Read Dikateny Iombonana Eto Madagasikara Apôkalipsỳ 5 Bible Online

Apôkalipsỳ 5 - Dikateny Iombonana Eto Madagasikara bible

Apôkalipsỳ 5

¹Dia hitako nisy horonamboky teny an-tanana ankavanan’Ilay mipetraka eo ambony sezafiandrianana; ka io horonamboky io dia voasoratra anatiny sy ivohony sady voaisy tombokase fito[32].

²Ary indro nisy anjely manan-kery nanao antso avo tamin’ny feo mafy hoe: — Iza no mendrika hamaha ireo tombokase sy hanokatra ny horonamboky?

³Kanefa tsy nisy, na tany an-danitra, na tetỳ an-tany, na tany ambanin’ny tany[33], nahasokatra ny horonamboky na nahajery izay raketiny.

⁴Koa nitomany mafy aho, satria tsy hita izay mendrika hanokatra ny horonamboky sy hijery izay raketiny.

⁵Dia hoy ny anankiray tamin’ireo loholona tamiko: — Aoka izay ny ranomasonao! Indro ny liona avy amin’ny fokon’i Joda, dia ilay solofon’i Davida mpanjaka[34], fa nahazo fandresena ka afaka hamaha ireo tombokase sy hanokatra ny horonamboky.

⁶Dia hitako nisy Zanakondry nijoro teo anelanelan’ilay sezafiandrianana mbamin’ny zava-miaina efatra ankilany sy ireo loholona an-daniny. Tahaka ny efa voavono ho faty io Zanakondry io, ary nanana tandroka fito sy maso fito, dia ny Fanahy Masina ombàm-panomezana fito avy amin’Andriamanitra, Izay efa nirahina hankany amin’ny tany tontolo[35].

⁷Dia nandroso ilay Zanakondry ka nandray ny horonamboky teny an-tanana ankavanan’Ilay mipetraka eo ambony sezafiandrianana.

⁸Rehefa nandray ny horonamboky Izy, dia niankohoka teo anoloan’ny Zanakondry ny zava-miaina efatra sy ny loholona 24. Samy nanana lokanga anankiray avy ny loholona ary koa lovia volamena feno vovo-javamanitra, dia ireo lovia tandindon’ny vavaka ataon’ny vahoakan’Andriamanitra.

⁹[36]Ary nandredona hira vaovao ho an’ny Zanakondry ny loholona ka nanao hoe: «Ianao no mendrika handray ny horonamboky sy hamaha ny tombokaseny. Efa voavono ho faty Ianao, ka ny ranao nafoinao no nanavotanao olona ho an’Andriamanitra, dia olona avy tamin’ny foko amam-piteny samy hafa sy avy tamin’ny vahoaka amam-pirenena samy hafa.

¹⁰Ary nataonao fanjaka-mpisorona ireo mba hanompo an’Andriamanitsika sy hanjaka etỳ ambonin’ny tany.»

¹¹Dia nahita aho sady nandre ny anjely maro, miisa arivoarivo sy alinalina[37]. Nanodidina ilay sezafiandrianana sy ny zava-miaina ary ny loholona ireo,

¹²ka nanao tamin’ny feo mahery hoe: «Ny Zanakondry, Izay efa voavono ho faty, no mendrika handray ny fahefana sy ny harena, ny fahendrena sy ny hery, ny haja sy ny voninahitra ary ny dera.»

¹³Ary ny voaary tontolo eny ana habakabaka sy etỳ an-tany ary any ambanin’ny tany sy any an-dranomasina, izany hoe ny zavatra rehetra ao anatin’ireo, dia reko samy nanao hoe: «An’Ilay mipetraka eo ambony sezafiandrianana sy an’ny Zanakondry ny dera sy ny haja ary ny voninahitra sy ny fanjakana mandrakizay mandrakizay!»

¹⁴Dia novalian’ny zava-miaina efatra hoe: «Amen!» Ary ny loholona kosa niankohoka sy nitsaoka.