Read Dikateny Iombonana Eto Madagasikara Jakoba 3 Bible Online

Jakoba 3 - Dikateny Iombonana Eto Madagasikara bible

Jakoba 3

¹Ry havako, aza dia maro loatra no te ho mpampianatra, satria fantatrareo fa hotsaraina mafy kokoa izahay mpampianatra.

²Eny, diso amin’ny zavatra maro isika rehetra; fa raha misy olona tsy diso mihitsy amin’ny teny, dia tanteraka izy, ka mahafehy ny tenany manontolo koa.

³Asiantsika lamboridy ny vavan-tsoavaly mba hanoavan’ny soavaly antsika; ary dia voataritsika ny tenany manontolo.

⁴Jereo koa ny sambo: na lehibe aza ireny ka entin’ny rivotra mahery, dia voatariky ny fanamory kely hankany amin’izay itiavan’ny mpanamory hitondrana azy.

⁵Dia toy izany koa ny lela: kely izy eo amin’ireo zavatra anisan’ny tena, nefa mirehaka ho mahefa zava-baventy. Saino fa pitik’afo tsy toy inona dia afa-mampirehitra alabe.

⁶Tahaka ny afo ny lela: manjary fototry ny faharatsiana tsy hita lany izy eo anivon’ireo zavatra anisan’ny tenantsika; mandoto ny tenantsika manontolo izy, ka sady mandrehitra afo eo amin’ny fizotran’ny fiainantsika no arehitry ny afo avy amin’ny lohasahan’afo.

⁷Folahin’ny olombelona daholo ny karazam-bibidia sy ny karazam-borona mbamin’ny biby mandady amin’ny tany sy ny zavamananaina any an-dranomasina, ary dia voafolany avokoa.

⁸Fa tsy misy olombelona na iray aza efa nahafolaka ny lela: zava-dratsy saro-pehezina ny lela sady feno poizina mahafaty.

⁹Izy no ankalazantsika an’ilay Tompo sady Ray, ary izy koa no anozonantsika ny olona izay noarîna araka ny endrik’Andriamanitra[15]:

¹⁰vava iray ihany no ivoahan’ny teny fankalazana sy fanozonana. Ry havako, tsy mety ny toy izany!

¹¹Misy ve vavan-doharano manao indray mamoaka rano mamy sy rano mangidy?

¹²Ny aviavy ve, ry havako, mety hamoa ôliva, na ny voaloboka hamoa aviavy? Koa ny loharano masira[16] tsy mety hanome rano mamy.

¹³Misy hendry sy manan-tsaina ve aminareo? Aoka hasehony amin’ny fitondrantena tsara fa ny halemem-panahy, vokatry ny fahendrena, no manenika ny asa ataony.

¹⁴Raha misy fialonana mangidy sy fifampiandaniana ao am-ponareo, dia aza mirehareha ianareo ary aza mandainga manohitra ny marina.

¹⁵Izany fahendrena izany dia tsy avy any ambony fa araka ny etỳ an-tany sy araka ny maha olombelona ary avy amin’ny demony;

¹⁶satria izay misy fialonana sy fifampiandaniana dia misy fikorontanana mbamin’ny asa ratsy isan-karazany.

¹⁷Fa ny fahendrena avy any ambony dia voalohany indrindra madio, ary koa tia fihavanana, mandefitra, mora ifampiraharahana, be famindrampo sady mahavokatra asa soa, tsy miangatra, tsy mihatsaravelatsihy.

¹⁸Izay mampanjaka fihavanana dia mamafy amim-pihavanana, ary dia ny rariny no vokatra azony.