Read Dikateny Iombonana Eto Madagasikara Tito 3 Bible Online

Tito 3 - Dikateny Iombonana Eto Madagasikara bible

Tito 3

¹Ampahatsiarovy ny mpino mba hanaiky ny mpitondra sy ny manampahefana[7], hanoa azy ka ho vonona hanatontosa izay rehetra mety ho asa soa.

²Aoka ny mpino tsy hanevateva olona, tsy ho fiadîna, fa handefitra, haneho halemem-panahy lalandava amin’ny olona rehetra.

³Fa isika koa taloha mba adala, tsy nanaiky, naniasia; efa nandevozin’ny filàna sy fahafinaretana isan-karazany isika, lany andro tamin’ny haratsiam-panahy sy ny fialonana, sady ankahalain’olona no mankahala olona.

⁴Fa nony efa naneho ny hamoram-pony sy ny fitiavany olona ilay Andriamanitra Mpamonjy antsika,

⁵dia novonjeny isika, tsy noho ny asa marina vitantsika, fa noho ny famindrampony tamintsika. Ny namonjeny antsika dia tamin’ny alalan’ny rano fampandroana izay nanomezan’ny Fanahy Masina antsika fahateraham-baovao sy fiainam-baovao[8].

⁶Fa nandrotsahan’Andriamanitra be dia be ny Fanahy Masina isika tamin’ny alalan’i Kristy Jesoa Mpamonjy antsika,

⁷hahatonga antsika ho marina eo anatrehan’Andriamanitra noho ny fahasoavan’i Kristy sy hahatonga antsika hanana anjara amin’ny fiaina-maharitra mandrakizay efa antenaintsika.

⁸Teny azo antoka izany! Tiako hoantitranterinao ireo zavatra ireo mba himasoan’ny mpino an’Andriamanitra hiezaka manao asa tsara; izany no tsara sady mahasoa ny olona.

⁹Fa halaviro ny fanontaniana adaladala, ny tantaram-pirazanana[9], ny fifandirana sy ady momba ny lalàna jiosy; satria sady tsy mahasoa izany no zava-poana.

¹⁰Ny olona mpampisara-bazana dia anaro indray mandeha sy fanindroany[10]; ka rehefa tsy laitra anarina, dia ialao.

¹¹Fantatrao manko fa ny olona toy izany dia efa mivaona ka sady manota no manamelo-tena rahateo.

¹²Rehefa halefako atỳ aminao i Artemà na i Tisiko, dia ataovy mihitsy izay hahatongavanao atỳ amiko atỳ Nikôpôly[11]; fa ao no efa nokasaiko handaniana ny ririnina.

¹³Ampio mihitsy i Zenà mpahay lalàna sy i Apôlao[12] amin’ny dia ataony, mba tsy ho orin-javatra izy roa lahy.

¹⁴Aoka ny olontsika hiezaka hanao asa tsara koa mba ho afa-manampy rehefa misy mahatery, fandrao tsy hisy vokany ny fiainany.

¹⁵Manao veloma anao izay rehetra miaraka amiko eto. Veloma any amin’ireo mandray anay ho sakaizany ao amin’ny finoana. Homba anareo rehetra anie ny fahasoavan’Andriamanitra!