Read Dikateny Iombonana Eto Madagasikara Josoa 16 Bible Online

Josoa 16 - Dikateny Iombonana Eto Madagasikara bible

Josoa 16

¹Izao no zaratany navoakan’ny antsapaka ho an’ny taranak’i Jôsefa. Ny sisiny atsimo dia manomboka hatreo Jôrdàna akaikin’i Jerikao, eo atsinanan’ny loharanon’ny tanàna. Avy eo Jerikao dia mihazo ilay taniefitra miakatra ho any amin’ny tendrombohitr’i Betela.

²Dia mankany Lozy, mandalo an’i Hatarôta izay sisin-tanin’ny Arkita[76],

³midina miankandrefana ho any amin’ny sisin-tanin’ny Jafletita, mandalo an’i Bety-Hôrôna ambany sy i Gezera, ary mipaka amin’ny Ranomasina Mediteranea.

⁴Ireo taranak’i Jôsefa, izany hoe ny fokon-dry i Manase sy i Efraîma, no nandova izany.

⁵Izao kosa no velaran-tanin’ny Efraîmita ho an’ireo tarika ao anatiny: ny sisiny atsimo dia manomboka hatreo Hatarôta-Adara any atsinanana, tonga hatrany Bety-Hôrôna ambony

⁶ary mipaka amin’ny Ranomasina Mediteranea. Ny sisin-tany tendrony avaratra kosa dia eo Mikmetata. Eo atsinanan’i Mikmetata dia mihodina mankany Taanata-Silao ary mizotra miantsinanana ho any Janôhà;

⁷avy eo dia midina ho any Hatarôta sy Naharà, dia mihazo an’i Jerikao ary mipaka any Jôrdàna.

⁸Eo andrefan’i Mikmetata kosa dia mihodina mankany Tapoa, manaraka ny reniranon’i Kanà, ary mipaka amin’ny Ranomasina Mediteranea. Izany no zaratany nomena ireo tarika ao anatin’ny fokon’i Efraîma,

⁹miampy ireo tanàna sy zana-bohitra notsongaina teo anivon’ny zara tanin’ny fokon’i Manase.

¹⁰Ary ny taranak’i Efraîma dia tsy nandroaka ny Kanahanita izay nonina tao Gezera. Koa mbola miara-monina aminy ihany ireny kanahanita ireny mandraka androany, ary nampanaoviny asa fanompoana.