, ary i Hastarôta sy i Edrehỳ renivohitry ny fanjakan’i Hôga mpanjakan’i Basàna. Izany no faritany azon’ny taranak’i Makira zanakalahin’i Manase; azon’ilay antsasaky ny taranak’i Makira izany ho an’ireo tarika ao anatiny.

³²Ireo tany ireo no voazaran’i Mosesy teny atsinanan’i Jerikao, ampita atsinanan’i Jôrdàna, fony izy tao amin’ny lemak’i Môaba.

³³Tsy mba nomen’i Mosesy zaratany kosa ny fokon’i Levỳ; satria, araka ny nolazainy taminy, dia ny manompo ny TOMPO Andriamanitr’i Israely no anjarany[66].