Read Dikateny Iombonana Eto Madagasikara Hebreo 1 Bible Online

Hebreo 1 - Dikateny Iombonana Eto Madagasikara bible

Hebreo 1

¹Efa imbetsaka ary tamin’ny fomba samihafa no nitenenan’Andriamanitra fahiny tamin’ny razantsika tamin’ny alalan’ireo mpaminany;

²fa amin’izao andro farany izao kosa dia tamin’ny alalan’ny Zanany no nitenenany tamintsika. Io Zanany io no naharian’Andriamanitra izao tontolo izao[1], ary notendreny koa ho mpandova ny zavatra rehetra.

³Taratra mamirapiratry ny voninahitr’Andriamanitra sady famantarana velona izay tena toetra amam-pomban’Andriamanitra Izy; ary ny teniny manan-kery no ihazonany ny zavatra rehetra. Nony avy nanadio ny olona ho afaka amin’ny fahotany Izy, dia nipetraka any amin’ny avo indrindra eo ankavanan’ilay Andriamanitra lehibe[2].

⁴Tonga ambony lavitra noho ny anjely ny Zanaka, satria nandova anarana tsara noho ny an’ireo.

⁵Fa tsy nisy na oviana na oviana anjely nilazan’Andriamanitra hoe: «Zanako Ianao, Ray niteraka Anao Aho manomboka anio!» Ary koa hoe: «Izaho ho Rainy, ary Izy ho Zanako[3]!»

⁶Rehefa nampiditra ny Zanany lahimatoa ho eto amin’izao tontolo izao Andriamanitra, dia niteny hoe: «Aoka ny anjelin’Andriamanitra rehetra hiankohoka eo anatrehany!»

⁷Sady izao no voalazan’Andriamanitra momba ny anjely: «Andriamanitra dia nanao ny anjeliny ho rivotra ary ny mpanompony ho lelafo[4].»

⁸Fa ny amin’ilay Zanaka kosa dia hoy Izy hoe: «Ny sezafiandriananao, Andriamanitra ô, dia maharitra mandrakizay mandrakizay; araka ny hitsiny no itondranao ny Fanjakànao.

⁹Tia rariny Ianao fa hàlanao kosa ny ratsy; noho izany Andriamanitra, ilay Andriamanitrao, dia nifidy sy nanokana Anao fa tsy ireo namanao, ka nampidina diloilom-pifaliana teo an-dohanao[5].»

¹⁰Ary hoy koa Andriamanitra hoe: «Ianao, Tompo ô, no nanorina ny tany tamin’ny voalohany; ary ny lanitra dia asan’ny tananao.

¹¹Ireo ho levona, fa Ianao kosa maharitra. Ny tany sy ny lanitra dia ho tonta toy ny fitafiana

¹²sy havalonao toy ny lamba, ka hovana toy ny fitafiana. Ianao kosa dia mbola Ianao ihany, ary tsy manam-pahataperana[6] ny fiainanao.»

¹³Tsy misy na oviana na oviana anjely nilazan’Andriamanitra hoe: «Mipetraha amin’ny sezafiandrianana eto ankavanako; Izaho kosa hanao ny fahavalonao ho fitoeran-tongotrao[7]!»

¹⁴Fa inona moa ny anjely? Fanahy manompo an’Andriamanitra izy rehetra, ka irahiny mba hanasoa ireo olona natao handray famonjena.