Read Dikateny Iombonana Eto Madagasikara 1 Petera 3 Bible Online

1 Petera 3 - Dikateny Iombonana Eto Madagasikara bible

1 Petera 3

¹Toy izany koa, ianareo vehivavy, maneke ny vadinareo[19]; ka raha tàhiny misy tsy mety mino ny tenin’Andriamanitra, dia mba ho voataonan’ny fitondrantenan’ny vavy izy; na tsy misy teny lazainareo aza, dia ho voataona izy

²rehefa mahita ny fitondrantenanareo madio sy feno fanajana azy.

³Aoka ny haingonareo tsy ho zavatra ivelany fotsiny, toy ny taovolo sy ny firava-bolamena ary ny didy akanjo[20];

⁴fa aoka ny haingonareo ho zavatra miafina ao am-po, dia ny haingo tsy mety simba vokatry ny halemem-panahy sy ny toetra tony: izany no tena sarobidy eo imason’Andriamanitra.

⁵Tahaka izany manko ny fihaingon’ireo vehivavy fahiny anisan’ny vahoakan’Andriamanitra: sady nanantena an’Andriamanitra izy no nanaiky ny vadiny;

⁶tahaka an’i Sarà izay nanaiky an’i Abrahama sy niantso azy hoe «tompoko[21]». Zanak’i Sarà ianareo, raha mba manao soa ka tsy matahotra izay fampitahorana na inona na inona.

⁷Toy izany koa, ianareo lehilahy, mahaiza miara-mitoetra amin’ny vadinareo izay malemy paika kokoa noho ianareo araka ny efa fantatrareo; manehoa fanajana azy[22] fa mpiombona anjara amin’ilay fiainana nomen’Andriamanitra ianareo mivady. Izany atao, mba tsy hisy zavatra hanampontsampona ny fivavahanareo.

⁸Farany, aoka hiray saina sy hiray fo ianareo rehetra: mifankatiava toy ny mpiray tampo, mahaiza mifangoraka, manetre tena.

⁹Aza mamaly ratsy ny ratsy na mamaly ompa ny ompa; aleo kosa mirary soa[23], satria ianareo efa nantsoin’Andriamanitra hanana anjara amin’ny soa nampanantenainy.

¹⁰Fa izao no tenin’ny Soratra Masina: «Izay te hankamamy fiainana sy te hahita andro soa, aoka izy hitsaha-miteny ratsy ary hitsaha-milaza fitaka;

¹¹aoka izy hiala amin’ny ratsy ka hanao soa, aoka hitady fihavanana tsy an-kiato;

¹²satria ny Tompo dia mitsinjo ny olo-marina sy mihaino ny fitarainany, fa tezitra kosa amin’ny mpanao ratsy[24].»

¹³Iza no hanisy ratsy anareo, raha mazoto amin’ny tsara ianareo?

¹⁴Raha tàhiny manao ny marina aza ianareo no ampahorîna, dia sambatra[25]. Aza matahotra izay fandrahonan’ny olona, ary aza mangorohoro amin’izany;

¹⁵fa i Kristy no hajao ho Tompo ao am-ponareo. Aoka ho vonona mandrakariva ianareo hamaly izay rehetra manontany anareo ny amin’ny fanantenana ao anatinareo,

¹⁶saingy ataovy amin-kalemem-panahy sy amim-panajana izany. Manàna fieritreretana mahitsy; ka rehefa misy zavatra anendrikendrehana anareo, dia ho menatra izay mpanaratsy ny fitondrantena tsara anentanan’i Kristy anareo.

¹⁷Eny, raha izany no sitrapon’Andriamanitra, dia aleo mitondra fahoriana amin’ny fanaovan-tsoa toy izay amin’ny fanaovan-dratsy.

¹⁸Fa i Kristy koa dia efa maty indray mandeha monja ho fanalana ny ota: ny Marina no efa maty hamonjy ny tsy marina, mba hitondra antsika ho amin’Andriamanitra. Novonoina tao amin’ny nofo i Kristy, fa novelomina araka ny Fanahy Masina[26].

¹⁹Nombàn’ny Fanahy Masina Izy ka lasa nitoriteny tamin’ireo fanahy voagadra,

²⁰dia ireo fanahin’ny olona tsy nanaiky an’Andriamanitra, fony Andriamanitra nampiseho ny fahari-pony tamin’ny andro nanamboaran’i Noà ny sambofiara. Olona vitsy ihany anefa, dia i Noà valo mianaka, no tafiditra tao anaty sambofiara ka voavonjy tamin’ny rano[27].

²¹Io rano io no tandindon’ny batisa izay amonjena anareo ankehitriny; ka tsy fanesorana lotom-batana ny batisa, fa toky omen’ny fieritreretana madio hitodika amin’Andriamanitra[28]. Ny batisa no amonjena anareo amin’ny alalan’i Jesoa Kristy tafatsangana ho velona,

²²dia Ilay efa lasa any an-danitra sy mipetraka eo ankavanan’Andriamanitra, ka eken’ny anjely sy ny fahefana ary ny hery.