Read Dikateny Iombonana Eto Madagasikara Jakoba 5 Bible Online

Jakoba 5 - Dikateny Iombonana Eto Madagasikara bible

Jakoba 5

¹Mihaino ahy izao ianareo mpanankarena! Mitomania sy mitolokoa noho ny loza midona aminareo.

²Ny harenareo efa lo ary ny fitafianareo efa lanin’ny kadradraka.

³Ny volamena sy volafotsinareo efa harafesina[21], ary ny harafesiny dia vavolombelona hiampanga anareo sady handany ny nofonareo toy ny afo. Izao efa andro farany izao no nanangonanareo harena.

⁴Tsy voaloanareo akory ny karaman’ireo mpiasa nijinja ny taninareo[22], ka mitaraina ireo; ary ny fitarainan’ireo mpijinja dia efa mby ao an-tsofin’ny Tompon’izao rehetra izao.

⁵Niampoka ny soa sady niliba ianareo fahavelonareo tetỳ an-tany, ka dia efa nanatavy tena mba hajedaka amin’ny andro voatendry.

⁶Nohelohinareo ny olo-marina sady novonoinareo, nefa tsy manohitra anareo[23].

⁷Koa mahareta tsara àry, ry havana, mandra-piavin’ny Tompo. Jereo ny mpamboly miandry amim-paharetana izay vokatra sarobidy havoakan’ny tany, ka maharitra mandra-pahazony ny oram-pararano sy ny oran-dohataona[24].

⁸Mahareta koa ianareo; aoka ho feno herimpo, fa efa mby akaiky ny fiavian’ny Tompo.

⁹Aza mifampimonomonona ianareo, ry havana, mba tsy hanamelohan’Andriamanitra anareo. Indro ny mpitsara efa mijoro eo am-baravarana.

¹⁰Ry havana, aoka ireo mpaminany izay niteny tamin’ny anaran’ny Tompo no hataonareo filamatry ny fifandeferana sy faharetana.

¹¹Indro ataontsika hoe sambatra izay manam-paharetana. Efa renareo ny faharetan’i Jôba, ary fantatrareo izay nataon’ny Tompo ho azy tamin’ny farany, satria be fiantra sy be indrafo ny Tompo[25].

¹²Ary indrindra indrindra, ry havako, aza mianiana mihitsy ianareo, na amin’ny lanitra, na amin’ny tany, na amin’ny zavatra hafa; fa aoka hanao «eny» ianareo rehefa manaiky, ary hanao «tsia» rehefa mandà, fandrao hihatra aminareo ny fanamelohan’Andriamanitra[26].

¹³Misy ory ve ianareo? Aoka izy hivavaka. Misy finaritra ve? Aoka izy ho velon-kira fiderana.

¹⁴Misy marary ve ianareo? Aoka izy hampiantso ireo loholom-piangonana hivavaka eo aminy sady hanosotra diloilo azy amin’ny anaran’ny Tompo[27]?

¹⁵Fa izany vavaka izany, rehefa atao amim-pinoana, dia hahavonjy ilay marary: hositranin’ny Tompo izy ary, raha nanota, dia havela ny helony.

¹⁶Koa mieke heloka ianareo samy ianareo, ary mifampivavaha mba hahasitrana anareo; fa mahery fiasa tokoa ny fivavaky ny olo-marina.

¹⁷Olona tahaka antsika izao ihany i Elià; fa nivavaka mafy izy mba tsy hilatsahan’ny ranonorana amin’ny tany, dia tsy nilatsaka ny ranonorana telo taona sy tapany;

¹⁸ary nivavaka indray izy, dia nandatsaka ranonorana ny lanitra, ka nahavokatra ny tany[28].

¹⁹Ry havako, raha sendra misy aminareo miala amin’ny marina, ka misy mamerina azy,

²⁰dia izao no tsarovy: izay namerin-dalana ny mpanota hiala amin’ny fahadisoany, dia namonjy ny fanahin’izany mpanota izany tsy ho faty sady mikosoka ny fahotana maro miavosa[29].