Read Dikateny Iombonana Eto Madagasikara Mpitsara 11 Bible Online

Mpitsara 11 - Dikateny Iombonana Eto Madagasikara bible

Mpitsara 11

¹Tany Gilehada, dia nisy miaramila mahery fo nantsoina hoe Jiftà, zanakalahin’ny vehivavy janga sy ny lehilahy atao hoe Gilehada.

²Niteraka zanakalahy maro ny vadin’i Gilehada; ka nony efa lehibe ireny, dia nandroaka an’i Jiftà ary nilaza taminy hoe: — Tsy manan-jò amin’ny lova avy amin’ny raintsika ianao satria zanaky ny vehivavy hafa.

³Dia nandositra lavitra ny rahalahiny i Jiftà ka nonina tao amin’ny faritanin’i Tôba[80]. Ary nisy koa olom-poana nivondrona teo aminy ka nanao asan-jirika niaraka taminy.

⁴Taoriana kelin’izany, dia nanafika ny Israelita ny Hamônita.

⁵Ary rehefa vaky ny ady teo amin’ny Hamônita sy ny Israelita, dia nandeha ireo loholon’i Gilehada mba haka an’i Jiftà any amin’ny faritanin’i Tôba,

⁶ka nanao taminy hoe: — Avia ho mpitarika ny tafikay ianao, mba hahafahanay miady amin’ny Hamônita.

⁷Fa novalian’i Jiftà hoe: — Moa tsy nankahala ahy ve ianareo ka nandroaka ahy hiala tao an-tranon’ny raiko? Koa nahoana no mankatỳ amiko ianareo ankehitriny, rehefa tra-pahoriana?

⁸Hoy kosa ny loholona tamin’i Jiftà: — Mitodika aminao izahay ankehitriny mba handehananao hiaraka aminay ka hiadianao amin’ny Hamônita; dia ho filohanay sy ho filohan’ny mponina rehetra any Gilehada ianao.

⁹Dia hoy indray i Jiftà taminy: — Raha mampody ahy ianareo ankehitriny mba hiady amin’ny Hamônita, ka hatolotry ny TOMPO eo anoloako ireny, dia ho filohanareo aho.

¹⁰Dia hoy ny valin-tenin’ny loholon’i Gilehada hoe: — Ny TOMPO no ho vavolombelona amintsika fa araka izay efa nambaranao no hataonay!

¹¹Dia nandeha niaraka tamin’ireo loholon’i Gilehada i Jiftà ka noraisin’ny olona ho filoha sy ho mpitari-tafika. Ary tao Mitsepà[81], teo anatrehan’ny TOMPO, dia nohamafisin’i Jiftà ny teny rehetra efa nifanarahany tamin’ireo loholona.

¹²Nandefasan’i Jiftà iraka ny mpanjakan’ny Hamônita mba hilaza aminy hoe: — Inona no antony hiadiantsika no tonga atỳ amiko hanafika ny taniko ianao?

¹³Dia hoy ny mpanjakan’ny Hamônita tamin’ireo irak’i Jiftà: — Fony niakatra avy tany Ejipta ny Israelita, dia naka ny taniko hatreo amin’ny lohasahan’i Arnôna ka hatrany amin’ny renirano Jabôka sy hatrany Jôrdàna. Koa ankehitriny avereno amiko am-pilaminana ireo faritany ireo.

¹⁴Dia nandefa iraka fanindroany ho any amin’ny mpanjakan’ny Hamônita indray i Jiftà

¹⁵mba hilaza izao hafatra izao: — Tsy naka ny faritanin’ny Môabita na ny faritanin’ny Hamônita ny Israelita.

¹⁶Fa raha niakatra avy tany Ejipta ireo, dia namakivaky ny taniefitra hatreo amin’ny Ranomasin’ny Volotara ary nankany Kadesy.

¹⁷Tao izy no nandefa iraka nangataka tamin’ny mpanjakan’i Edôma mba hahazo hamaky ny faritaniny, saingy tsy navelany. Ary nandefa fangatahana toy izany koa tamin’ny mpanjakan’i Môaba izy nefa tsy nekeny; ka dia nipetraka tao Kadesy ny Israelita.

¹⁸Avy teo, dia nandeha namakivaky ny taniefitra izy, nanodidina ny faritanin’i Edôma sy i Môaba ary tonga tao atsinanan’i Môaba. Dia nitoby teo ampitan’ny renirano Arnôna izy fa tsy niditra tao anatin’ny faritanin’i Môaba, satria i Arnôna no sisin-taniny.

¹⁹Ary nandefa iraka ho an’i Sihôna mpanjaka amôrita izay nanjaka tao Hesbôna ny Israelita, ka nangataka taminy mba hahazo hamaky ny faritaniny hatrany amin’ny toerana izay halehany.

²⁰Tsy natoky ny Israelita i Sihôna ka tsy namela azy hamakivaky ny taniny; fa namory ny tafiny manontolo, dia nitoby tao Jahatsa ary nanafika ny Israelita.

²¹Ary natolotry ny TOMPO Andriamanitr’i Israely teo an-tanan’ny Israelita i Sihôna sy ny tafiny ka resiny. Dia nalain’ny Israelita ny faritany rehetra nonenan’ny Amôrita,

²²manomboka hatreo amin’ny lohasahan’i Arnôna ka hatrany amin’ny renirano Jabôka, ary hatreo amin’ny taniefitra atsinanana ka hatrany amin’ny ony Jôrdàna.

²³Ny TOMPO Andriamanitr’i Israely àry no efa namela anay vahoakany haka ny tanin’ny Amôrita, ka dia ianao indray ve no te hanaisotra azy aminay?

²⁴Moa tsy tananao ho fanananao ve ny faritany izay nomen’i Kemôsy andriamanitrao anao? Noho izany, dia zonay koa ny hitana ho fanananay izay tany rehetra nomen’ny TOMPO Andriamanitray anay.

²⁵Moa mihevi-tena ho tsara lavitra noho i Balàka zanakalahin’i Tsipôra sady mpanjakan’i Môaba ve ianao? Izy anefa tsy mba nila ady tamin’ny vahoaka Israely sady tsy nanafika azy.

²⁶Efa telonjato taona izao no nipetrahan’ny Israelita tao Hesbôna sy Harôhera mbamin’ireo tanàna kely manodidina azy avy ary koa tao amin’ireo tanàna rehetra eny amoron’i Arnôna; koa nahoana no tsy nalainareo io faritany io tamin’izany fotoana rehetra izany?

²⁷Raha izaho aloha dia tsy nanota taminao, fa ianao no manisy ratsy ahy amin’ny iadianao amiko. Ny TOMPO mpitsara anie hitsara ny Israelita sy ny Hamônita anio!

²⁸Kanefa tsy niraharaha ny hafatr’i Jiftà ho azy ny mpanjakan’ny Hamônita.

²⁹Ary nirotsaka tao amin’i Jiftà ny Fanahin’ny TOMPO, dia nandeha nitety ny faritanin’i Gilehada sy i Manase izy, ary tonga tao Mitsepà any Gilehada mba hiampita ho any amin’ny faritanin’ny Hamônita.

³⁰Ary nivoady tamin’ny TOMPO i Jiftà ka nanao hoe: — Raha hatolotrao tokoa eo an-tanako ny Hamônita,

³¹dia hatokako ho ANAO sady hatolotro ho sorona dorana manontolo ho Anao izay olona mivoaka voalohany ny varavaran’ny tranoko mba hitsena ahy rehefa miverina avy nandresy ny Hamônita aho.

³²Dia nihoatra ny sisin-tanin’ny Hamônita i Jiftà mba hiady aminy; ary natolotry ny TOMPO teo an-tanany ireo.

³³Nandresy azy i Jiftà, ka nahazo ny tanàna roapolo teo anelanelan’i Harôhera sy ny manodidina an’i Minita ary hatrany Abela-Keramima[82]. Faharesena goavana ny an’ny Hamônita, ka dia nilefitra teo anoloan’ny Israelita izy.

³⁴Fa nony niverina tany aminy tao Mitsepà i Jiftà, dia ny zanany vavy no nivoaka nitsena azy sady nandihy tamin’ny amponga tapaka; vavy tokany anefa io, fa tsy nanan-janaka hafa izy.

³⁵Koa raha vao nahita azy i Jiftà, dia nandriatra ny fitafiany sady niantso hoe: — Indrisy, anaka, fa nampidi-doza ahy ianao, ary ianao izao no fototry ny hakiviako! Efa nanao voady tamin’ny TOMPO manko aho, ka tsy mahazo mitsoaka ny teny nomeko.

³⁶Fa namaly azy ny zanany vavy hoe: — Dada ô, raha nanao voady tamin’ny TOMPO ianao, dia tanteraho amiko izay efa naloaky ny vavanao taminy satria IZY efa namela anao hamaly faty ny Hamônita fahavalonao.

³⁷Nefa na izany aza, dia mba omeo fe-potoana roa volana aho hankanesako eny an-tendrombohitra miaraka amin’ny namako mba hitomaniako ny tenako tsy maintsy ho faty nefa tsy mbola nanambady akory.

³⁸Dia nomen’i Jiftà lalana handeha mandritra ny roa volana izy. Koa nandeha izy sy ireo namany ka nitomany teny an-tendrombohitra noho ny tenany tsy maintsy ho faty nefa tsy mbola nanambady akory.

³⁹Nony afaka roa volana, dia niverina tany amin’ny rainy izy; ka notanterahin-drainy taminy tokoa izay voady efa nataony. Dia maty mbola virijiny razazavavy. Ary hatramin’izay dia nanjary fanao teo amin’ny Israelita izao fomba izao:

⁴⁰Isan-taona ny vehivavy israelita dia mandeha mitomany mandritra ny efatra andro ny zanakavavin’i Jiftà, ilay Gilehadita.