Read Dikateny Iombonana Eto Madagasikara Josoa 18 Bible Online

Josoa 18 - Dikateny Iombonana Eto Madagasikara bible

Josoa 18

¹Taorian’ny nandresen’ny Israelita ilay tany, dia nivory tao Silao ny fiangonana israelita tsivakivolo ka tao no nananganany ny Tranolay fihaonana amin’Andriamanitra[80].

²Ary mbola nisy foko fito tsy mbola nahazo ny zarataniny.

³Ka hoy i Josoa tamin’ireo Israelita ireo: — Mandra-pahoviana no hiandrasanareo tsy handeha handray ny tany izay nomen’ny TOMPO Andriamanitry ny razanareo anareo?

⁴Koa manendre lehilahy telo isam-poko mba hirahiko hitety ny tany; avy eo dia hiverina hanao tatitra eo anatrehako ny amin’ny anjara tany noteteziny.

⁵Dia hozarain’ireo ho fito toko ny tany. Ny taranak’i Joda dia hijanona amin’ny faritaniny ao atsimo, ary ny taranak’i Jôsefa kosa hijanona amin’ny azy ao avaratra.

⁶Ataovinareo an-tsoratra ny toetoetr’ireo tany fito toko ireo ka ento atỳ amiko izany; dia hataoko antsapaka eo anatrehan’ny TOMPO Andriamanitsika izay ho anjara fokonareo avy.

⁷Tsy hisy anjara ho an’ny Levita eo anivonareo satria ny fisoronana amin’ny TOMPO no lovany. Ny fokon’i Gada sy fokon’i Reobena ary antsasa-pokon’i Manase koa dia efa nahazo ny zaratany teny ampita atsinanan’i Jôrdàna, ka i Mosesy mpanompon’ny TOMPO no nanome azy izany.

⁸Dia nioman-kandeha ireo lehilahy voatendry hisafo ny tany, ka izao no baiko nataon’i Josoa taminy: — Mandehana, tetezo ny tany, ataovy an-tsoratra ny toetoetrany, dia miverena atỳ amiko; fa eto Silao, eto anatrehan’ny TOMPO no hanaovako antsapaka izay ho anjaranareo avy.

⁹Dia nandeha ireo lehilahy ireo ka nitety ny tany sy nanao an-tsoratra ny toetoetrany ary nizara azy ho fito toko miaraka amin’ny lisitry ny tanàna; dia niverina ho any amin’i Josoa tao amin’ny toby tao Silao.

¹⁰Ary nanao ny antsapaka teo anatrehan’ny TOMPO tao Silao i Josoa ka nizara ny tany ho an’ny Israelita araka ny anjara tandrifin’ny fokony avy.

¹¹Ny anjara voatendrin’ny antsapaka voalohany dia azon’ny foko benjaminita ho an’ireo tarika ao anatiny; ka ny velaran-taniny dia teo anelanelan’ny an’ny taranak’i Joda sy ny an’ny taranak’i Jôsefa[81].

¹²Ny sisin-taniny, lafy avaratra, dia miainga hatreo Jôrdàna ka miakatra ho any amin’ny ilany avaratr’i Jerikao, dia mahazo ny tendrombohitra any andrefana, ary miafara amin’ny taniefitr’i Bety-Avena;

¹³avy eo dia mankany Lozy ka mandalo amin’ny ilany atsimon’i Lozy izay antsoina koa hoe Betela, ary midina ho any Hatarôta-Adara, rehefa avy mandalo ny tendrombohitra eo atsimon’i Bety-Hôrôna ambany.

¹⁴Ao andrefan’io tendrombohitra io no miolaka ny sisin-tany ka mihodina mianatsimo ary miafara ao Kiriata-Bahala (antsoina koa hoe Kiriata-Jeharima), izay tanànan’ny taranak’i Joda. Izany no sisin-tany lafy andrefana.

¹⁵Ny sisin-tanin’i Benjamîna, lafy atsimo kosa, dia miainga hatreo Kiriata-Jeharima, ka miankandrefana[82] ary miafara any amin’ny loharanon’i Neftoa.

¹⁶Avy eo midina hatrany am-pototr’ilay tendrombohitra manoloana ny lohasahan’i Hinôma ao avaratry ny lohasahan’ny Refaîta, dia manaraka ny lohasahan’i Hinôma amin’ny ilany atsimo manamorona ny havoanan’ny Jebosita, ary midina hatrany Haîna-Rôgela.

¹⁷Avy eo mihodina mianavaratra ka mandroso hatrany Haîna-Semesa sy hatrany Gilelôta[83] izay manoloana ny fiakaran’i Adomima, ary midina ho any amin’ilay vato atao hoe vaton’i Bôhana (I Bôhana dia zanakalahin’i Reobena).

¹⁸Avy eo mihazo ny ilany avaratr’ilay havoana mandondona ny lohasahan’i Jôrdàna, dia midina amin’io lohasaha io,

¹⁹ary mitohy any avaratr’i Bety-Hôglà ka miafara any amin’ny tendrony avaratry ny Ranomasina Maty, eo am-bavaranon’i Jôrdàna. Izany no sisin-tany, lafy atsimo.

²⁰I Jôrdàna kosa no sisin-tany, lafy atsinanana. Izany no zaratany nolovan’ny Benjaminita ho an’ireo tarika ao anatiny, araka ny sisin-tany manodidina azy.

²¹Ireto avy ny tanàna azon’ny foko benjaminita ho an’ny tarika ao anatiny: i Jerikao, i Bety-Hôglà, i Hemeke-Ketsitsa,

²²i Bety-Harabà, i Tsemaraîma, i Betela,

²³i Havima, i Parà, i Hôfrà,

²⁴i Kefara-Hamônà, i Hôfnỳ, ary i Geba; izany hoe tanàna 12 miampy ireo tanàna kely miankina aminy.

²⁵Tao koa i Gibehôna, i Ramà, i Beerôta.

²⁶i Mitsipè, i Kefirà, i Môtsà,

²⁷i Rekema, i Jirpeela, i Taralà,

²⁸i Tselà, i Elefa, ny tanànan’ny Jebosita (izany hoe i Jerosalema), i Gibehata, ary i Kiriata; izany hoe tanàn-dehibe 14 samy miampy ireo tanàna kely miankina aminy. Izany no zaratany nolovan’ny Benjaminita ho an’ireo tarika ao anatiny.