Read Dikateny Iombonana Eto Madagasikara Jakoba 2 Bible Online

Jakoba 2 - Dikateny Iombonana Eto Madagasikara bible

Jakoba 2

¹Ry havako, noho ianareo mino ny Tompontsika, izany hoe i Jesoa Kristy be voninahitra, dia aoka ianareo mba tsy hijery tavan’olona[6].

²Fa misy ohatra olona miperatra volamena sady manao akanjo marevaka miditra ao am-piangonanareo, ary misy mahantra ratsy akanjo miditra ao koa.

³Dia hajahajainareo erỳ ilay olona miakanjo marevaka sady ataonareo hoe: «Etsy amin’ny toeram-boninahitra ianao mipetraka, azafady»; fa ilay mahantra kosa ataonareo hoe: «Mijorojoroa eo ianao, na eto an-tongotro mipetraka».

⁴Raha izany no izy, dia manavakavaka ianareo; ary sain-dratsy no entinareo manombantombana.

⁵Mihainoa, ry havako malala: ireo mahantra eto amin’izao tontolo izao no efa nofidin’Andriamanitra, mba hanan-karena amin’ny finoana ka handray ny Fanjakana izay nampanantenainy homena ireo tia Azy.

⁶Fa ianareo kosa, manao tsinontsinona ny mahantra! Moa tsy ny mpanankarena ve no mampahory anareo sy mitarika anareo ho eo amin’ny fitsarana?

⁷Ireo no manevateva ilay anarana soa nomen’Andriamanitra anareo[7].

⁸Tsara ny ataonareo raha tanterahinareo ilay lalàna momba ny Fanjakàn’Andriamanitra[8], araka ny Soratra Masina manao hoe: «Tiavo ny namanao tahaka ny itiavanao ny tenanao».

⁹Kanefa raha mijery tavan’olona ianareo, dia manota sady mpandika ny lalàna ka melohiny.

¹⁰Satria izay diso amin’ny lalàna anankiray monja, na dia mitandrina ny lalàna hafa rehetra aza, dia meloka amin’izy rehetra.

¹¹Eny, ilay Andriamanitra nanao hoe: «Aza maka vadin’olona», no nanao koa hoe: «Aza mamono olona[9].» Ka raha tàhiny tsy maka vadin’olona ianao, nefa mamono olona, dia mpandika ny lalàna ianao.

¹²Aoka ianareo hiteny sy hiasa toy ny olona mbola hotsarain’ny lalàna mitondra fahafahana;

¹³satria fitsarana tsy misy indrafo no hataon’Andriamanitra amin’izay tsy namindra fo; ny famindrampo kosa afa-mirehareha tsy matahotra ny fitsarana.

¹⁴Ry havako, inona moa no soa azon’ny olona milaza azy ho manam-pinoana, raha tsy miseho amin’ny asa izany? Mahavonjy azy ve izany finoana izany?

¹⁵Raha tàhiny misy havana iray finoana tsy manan-kitafy sady tsy ampy sakafo,

¹⁶dia inona moa no soa azonareo milaza aminy hoe: «Veloma finaritra, manaova mafana tsara, manaova voky tsara», raha tsy mba omenareo azy izay ilain’ny tenany?

¹⁷Toy izany kosa àry ny finoana: raha misy tsy miseho amin’ny asa, dia maty mihitsy.

¹⁸Nefa raha misy manao hoe: «Ny anao finoana, fa ny ahy asa», dia hovaliako hoe: «Asehoy ahy izay finoanao tsy ombàn’asa, fa hasehoko anao amin’ny asa kosa ny finoako.»

¹⁹Inoanao ve fa misy Andriamanitra tokana? Tsara ny ataonao. Mba mino izany koa anefa ireo demony ka mangovitra[10].

²⁰Ry adala, tianao ve ny hahafantatra fa tsy vanona[11] ny finoana tsy ombàn’asa?

²¹Ahoana moa no nahazoan’i Abrahama razantsika ny fahamarinana avy amin’Andriamanitra? Noho ny asa nataon’i Abrahama, fony izy nanolotra an’i Itsehàka zanany lahy teo ambonin’ny alitara[12].

²²Hitanao fa indray mientana ny azy ny finoana sy ny asa; ary tonga lavorary ny finoan’i Abrahama noho ny asa nombàny azy.

²³Koa tanteraka ny Soratra Masina manao hoe: ‹Nino an’Andriamanitra i Abrahama, ka nankatoavan’Andriamanitra azy ho marina izany; ary dia nantsoin’Andriamanitra hoe sakaizany izy[13]».

²⁴Hitanareo àry fa nahazo ny fahamarinana avy amin’Andriamanitra ny olona, noho ny asa fa tsy noho ny finoana fotsiny ihany.

²⁵Toy izay koa i Rahaba vehivavy janga: nahazo ny fahamarinana avy amin’Andriamanitra izy noho ny asa nataony, fony izy nampiantrano ireo iraka israelita ary nampandeha azy tamin’ny lalan-kafa[14].

²⁶Eny, maty ny vatantena raha tsy misy fofonaina, ary maty toy izany koa ny finoana raha tsy ombàn’asa.