Read Dikateny Iombonana Eto Madagasikara Josoa 6 Bible Online

Josoa 6 - Dikateny Iombonana Eto Madagasikara bible

Josoa 6

¹Tamin’izay ny vavahadin’i Jerikao dia nihidy mafy tokoa teo anoloan’ny Israelita, ka tsy nisy olona afa-nivoaka ny tanàna ary tsy nisy afa-niditra.

²Dia hoy ny TOMPO tamin’i Josoa: — Indro fa atolotro eo an-tananao i Jerikao sy ny mpanjakany ary ny maherifony.

³Koa mandehana manodidina ny tanàna indray mandeha isan’andro ianao sy ny mpiantafikao rehetra; mandritra ny enina andro no hanaovanao izany

⁴ka mpisorona fito samy mitondra trompetra iray avy no hialoha ny Vatamasina. Amin’ny andro fahafito dia hodidino impito ny tanàna, ary mandritra izany aoka ny mpisorona hitsoka ny trompetrany.

⁵Rehefa re manao feo lavareny ny trompetra, dia hanakora mafy ny vahoaka rehetra ka hirodana amin’izay ny mandan’ny tanàna; ary hiakatra hamely samy araka ny tandrifiny avy ny Israelita.

⁶Dia niantso ny mpisorona i Josoa zanakalahin’i Nona ka nanao taminy hoe: — Entonareo ilay Vatamasina mirakitra ny fanekempihavanan’ny TOMPO, ary aoka hisy mpisorona fito mitondra trompetra eo alohany.

⁷Avy teo dia nanome baiko ny vahoaka i Josoa mba hanodidina ny tanàna, ka ny andian-tafika mpamaky lay no handeha mialoha ireo mpisorona fito mitondra trompetra eo alohan’ilay Vatamasin’ny TOMPO.

⁸Dia araka izay baiko nomen’i Josoa no fizotran-javatra. Ny mpisorona fito mitondra trompetra no nandroso sady nitsoka trompetra teo alohan’ny Vatamasina mirakitra ny fanekempihavanan’ny TOMPO.

⁹Ny andian-tafika mpamaky lay no nialoha ireo mpisorona ireo ary ny vodilalana kosa nanaraka ny Vatamasina. Teny am-pandehanana, dia notsofina hatrany ny trompetra.

¹⁰Ary Josoa efa nandidy ny vahoaka hoe: «Aza manakora na manao izay andrenesam-peo na mamoaka teny akory aza; fa amin’ny andro hilazako aminareo hoe manaova akoran’ady, vao hanao akoran’ady ianareo».

¹¹Dia nentina nanodidina ny tanàna indray mandeha ny Vatamasin’ny TOMPO; ary niverina tany an-toby ny Israelita ka nandry tao.

¹²Nifoha vao maraina be i Josoa ny ampitso ary nolanjain’ny mpisorona indray ny Vatamasin’ny TOMPO.

¹³Ny mpisorona fito mpitondra trompetra no nandroso sady nitsoka trompetra teo alohan’ny Vatamasina. Ny andian-tafika mpamaky lay nialoha ireo mpisorona ireo ary ny vodilalana kosa nanaraka ny Vatamasina. Teny am-pandehanana dia notsofina hatrany ny trompetra.

¹⁴Tamin’io andro faharoa io dia nanodidina ny tanàna indray mandeha koa ry zareo, vao niverina tany an-toby. Enina andro no nanaovany toy izany.

¹⁵Fa tamin’ny andro fahafito dia nifoha mbola maizimaizina ny Israelita ka nanodidina ny tanàna toy ny fanaony, saingy impito misesy; tamin’izany andro izany ihany anefa ry zareo no nanodidina ny tanàna impito misesy.

¹⁶Ary tamin’ny fihodinana fahafito, rehefa nampaneno ny trompetra ireo mpisorona, dia hoy i Josoa tamin’ny vahoaka: — Manaova akoran’ady fa efa natolotry ny TOMPO anareo ny tanàna!

¹⁷Ary ny tanàna mbamin’izay rehetra ao aminy dia haringana hafoy ho an’ny TOMPO. Fa i Rahaba mpivaro-tena sy izay rehetra miaraka aminy ao an-tranony ihany no avelao ho velona, satria ravehivavy io no nanafina ireo mpitsikilontsika.

¹⁸Kanefa mitandrema ianareo fandrao hitsiriritra ireo zavatra haringana hafoy ho an’ny Tompo ka maka amin’ireo, fa hitondra loza sy fandravana ho an’ny tobin’i Israely ianareo[18].

¹⁹Ny volafotsy sy volamena rehetra ary ny fanaka rehetra halimo sy vy dia hatokana ho Azy TOMPO ka haiditra ao amin’ny firaketan’ny TOMPO.

²⁰Dia nitsoka trompetra ny mpisorona. Ka raha vao nandre ny feon-trompetra ny vahoaka, dia nanezaka mafy nanao akoran’ady; koa nirodana tamin’izay ny manda. Dia niakatra hamely tao an-tanàna samy araka ny tandrifiny avy ny Israelita ka naka ny tanàna.

²¹Ary naringany tamin’ny sabatra avokoa ny mponina rehetra tao na lehilahy na vehivavy na antitra na tanora, mbamin’ny omby sy ny ondry aman’osy ary ny boriky.

²²Ary hoy i Josoa tamin’ireo roa lahy nisafo ny tany: — Mankanesa any an-tranon’i Rahaba mpivaro-tena, ka avoahy tao izy sy ny havany rehetra araka izay efa nianiananareo taminy.

²³Dia nandeha tany izy roa lahy ka namoaka an’i Rahaba sy ny ray aman-dreniny ary ny mpiray tampo aminy sy ireo havany sisa rehetra; ary toerana azo antoka teo ivelan’ilay tobin’ny Israelita no nametrahany azy.

²⁴Vita izay, dia nodorana tamin’ny afo ny tanàna mbamin’izay rehetra tao aminy, afa-tsy ny volafotsy sy volamena ary ny fanaka halimo sy vy izay napetraka ho rakitra tao an-tranon’ny TOMPO.

²⁵Fa i Rahaba mpivaro-tena mbamin’ny fianakaviany manontolo kosa dia novelomin’i Josoa noho ny nanafenan-dravehivavy an’ireo mpitsikilo izay nalefany tany Jerikao. Nonina teo anivon’ny Israelita i Rahaba ary mbola ao mandraka androany ny taranany.

²⁶Tamin’izany fotoana izany koa dia nanambara izao fampitandremana momba an’i Jerikao izao i Josoa nanao hoe: «Ho voaozona eo anatrehan’ny TOMPO anie izay olona mitsangana hanamboatra an’ity tanàna ity ka ny ain’ny lahimatoany no ho sandan’ny hanorenany ny fototra ary ny ain’ny faralahiny no ho sandan’ny hananganany ny vavahady[19]!»

²⁷Ary nombàn’ny TOMPO i Josoa ka niely laza eran’ny tany izany.