Read Dikateny Iombonana Eto Madagasikara Mpitsara 17 Bible Online

Mpitsara 17 - Dikateny Iombonana Eto Madagasikara bible

Mpitsara 17

¹Tao amin’ny faritra be tendrombohitra any Efraîma[98] dia nisy lehilahy natao hoe Mikà.

²Indray andro dia hoy izy tamin’ny reniny: — Tsaroanao moa fony nisy naka ny volanao sekela volafotsy 1 100, ka nanaovanao ozona izay reko tokoa ny nanononanao azy? Ao amiko io vola io, ary izaho ihany no naka azy. Dia hoy ny reniny taminy: — Hotahin’ny TOMPO anie ianao, anaka!

³Dia naverin’i Mikà tamin’ny reniny ny vola sekela 1 100; fa hoy kosa ny reniny taminy: — Efa natokako mihitsy ho an’ny TOMPO ireo vola ireo ka hankinina aminao, anaka, mba hanamboarana sampy atao sarivongana metaly narendrika. Indro àry averiko aminao izy izao.

⁴Kanjo naverin’i Mikà tamin’ny reniny indray ireo. Ary nakan-dreniny sekela roanjato izany, ka nomeny ny mpandrendrika. Dia nanamboatra sampy atao sarivongana metaly narendrika io; ary napetraka tao an-tranon’i Mikà izany.

⁵Fa ity lehilahy atao hoe Mikà ity dia nanana toeram-pivavahana iray sady efa nampamboatra koa efôda mbamin’ny terafima; ary ny zanany lahy anankiray no natokany ho mpisorona.

⁶Tamin’izany fotoana izany dia tsy mbola nisy mpanjaka tany Israely, ka samy nanao izay heveriny ho mety avy ny olona tsirairay.

⁷Nisy zatovo levita anankiray nivahiny tao Betlehema any Joda, tanàna anisan’ny fokon’i Joda.

⁸Niala tao Betlehema izy mba hivahiny any amin’izay azony hitoerana. Raha mbola nandeha izy, dia tonga tany amin’ny faritra be tendrombohitra any Efraîma ka tafapaka teo amin’ny tranon’i Mikà.

⁹Dia nanontany azy i Mikà hoe: — Avy aiza moa ianao? Ka novaliany hoe: — Levita avy any Betlehema any Joda aho, fa mandeha hivahiny any amin’izay azoko hitoerana.

¹⁰Dia hoy i Mikà taminy: — Mijanòna eto amiko fa hataoko mpisorona ato anatin’ny fianakaviako ianao. Sekela volafotsy folo isan-taona sy fitafiana ary sakafo izay ilainao no homeko anao. Dia niditra ny trano ilay levita,

¹¹ary nanaiky hitoetra tao amin’i Mikà izay nitondra azy toy ny zanany lahy.

¹²Ary natokan’i Mikà ilay levita ka tonga mpisorony ary nipetraka teo aminy.

¹³Dia hoy i Mikà anakampo hoe: «Azoko antoka izao fa hanisy soa ahy ny TOMPO, satria ity levita ity no efa tonga mpisoroko.»