Read Dikateny Iombonana Eto Madagasikara Filemôna 1 Bible Online

Filemôna 1 - Dikateny Iombonana Eto Madagasikara bible

Filemôna 1

¹Avy amiko Paoly ity taratasy ity, dia izaho voafonja noho ny amin’i Kristy Jesoa[1]. Mamangy anao aho, ry Filemôna, ary mamangy anao i Timôty havantsika, dia ianao izay malalanay sy mpiara-miasa aminay.

²Mamangy koa an’i Apîa anabavinay sy i Arkipo[2] mpiara-miady aminay ary ny Fiangonana mivory ao an-tranonao izahay.

³Ho aminareo anie ny fahasoavana sy ny fiadanana avy amin’Andriamanitra Raintsika sy i Jesoa Kristy Tompo!

⁴Velom-pisaorana mandrakariva an’Andriamanitro aho, ry Filemôna malala, rehefa mahatsiaro anao amin’ny fivavahako

⁵satria reko ny fitiavanao ny vahoakan’Andriamanitra rehetra sy ny finoanao an’i Jesoa Tompo.

⁶Ary izao no angatahiko amin’Andriamanitra: ny fiombonanao aminay amin’ny alalan’ny finoana anie hampisy fahalalana tsara ny soa rehetra ananantsika, noho isika tafaray amin’i Kristy.

⁷Ry rahalahy, nampifaly ahy fatratra sady nampahery ahy ny fitiavanao satria efa novelombelominao ny fon’ny vahoakan’Andriamanitra.

⁸Noho izany, na dia azoko atao tsara aza, araka ny fahefana nomen’i Kristy ahy, ny handidy anao ny amin’izay tokony hataonao,

⁹dia aleoko manao fiangaviana aminao noho ny fifankatiavantsika. Eny, izaho Paoly dia efa antitra sady voafonja noho ny amin’i Kristy Jesoa ankehitriny[3];

¹⁰ka fiangaviana no ataoko aminao ho an’i Ônesimo[4], izay zanako naterako ara-panahy tato am-ponja.

¹¹Tsy nahasoa anao izy fahiny, fa ankehitriny kosa mahasoa antsika, dia izaho sy ianao.

¹²Asaiko mody atỳ aminao indray izy, ilay toy ny sombinaiko[5].

¹³Satriko ihany ny mitana azy eto amiko, izao aho voafonja noho ny amin’ny Vaovao Mahafaly izao, mba ho solonao mikarakara ahy.

¹⁴Kanefa tsy te hanao na inona na inona aho raha tsy teny ierana aminao; tsy tiako ny hanoavanao ahy tsy sazoka fa mba ho nahim-ponao tokoa.

¹⁵Angamba ny nahatafasaraka an’i Ônesimo taminao vetivety dia ny hanananao azy maharitra;

¹⁶saingy tsy toy ny mpanompo intsony no hanananao azy, fa tsara lavitra noho izany, dia toy ny rahalahy malala. Rahalahy malala tokoa izy ho ahy, mainka fa ho anao, na amin’ny maha olona azy na amin’ny maha mpanara-dia ny Tompo azy.

¹⁷Koa raha heverinao ho namanao tokoa aho, dia raiso i Ônesimo tahaka ny andraisanao ahy.

¹⁸Raha misy ratsy nataony anao na misy trosa anananao aminy, dia ahy ny andraikitra.

¹⁹Ny tanako mihitsy no anoratako ireto teny ireto: izaho Paoly no hanonitra izany! Tsy te hilaza aminao akory aho, fa ianao koa anie ka ananako trosa mihoatra noho izany, dia ny maha kristianina anao.

²⁰Eny, ry rahalahy, efa mpanara-dia ny Tompo ianao ka enga anie ho azoko aminao izay angatahiko; velombelomy ny foko noho ianao rahalahiko ao amin’i Kristy.

²¹Matoky aho fa hanaiky izay angatahiko ianao, ka izany no andefasako taratasy aminao, sady fantatro fa hanao mihoatra aza ianao.

²²Ary mba anomano efitrano koa aho; satria antenaiko fa noho ny vavaka ataonareo, dia haverin’Andriamanitra ho eo aminareo aho.

²³Manao veloma anao i Epafrà[6], izay miara-voafonja amiko noho izy tafaray amin’i Kristy Jesoa;

²⁴manao veloma anao koa i Marka, i Aristarka, i Demasy, ary i Lioka izay samy mpiara-miasa amiko[7].

²⁵Homba anareo anie ny fahasoavan’i Jesoa Kristy Tompo!