Read Dikateny Iombonana Eto Madagasikara Tito 2 Bible Online

Tito 2 - Dikateny Iombonana Eto Madagasikara bible

Tito 2

¹Fa ianao kosa, dia izay mifanaraka amin’ny fampianarana tsy misy tomika no lazao.

²Anaro ny lehilahy zokiolona mba hahalala onony amin’ny fisotro, ho maotina, hahafehy tena, tsy hisy tomika amin’ny finoana, amin’ny fitiavana, amin’ny faharetana.

³Anaro toy izany koa ny vehivavy zokiolona mba hanana fitondrantena sahaza ny olona masim-piainana, tsy ho mpanendrikendrika, tsy ho andevozin’ny divay be. Ireo vehivavy zokiolona dia tokony hanome anatra tsara

⁴ka hanoro ny vehivavy tanora ho tia vady aman-janaka,

⁵hahafehy tena, hadio toetra, hahakojakoja tokantrano, ho tsara fanahy, hanaiky ny vadiny, mba tsy hanevateva ny tenin’Andriamanitra.

⁶Anaro toy izany koa ny lehilahy tanora mba hahafehy tena.

⁷Amin’ny zavatra rehetra dia aoka ny tenanao ho ohatra amin’ny asa tsara; aoka ny fampianaranao ho madio sy maotina:

⁸teny tsy misy tomika sady tsy azo kianina ampiasaina, mba ho menatra ny mpanohitra anao, noho izy tsy hanan-kitenenan-dratsy antsika.

⁹Anaro koa ny mpanompo mba hanaiky ny tompony, ka hanao izay sitraky ny tompony amin’ny zavatra rehetra: tsy hamalivaly azy,

¹⁰tsy hangalatra ny zavany, fa haneho toetra mahatoky tokoa, mba hahazo voninahitra amin’ny zavatra rehetra ny fampianarana momba ilay Andriamanitra Mpamonjy antsika.

¹¹Fa Andriamanitra efa naneho ny fahasoavany, izay loharanom-pamonjena ho an’ny olona rehetra.

¹²Izany fahasoavana izany dia mitaiza antsika handà ny toetra tsy miraharaha an’Andriamanitra sy handà ny filàn’izao tontolo izao, fa ho velona mahafehy tena sy mandala ny rariny ary tia vavaka mandritra izao fiainana ankehitriny izao.

¹³Toy izany no tokony hiandrasantsika ny hasambarana antenaintsika sy ny andro hisehoan’ny voninahitr’i Jesoa Kristy, ilay Andriamanitra lehibe sady Mpamonjy antsika[5].

¹⁴I Jesoa Kristy dia nanolo-tena ho antsika mba hanavotra antsika ho afaka amin’ny ratsy rehetra ka hahatonga antsika ho vahoaka voadio, natao ho Azy tokoa sy hazoto hanatontosa asa tsara[6].

¹⁵Izany lazaina sy ananarana ary andresena lahatra ombàn’ny fahefana rehetra anananao. Aoka tsy hisy olona hanao tsinontsinona anao.