Read Dikateny Iombonana Eto Madagasikara Hebreo 5 Bible Online

Hebreo 5 - Dikateny Iombonana Eto Madagasikara bible

Hebreo 5

¹Fa ny mpisorombe rehetra dia alaina amin’ny olona, ka tendrena ho solotenan’ny olona eo amin’ny fifandraisana amin’Andriamanitra. Natao hanolotra fanatitra izy ary koa natao hanolotra sorona ho fanalana ny fahotana.

²Mahay mitondra mora ireo tsy mahalala sy maniasia izy, satria na ny tenany aza dia mba hodidinin’ny fahalemena koa.

³Noho izany fahalemen’ny tenany izany, dia tsy maintsy manolotra sorona fanalana ny fahotana izy ho an’ny tenany koa, toy ny ataony ho an’ny vahoaka[27].

⁴Ary tsy misy maka izany voninahitra maha mpisorombe izany ho an’ny tenany, afa-tsy izay voaantson’Andriamanitra tahaka an’i Aharôna.

⁵Dia toy izany koa i Kristy: tsy Izy no nanome voninahitra ny tenany ho tonga Mpisorombe, fa ilay Andriamanitra nilaza taminy hoe: «Zanako Ianao, Ray niteraka Anao Aho manomboka anio!»

⁶Izany koa dia araka ny teny hafa nataon’Andriamanitra hoe: «Ianao no Mpisorona mandrakizay, araka ny fomban’i Melkitsedeka[28]!»

⁷I Jesoa, fahavelony teto an-tany, dia nanolotra fivavahana sy fitalahoana nombàm-pitarainana mafy sy ranomaso be tamin’Andriamanitra, Izay afa-mamonjy Azy tsy hiharan’ny fahafatesana; ary dia nohenoin’Andriamanitra izy, ka afaka tamin’ny tahotra ny ho faty[29].

⁸Na dia Zanak’Andriamanitra aza Izy, dia nianatra nanoa tamin’ny fijaliana niaretany.

⁹Nony efa tonga amin’izay fanaperana Izy, dia zary loharanom-pamonjena mandrakizay ho an’izay rehetra manoa Azy,

¹⁰ary dia nambaran’Andriamanitra ho Mpisorombe araka ny fomban’i Melkitsedeka.

¹¹Manan-kolazaina betsaka izahay ny amin’izany, saingy sarotra hazavaina aminareo satria votsa fandray zavatra ianareo.

¹²Raha izay ela izay, dia tokony ho efa mpampianatra ianareo, kanefa dia mbola mila hampianarina indray ny abidim-pahalalana momba ireo tenin’Andriamanitra. Ronono no mbola ilainareo, fa tsy ventin-kanina.

¹³Fa izay rehetra mivelona amin-dronono dia zaza ihany, ka tsy mbola mahatsapa ny zavatra diso sy marina[30].

¹⁴Fa ho an’ny olon-dehibe ny ventin-kanina, dia ho an’ireo efa zatra nampiasa ny sainy hahay manavaka ny tsara sy ny ratsy.