Read Dikateny Iombonana Eto Madagasikara Josoa 20 Bible Online

Josoa 20 - Dikateny Iombonana Eto Madagasikara bible

Josoa 20

¹Ary ny TOMPO dia nandidy an’i Josoa,

²mba hilaza amin’ny Israelita hoe: — Fidio ny tanàna fialokalofana[100] araka izay efa nampilazaiko an’i Mosesy taminareo.

³Any no handosiran’izay mahafaty olona tsy nahy fa kisendrasendra, ka ho fialofana ho anareo izany mba tsy ho azon’ny mpamaly faty[101].

⁴Ary rehefa mandositra amin’ireo tanàna ireo ilay namono olona tsy nahy, dia hijanona eo anoloan’ny vavahadin’ny tanàna, ka hanazava amin’ireo loholona ao an-tanàna ny zava-niseho. Dia horaisin’ireo ho ao an-tanànany izy ka homeny toerana mba hiara-monina aminy.

⁵Raha tàhiny manenjika azy ilay mpamaly faty, dia tsy hatolotr’ireo ho eo an-tanany ilay nahafaty olona satria kisendasendra no namelezany ilay namany fa tsy fankahalana azy mialoha.

⁶Honina ao amin’io tanàna io izy ambara-pisehony hotsaraina eo anatrehan’ny fiangonana israelita ary ambara-pahafatin’ny mpisorombe niasa tamin’izany andro izany. Dia hody ilay nahafaty olona ka hiverina an-tranony, any amin’ilay tanàna izay nialany fony izy nandositra.

⁷Dia natokan’ny Israelita ireto tanàna ireto: i Kedesa any Galilea any amin’ny faritra havoan’i Naftalỳ; sy i Sekema, any amin’ny faritra havoan’i Efraîma; ary i Kiriata-Arbà (antsoina hoe koa Hebrôna) any amin’ny faritra havoan’i Joda[102].

⁸Teny ampita atsinanan’i Jôrdàna tandrifin’i Jerikao kosa dia ireto tanàna ireto no voafidy: i Betsera, any amin’ny taniefitra lembalemba, avy amin’ny fokon’i Reobena; sy i Ramôta any Gilehada, avy amin’ny fokon’i Gada; ary i Gôlana any Basàna, avy amin’ny fokon’i Manase.

⁹Ireo tanàna ireo no natokana ho fialofana ho an’ny Israelita rehetra sy ny vahiny valovotaka ao aminy; any no handosiran’izay rehetra nahafaty olona tsy nahy, mba tsy hovonoin’ny mpamaly faty izy ambara-pisehony hotsaraina eo anatrehan’ny fiangonana israelita.