Read Dikateny Iombonana Eto Madagasikara Apôkalipsỳ 22 Bible Online

Apôkalipsỳ 22 - Dikateny Iombonana Eto Madagasikara bible

Apôkalipsỳ 22

¹Dia nasehon’ny anjely tamiko ity onin-dranovelona manganohano toy ny vato kristaly, nivoaka avy teo amin’ilay sezafiandrianana ipetrahan’Andriamanitra sady ipetrahan’ny Zanakondry[143].

²Teo anelanelan’ny lalamben’ny tanàna etsy an-kilany ary ny ony etsy an-daniny, dia nisy hazo anankiray manome fiainana[144]: io hazo io dia mamoa voa in-12 isan-taona, izany hoe indray mandeha isam-bolana; ary ny raviny dia hanasitranana ny firenena.

³Ka tsy hisy zavatra hiharan’ny loza nambaran’Andriamanitra intsony[145]. Ilay sezafiandrianana, ipetrahan’Andriamanitra sady ipetrahan’ny Zanakondry, no ho ao an-tanàna; ka dia hanompo an’Andriamanitra ireo mpanompony

⁴sy hahita ny tavany ary hanana ny anaran’Andriamanitra voasoratra eo amin’ny handriny.

⁵Tsy hisy alina intsony ary tsy mba mila fahazavàn’ny jiro na fahazavàn’ny masoandro ireo mpanompon’Andriamanitra, satria hohazavain’ny Tompo Andriamanitra izy rehetra sady hanjaka mandrakizay mandrakizay[146].

⁶Dia hoy ilay anjely tamiko: — Azo antoka sy marim-pototra ireo teny ireo! Ary ny Tompo Andriamanitra, Izay manentana ireo mpaminany, no efa naniraka ny anjeliny haneho amin’ireo mpanompony izay zavatra tsy maintsy ho tonga faingana.

⁷«Indro avy faingana Aho, hoy i Jesoa. Sambatra izay mitandrina ny teny faminaniana raketin’ity boky ity!»

⁸Izaho Jôhany no nahare sady nahita ireo zavatra ireo. Ary rehefa nahare sady nahita aho, dia niankohoka teo an-tongotr’ilay anjely mba hitsaoka azy,

⁹saingy nilazany hoe: — Tandremo, aza manao izany[147]! Fa mpanompo miaraka aminao aho sady miaraka amin’ireo mpaminany namanao sy izay mitandrina ny teny raketin’ity boky ity. Andriamanitra no tsaohy!

¹⁰Dia hoy koa ny anjely tamiko: — Aza afenina ny teny faminaniana raketin’ity boky ity, satria antomotra ny fotoanandro hahatanterahan’ireo zavatra ireo.

¹¹Izay manao ny tsy rariny, aoka mbola hanao ny tsy rariny hatrany; ary izay ratsy toetra, aoka hiharatsy toetra hatrany. Izay tia rariny, aoka hanao ny rariny hatrany; ary izay masina, aoka hihamasina hatrany[148]!

¹²«Indro avy faingana Aho, hoy i Jesoa; ary miaraka amiko ny valin’asa, mba hamaliako ny olona rehetra araka izay nataony avy.

¹³Izaho no Alfa sy Ômega, ny voalohany sy ny farany, ny fiandohana sy ny fiafarana[149].

¹⁴Sambatra izay manasa ny akanjony, mba ho afa-mihinana amin’ny voan’ilay hazo manome fiainana[150] sy ho afa-miditra amin’ny vavahady mankao amin’ilay tanàna.

¹⁵Fa any ivelany kosa izay manana toe-panahy maharikoriko: dia ny mpanao ody ratsy, ny mpijangajanga, ny mpamono olona, ny mpanompo sampy ary izay rehetra tia lainga sy mpandainga.

¹⁶«Izaho Jesoa dia efa naniraka ny anjeliko hijoro vavolombelona aminareo ka hanambara izany zavatra izany eo anivon’ireo Fiangonana. Izaho no solofo sy taranak’i Davida, ary kintana fitarikandro mamirapiratra[151].»

¹⁷Ary hoy ny Fanahy Masina sy ny ampakarina hoe: «Avia!» Izay mahare, aoka hanao hoe: «Avia!» Izay mangetaheta, aoka ho avy; izay maniry ranovelona, aoka hanovo maimaimpoana amin’izany[152]!

¹⁸Izaho Jôhany dia manao fampitandremana amin’izay rehetra mandre ny teny faminaniana raketin’ity boky ity: raha misy manampy ireo, dia hampiharan’Andriamanitra ny loza voasoratra ato anatin’ity boky ity;

¹⁹ary raha misy manaisotra teny amin’ity boky faminaniana ity[153], dia hoesorin’Andriamanitra ny anjarany amin’ny hazo manome fiainana sy ny anjarany ao amin’ny tanàna masina araka izay voasoratra ato anatin’ity boky ity.

²⁰Hoy Ilay mijoro vavolombelon’ireo zavatra ireo hoe: «Eny, ho avy faingana Aho!» Amen! Avia, ry Jesoa Tompo[154]!

²¹Homba anareo rehetra anie ny fahasoavan’i Jesoa Tompo!