Read Dikateny Iombonana Eto Madagasikara 3 Jôhany 1 Bible Online

3 Jôhany 1 - Dikateny Iombonana Eto Madagasikara bible

3 Jôhany 1

¹Avy amiko loholona ity taratasy ity. Mamangy anao aho, ry Gaio[1], hava-malala izay tiako marina tokoa.

²Mangataka amin’Andriamanitra aho, rahavako, mba hambinina amin’ny zavatra rehetra ianao ary mba ho salama tsara, tahaka izay anambinana anao ara-panahy.

³Faly tokoa aho, fony nisy havana iray finoana tonga ka nijoro ho vavolombelona nanambara tamiko fa mifikitra amin’ny hafatra marim-pototra ianao, araka ny efa iainanao an’izany.

⁴Tsy misy mahafaly ahy mihoatra noho ny andrenesako fa miaina ny hafatra marim-pototra ireo zanako.

⁵Asan’olona mahatoky, rahavako, no ataonao na inona na inona tontosainao amin’ny havana iray finoana, na dia vahiny mandalo aza izy.

⁶Ireo no nanambara teo anatrehan’ny Fiangonana[2] izany fitiavanao izany. Dia ho soa no hataonao, raha manatitra sy mamatsy azy ireo amin’ny diany ianao, araka izay fomba mendrika an’Andriamanitra;

⁷fa ho voninahitr’i Kristy no niaingan’ireo sady tsy anekeny handray na inona na inona avy amin’ny tsy kristianina.

⁸Koa isika no tokony hanohana ny olona toy ireny mba ho mpiara-miasa aminy hampiely ny hafatra marim-pototra.

⁹Efa nanoratra tamin’ny Fiangonana ihany aho; saingy i Diôtrèfa, izay te hanjakazaka olona, no tsy nankatò anay[3].

¹⁰Noho izany, rehefa tonga aho, dia hotsarovako ny asa ataony, amin’izy mibedibedy foana manaratsy anay; sady tsy afa-pon’izany, fa ny tenany tsy mety mandray ireo havana iray finoana, ary izay te handray ireo koa sakanany sy roahiny hiala amin’ny Fiangonana.

¹¹Aza maka tahaka ny ratsy, rahavako, fa ny tsara. Izay manao ny tsara no avy amin’Andriamanitra; izay manao ny ratsy kosa tsy mba nahita an’Andriamanitra.

¹²Ny amin’i Demètry dia ny olona rehetra sy ny hafatra marim-pototra iainany no vavolombelon’ny mahatsara laza azy. Izahay koa dia vavolombelon’izany, ary fantatrao fa azo antoka ny fijoroanay ho vavolombelona.

¹³Manan-javatra maro hosoratana aminao aho, nefa tsy tiako hatao amin’ny ranomainty sy ny penina izany.

¹⁴Fa manantena hahita anao faingana aho, ka dia hiresaka hifanatrika isika.

¹⁵Ho aminao anie ny fiadanana! Manao veloma anao ireo sakaiza atỳ. Veloma any amin’ireo sakaiza tsirairay avy.