Read Dikateny Iombonana Eto Madagasikara Hebreo 6 Bible Online

Hebreo 6 - Dikateny Iombonana Eto Madagasikara bible

Hebreo 6

¹Noho izany, aoka hilaozantsika ny abidim-pianarana momba an’i Kristy, fa aoka isika handroso amin’ny fampianarana sahaza ny olon-dehibe. Tsy hoe fanorenana indray no hataontsika: dia ny tokony hialana amin’ireo asa mitondra fahafatesana sy ny tokony hinoana an’Andriamanitra,

²ny fampianarana momba ny batisa samihafa[31] sy ny fametrahan-tanana ary momba ny fitsanganan’ny maty ho velona sy ny fitsarana mandrakizay.

³Fa ny mandroso amin’ny fampianarana sahaza ny olon-dehibe, izany no hataontsika raha avelan’Andriamanitra.

⁴Ahoana kosa ny amin’ireo niverina tamin’ny toe-dratsy? Efa nohazavain’Andriamanitra indray mandeha ireo, efa nanandrana ny fanomezana avy any an-danitra ary efa nandray anjara tamin’ny Fanahy Masina,

⁵efa nahatsapa fa tsara ny tenin’Andriamanitra ary efa nahatsapa ny asa mahagaga vokatry ny fiainana ho avy,

⁶kanefa dia niverina tamin’ny toe-dratsy. Tsy azo havaozina indray ireo mba hiala amin’ny toetra ratsiny, satria manombo ilay Zanak’Andriamanitra amin’ny hazofijaliana indray sady manolotra Azy halàm-baràka[32].

⁷Izay tany mifoka ny ranonorana milatsaka aminy matetika ka mahavokatra anana tsara ho an’ny olona iasana azy, dia mahazo fitahiana avy amin’Andriamanitra.

⁸Fa izay tany maniry tsilo sy songosongo kosa dia tsy misy antony sady efa hiharan’ny ozon’Andriamanitra; ary hodorana no hiafarany[33].

⁹Na izany aza no teninay, ry hava-malala, dia zavatra tsara kokoa sady miantoka ny famonjena anareo no antenainay, raha ny aminareo.

¹⁰Fa tsy manao ny tsy rariny Andriamanitra: tsy hohadinoiny akory ny asanareo sy ny fitiavanareo Azy nasehonareo tamin’ny nanompoanareo sady mbola anompoanareo ny kristianina havanareo.

¹¹Ary dia irînay haneho fahazotoana toy izany hatramin’ny farany ianareo tsirairay avy, mba ho tanteraka tokoa ny zavatra antenainareo.

¹²Tsy tianay ho ketraka ianareo fa mba hanahaka ireo mino sy maharitra ka manana anjara amin’ny soa nampanantenain’Andriamanitra.

¹³Ny fampanantenana nataon’Andriamanitra tamin’i Abrahama dia nombàm-pianianana. Ary satria tsy nisy lehibe noho ny tenany hianianan’Andriamanitra, dia nianiana tamin’ny tenany Izy

¹⁴ka nanao hoe: «Homba fitahiana anao tokoa Aho ary hahamaro dia hahamaro fara sy dimby anao[34].»

¹⁵Nanam-paharetana i Abrahama ka, araka izany, dia nahazo izay nampanantenain’Andriamanitra azy.

¹⁶Raha mianiana ny olona, dia manao izany amin’ny anaran’izay lehibe noho ny tenany, ka ny fianianana no ho antoka mafy fa hitsahatra hatreo ny fifandirana.

¹⁷Sitrak’Andriamanitra hiharihary tsara kokoa tamin’ireto natao handova ny soa nampanantenainy, fa tsy miova ny fikasany; ka dia notovonany fianianana ny fampanantenana nataony:

¹⁸ireo zavatra anankiroa ireo dia tsy azo ovàna sady tsy hain’Andriamanitra andaingana[35]. Noho izany, isika izay mitady fiarovana ao amin’Andriamanitra dia mahazo fampirisihana mafy hitana tsara ny fanantenana natolotra antsika.

¹⁹Toy ny vatofantsiky ny aintsika izany fanantenana izany ho antsika, fanantenana azo antoka sy mafy ary mamaky ny efitra lamban’ilay tempoly any an-danitra ka miditra hatrany anatin’ny Toeramasina Indrindra[36].

²⁰Ao i Jesoa no tafiditra nialoha antsika mba ho fanasoavana antsika, rehefa tonga Mpisorombe mandrakizay araka ny fomban’i Melkitsedeka.