Read Dikateny Iombonana Eto Madagasikara Mpitsara 20 Bible Online

Mpitsara 20 - Dikateny Iombonana Eto Madagasikara bible

Mpitsara 20

¹Dia niainga ny Israelita rehetra ary tafangona toy ny olona iray izy hatrany Dana ka hatrany Beera-Seba[113] sy hatrany amin’ny faritr’i Gilehada[114] no nivory teo anatrehan’ny TOMPO tao Mitsepà[115].

²Ny lehibe rehetra sy ny lehilahy rehetra tao amin’ny fokon’i Israely dia tonga tao amin’io fivorian’ny vahoakan’Andriamanitra io avokoa, izany hoe vatan-dehilahy andiany efajato, samy miaramila an-tongotra sy kinga famely sabatra.

³Ary ren’ny Benjaminita fa tafakatra ao Mitsepà ny Israelita hafa. Dia hoy ireo Israelita ireo hoe: — Tantarao aminay izay antony nahatonga izao heloka bevava izao.

⁴Dia namaly ilay levita, vadin-dravehivavy novonoina ho faty, ka nanao hoe: — Niditra tao Gibehà[116] tanàna benjaminita ny tenako sy ny vadikeliko mba handry tao.

⁵Dia nisy nirongatra hamely ahy ny mponina tao Gibehà ka nanodidina ny trano nitoerako nony alina. Nikasa hamono ahy izy, ary nanolana ny vadikeliko ambara-pahafaty azy.

⁶Dia nalaiko ny fatiny ary norasarasaiko; ka nandefasako toko iray avy isam-poko manerana ny tanin’i Israely, satria zavatra mahatsiravina sy fady tokoa eto Israely no nafitsok’ireo olona tao Gibehà ireo.

⁷Indreto ianareo Israelita rehetra, koa samia miteny ary maka fanapahan-kevitra.

⁸Dia nitsangana toy ny olona iray ihany ny vahoaka rehetra ka nanao hoe: — Tsy hisy olona hiverina any an-dainy na hody any an-tranony isika.

⁹Izao no zavatra hataontsika momba an’i Gibehà.

¹⁰Antsapaka no hifidianantsika ny ampahafolon’ny vatan-dehilahy isaky ny fokon’i Israely, izany hoe zato amin’ny arivo, na arivo amin’ny iray alina; ka ireo no hamatsy ny andian-tafika izay handeha hanafay an’i Gibehà tanàna benjaminita, araka ny zava-pady nafitsony teto Israely.

¹¹Dia nifanaraka ny Israelita rehetra fa hiray hina toy ny olona iray hamely an’i Gibehà.

¹²Koa nandefa iraka ho any amin’ny faritanin’i Benjamîna manontolo ny foko tsirairay avy hanao hoe: — Ahoana izao heloka mahatsiravina nitranga teto aminareo izao?

¹³Atolory anay ny olo-meloka, dia ireo faikan’olona ao Gibehà, mba hovonoinay ho faty ka hataonay tsy hisy eto amin’ny tanin’Israely intsony ny ratsy. Kinanjo ny Benjaminita tsy nety nihaino ny feon’ireo Israelita mpiray firenena aminy.

¹⁴Fa tonga avy any amin’ny tanàna samihafa izy ireo ka vory tao Gibehà mba hiady amin’ny Israelita.

¹⁵Tamin’izany andro izany dia natao fanisana ny Benjaminita avy amin’ny tanàna manodidina, ka andiany 26 ny vatan-dehilahy kinga famely sabatra, afa-tsy ireo mponin’i Gibehà izay nanao fanisa-miaramila koa.

¹⁶Io tafika benjaminita manontolo io dia nisy miaramila voafantina fitonjato lahy samy kavia avokoa ary afa-nitoraka singam-bolo tamin’ny antsamotady nefa tsy mivaona.

¹⁷Tetsy an-kilany, rehefa natao fanisana kosa ireo vatan-dehilahy tamin’ny Israelita hafa, dia nahitana vata-miaramila nisy andiany efajato samy kinga famely sabatra sady zatra ady avokoa.

¹⁸Dia nandeha tany Betela[117] aloha ny Israelita ka nanontany an’Andriamanitra hahalalana izay foko hiroso voalohany hanafika ny Benjaminita; ka ny fokon’i Joda no voatondron’ny TOMPO.

¹⁹Niainga vao maraina ny vatan-dehilahy israelita ka nitoby tao akaikin’i Gibehà.

²⁰Ary niroso hifanandrina amin’ny Benjaminita izy ka nilahatra hiady teo anoloan’i Gibehà.

²¹Nivoaka avy tao an-tanàna kosa ny Benjaminita, ka naharingana Israelita andiany 22 izay niampatrampatra tamin’izany andro izany.

²²Ary nandeha nitomany teo anatrehan’ny TOMPO mandra-paharivan’ny andro ny Israelita sady nanontany AZY na tokony mbola hiady amin’ny Benjaminita mpiray firenena aminy na tsia; ka novalian’ny TOMPO hoe: — Miakara hiady aminy. Dia nifampahery ny Israelita ary nandeha hilahatra hiady teo amin’ny toerana izay efa nilaharany tamin’ny andro voalohany ihany.

²³

²⁴Tamin’ny andro faharoa no nanatona hamely ny Benjaminita indray ny Israelita.

²⁵Kinanjo tamin’io andro faharoa io dia nivoaka avy tao Gibehà ny Benjaminita ka nandringana andiany 18 indray tamin’ny vatan-dehilahy israelita, dia lehilahy kinga famely sabatra avokoa.

²⁶Ary nandeha niakatra tany Betela ny Israelita rehetra sy ny tafiny manontolo ka nipetraka nitomany teo anatrehan’ny TOMPO; tamin’izay dia nifady hanina mandra-paharivan’ny andro izy sady nanao sorona dorana manontolo sy sorom-pihavanana teo anatrehan’ny TOMPO.

²⁷Tamin’izany andro izany moa mbola tao Betela ny Vatamasina misy ny fanekempihavanan’Andriamanitra; ary i Pinehasa, zanakalahin’i Elehazara sady zafikelin’i Aharôna, no mpitandrina azy. Dia nanontany ny TOMPO ireo Israelita na tokony mbola handeha hiady amin’ny Benjaminita mpiray firenena aminy na tsia; ka novalian’ny TOMPO hoe: — Mandehàna, fa rahampitso dia hatolotro eo an-tananareo izy.

²⁸

²⁹Dia nanafina miaramila manodidina an’i Gibehà ny Israelita.

³⁰Ary tamin’ny andro fahatelo no niakatra hamely ny Benjaminita ireo Israelita, ka nilahatra hiady teo anoloan’i Gibehà toy ny teo aloha ihany.

³¹Fa nivoaka hiady aminy kosa ny Benjaminita ka voatarika handeha lavitra ny tanàna. Ary toy ny teo aloha dia nanomboka namely ny Israelita izy ka nahafaty tokony ho telopolo lahy teny an-dalana mankany Betela sy mankany Gibehôna.

³²Tamin’izay dia nihevitra ho naharesy ny Israelita toy ny teo aloha izy; kinanjo nanapa-kevitra ny Israelita fa hanao tari-dositra mba hisarika ny Benjaminita ho any amin’ny lalana mankany an-tsaha ka hanalavitra an’i Gibehà.

³³Dia niainga avy tamin’ireo toerana rehetra nisy azy ny Israelita ka nilahatra hiady tao Bahala-Tamara; tamin’izay kosa ny miaramila israelita niafina dia nipoitra avy tao amin’ny fiereny teo andrefan’i Geba[118].

³⁴Koa nisy andiany folo ny vatan-dehilahy voafantina, avy amin’i Israely manontolo, no tonga teo anoloan’i Gibehà. Nangotraka ny ady, nefa tsy nampoizin’ny Benjaminita ny fahavoazana hihatra aminy.

³⁵Nataon’ny TOMPO resy teo anatrehan’ny Israelita ireo Benjaminita, ka nahafatesana vatan-dehilahy miisa andiany 25 miampy 100 lahy tamin’izay andro izay, dia lehilahy kinga famely sabatra avokoa.

³⁶Takatry ny Benjaminita tamin’izay fa resy tokoa izy. Nanao tari-dositra ny Israelita, satria niantehitra tamin’ireo miaramila nafeniny manodidina an’i Gibehà.

³⁷Ireo miaramila niafina ireo dia niroatra haingana nankany Gibehà ka namely ny tanàna manontolo sy nandringana ny mponina tao.

³⁸Ary ny famantarana efa nifanomezany tamin’ny Israelita sisa rehetra dia tsangan’afo lehibe midona-tsetroka avy ao an-tanàna.

³⁹Koa rehefa nihemotra an’ady ny Israelita ka nahafatesana tokony ho telopolo lahy, dia nihevitra ho naharesy azy tahaka ny teo aloha ny Benjaminita.

⁴⁰Kinanjo tamin’izay indrindra no nitambolimbolina niakatra ny setroka avy tao Gibehà. Niherika ny Benjaminita ka nahatazana ny afo manaka-danitra avy tao an-tanàna izay nirehitra tanteraka.

⁴¹Nisampotina namely ny Benjaminita tamin’izay ny Israelita. Nivarahontsana ireto Benjaminita satria hitany ny fahavoazana nihatra taminy.

⁴²Vaky nandositra teo anoloan’ny vatan-dehilahy israelita izy ary nizotra nankany an-taniefitra; saingy narahin’ny andian-tafika lehibe sy ireo vatan-dehilahy israelita nivoaka avy tao an-tanàna izy ka naringany.

⁴³Notemerin’ny Israelita ireo Benjaminita, nenjehiny tsy an-kiato ka nataony matin-kitsaka teny an-dàlana mandra-pahatonga hatrany atsinanan’i Gebà.

⁴⁴Nahafatesana vatan-dehilahy andiany 18 ny Benjaminita tamin’io andro io, dia lehilahy mahery fo avokoa.

⁴⁵Ny Benjaminita sisa dia nitodi-doha nandositra nankany an-taniefitra ho any amin’ny harambaton’i Rimôna. Ny andiany dimy tamin’ireo anefa dia maty noraofim-potsiny teny an-dalana, fa ny sisa kosa nenjehina ka ny nokendrena dia ny hahafongana azy; ary mbola nahafatesana andiany roa koa ireo.

⁴⁶Ny tontalin’ny Benjaminita maty tamin’izany andro izany dia vatan-dehilahy andiany 25, ka lehilahy kinga famely sabatra sady samy mahery fo avokoa.

⁴⁷Na izany aza, dia nisy eninjato lahy tamin’ireo nitodi-doha nandositra nankany an-taniefitra no afaka nitsoaka ihany ka tonga tao amin’ny harambaton’i Rimôna[119] ary nitoetra tao efa-bolana.

⁴⁸Dia niverina namely ireo Benjaminita hafa ny Israelita ka isan-tanàna no nandringanany tamin’ny lelan-tsabatra ny olona mbamin’ny biby fiompiny; ary ny tanàna rehetra, izay hitany tamin’izany faritany izany, dia nodorany avokoa.