Read Dikateny Iombonana Eto Madagasikara Josoa 7 Bible Online

Josoa 7 - Dikateny Iombonana Eto Madagasikara bible

Josoa 7

¹Nanao fahadisoana bevava ny Israelita tamin’ny fandikana didy momba ireo zavatra voatokana hafoy ho an’ny TOMPO[20]; fa naka zavatra sasany tamin’ireo i Hakàna, zanakalahin’i Karmỳ sy zafin’i Zabdià ary zafiafin’i Zera sady anisan’ny fokon’i Joda, koa tezitra tamin’ny Israelita ny Tompo.

²I Josoa kosa naniraka vatan-dehilahy avy tao Jerikao ho any Hay, izay tanàna ao atsinanan’i Betela eo akaikin’i Bety-Avena, ka nanome baiko azy mba hiakatra hisafo iny faritra iny. Dia niakatra nisafo an’i Hay ireo lehilahy ireo

³ary niverina tany amin’i Josoa ka nanao taminy hoe: — Aoka tsy hiakatra avokoa ny tafika manontolo; fa roa arivo na telo arivo lahy ihany no aoka hiakatra hamely an’i Hay. Aza manasatra ny tafika manontolo any fa vitsy ihany ry zareo.

⁴Koa tokony ho lehilahy telo arivo no niakatra tany. Kanjo voatery nandositra teo anatrehan’ny mponina tao Hay ireo;

⁵fa nahafatesany olona 36 ny Israelita sady nenjehiny nanomboka hatreo ambavahadin’ny tanàna ka hatrany Sebarîma[21] ary nasiany teny am-pidinana. Dia ketraka ny fon’ny vahoaka fa hoatra ny voatapo-drano.

⁶Dia nandriatra fitafiana i Josoa sy ireo loholon’i Israely ka nanosom-bovoka ny lohany sady niankohoka tamin’ny tany teo anoloan’ny Vatamasin’ny TOMPO mandra-paharivan’ny andro.

⁷Ary hoy i Josoa hoe: — Indrisy, ry Tompo ANDRIANANAHARY ô! Nahoana moa izahay vahoakanao izao no nentinao nita an’i Jôrdàna? Mba hanoloranao anay ho eo an-tanan’ny Amôrita ka handringanana anay ve? Naleonay ihany nijanona tany an-dafin’i Jôrdàna!

⁸Inona moa no azoko lazaina, ry Tompo, fa ny Israelita efa nandositra teo anoloan’ny fahavalony?

⁹Ho henon’ny Kanahanita sy ny mponina rehetra amin’ity tany ity izany, dia hikambana hamely anay ireo ka handringana anay; koa inona àry no hataonay mba hiekena ny lazanao lehibe?

¹⁰Dia hoy ny TOMPO tamin’i Josoa: — Mitsangàna fa nahoana ianao no miankohoka toy izao?

¹¹Nanota ny Israelita ka nivadika tamin’ny fanekempihavanana nodidiako hotandremany; fa ny zavatra nasaiko nolevonina dia nakany sy nangalany ary nanafenany ka nataony tanaty entany.

¹²Izany no tsy hahazoan’ny Israelita hanohitra ny fahavalony; fa handositra eo anoloan’ireo ny Israelita, satria efa voaozona ho ringana. Tsy homba anareo intsony Aho raha tsy fongotra teo aminareo izay nasaiko nolevonina.

¹³Mandehana omany ny vahoaka mba hihaona amiko rahampitso ka ilazao izy mba samy hanadio ny tenany; fa Izaho TOMPO Andriamanitr’i Israely no milaza amin’ny Israelita hoe: «Mbola manana zavatra nasaiko nolevonina ianareo; noho izany, tsy afaka hanohitra ny fahavalonareo ianareo raha tsy foana teo aminareo ireny zavatra ireny.

¹⁴Rahampitso maraina dia hiseho eo anatrehako araka ny fokony avy ianareo. Ny foko izay voatondroko dia hiseho eo anatrehako isan-tarika; ary ny tarika izay voatondroko dia hiseho isam-pianakaviana; ary ny lehilahy ao amin’izay fianakaviana voatondroko dia hiseho tsirairay eo anatrehako[22].

¹⁵Ary hotondroiko ilay lehilahy mitana zavatra tokony holevonina, ka hodorana amin’ny afo izy mbamin’izay rehetra azy satria nivadika tamin’ny fanekempihavanako izy ka nanao izay tsy fanao teo amin’i Israely.»

¹⁶Dia nifoha vao maraina i Josoa ny ampitso ary nampanatona ny Israelita isam-pokony, ka ny fokon’i Joda no voatondro.

¹⁷Ary nampanatoniny isan-tarika ny fokon’i Joda ka ny tarik’i Zera no voatondro. Dia narosony isam-pianakaviana ny tarik’i Zera ka ny fianakavian’i Zabdỳ no voatondro.

¹⁸Dia narosony tsirairay ny lehilahy tao amin’ny fianakavian’i Zabdỳ ka i Hakàna, zanakalahin’i Karmỳ sy zafin’i Zabdỳ ary zafiafin’i Zera sady anisan’ny fokon’i Joda, no voatondro.

¹⁹Dia hoy i Josoa taminy: — Anaka, omeo voninahitra sy haja ny TOMPO Andriamanitr’i Israely; lazao amiko izay nataonao fa aza misy afenina ahy.

²⁰Dia novalian’i Hakàna hoe: — Marina tokoa fa izaho no nanota tamin’ny TOMPO Andriamanitr’i Israely ary ireto avy no nataoko:

²¹Tamin’ny zavatra babo dia nahitako kapaoty tsara tarehy iray avy any Babilôna sy volafotsy roa kilao ary anja-bolamena antsasa-kilao. Notsiriritiko fatratra ireo ka nalaiko. Ho hitanareo milevina anaty tany ao an-daiko ireny ka ny volafotsy no any ambany indrindra.

²²Dia nandefa iraka vitsivitsy ho any amin’ny lain’i Hakàna i Josoa. Nirohotra ho any faingana ireo, ary dia nahita ny zavatra nalevina ka ny volafotsy no tao ambany indrindra.

²³Navoakan’ireo avy tao an-day ireny ka nentiny tany amin’i Josoa sy ny Israelita rehetra, ary napetrany teo anatrehan’ny TOMPO[23].

²⁴Dia noraofin’i Josoa sy ny Israelita rehetra i Hakàna zafiafin’i Zera, noraofiny niaraka tamin’ny volafotsy sy ny akanjobeny ary ny anja-bolamena. Nalain’ireo koa ny zanakalahin’i Hakàna sy ny zanakavaviny, mbamin’ny ombiny sy ny borikiny, ondry aman’osiny, ary ny lainy mbamin’izay rehetra azy ka nentiny ho any amin’ny lohasaha Hakôra[24].

²⁵Dia hoy i Josoa tamin’i Hakàna: — Nampidi-doza anay loatra ianao! Koa hahatonga loza aminao kosa ny Tompo anio[25]! Dia novonoin’ny Israelita rehetra tamin’ny tora-bato i Hakàna. (Novonoiny toy izany koa ny ankohonany, ary indray nodorany tamin’ny afo ny fananany rehetra).

²⁶Avy eo dia nananganany antontam-bato lehibe teo ambonin’i Hakàna, ary mbola eo mandraka androany ilay antontam-bato. Izany no niantsoana io toerana io hoe lohasaha Hakôra mandraka ankehitriny. Taorian’izany vao nitony ny hatezeran’ny Tompo.