Read Dikateny Iombonana Eto Madagasikara Apôkalipsỳ 6 Bible Online

Apôkalipsỳ 6 - Dikateny Iombonana Eto Madagasikara bible

Apôkalipsỳ 6

¹Ary izao no hitako. Rehefa novahan’ny Zanakondry ny voalohany tamin’ireo tombokase fito[38], dia reko niteny mafy toy ny kotro-baratra ny anankiray tamin’ny zava-miaina efatra, nanao hoe: Avia!

²Dia indro hitako nisy soavaly fotsy, ary ilay nitaingina azy dia nanana tsipîka; nomena satroboninahitra izy, ka lasa nandeha toy ny efa naharesy sady mbola haharesy.

³Rehefa novahan’ny Zanakondry ny tombokase faharoa, dia reko ny zava-miaina faharoa nanao hoe: Avia!

⁴Dia soavaly mena kosa no nipoitra; ary ilay nitaingina azy dia nomena sabatra lehibe ary navela hanaisotra ny fihavanana hiala amin’ny tany mba hifamonoan’ny olona.

⁵Rehefa novahan’ny Zanakondry ny tombokase fahatelo, dia reko ny zava-miaina fahatelo nanao hoe: Avia! Dia nijery aho, ka indro nisy soavaly mainty[39]; ary ilay nitaingina azy dia nitana mizàna teny an-tanany.

⁶Sady reko toa nisy feo avy tao afovoan’ny zava-miaina efatra nanao hoe: «Ataovy denàry iray ny varimbazaha iray kilao ary denàry iray ny ôrza telo kilao; saingy aza mbola asondro-bidy ny menaka sy ny divay.»

⁷Rehefa novahan’ny Zanakondry ny tombokase fahefatra, dia reko ny zava-miaina fahefatra nanao hoe: Avia!

⁸Dia indro hitako nisy soavaly hatsatra; ary ilay nitaingina azy dia natao hoe Rafahafatesana izay niaraka tamin’ny Toeran’ny maty. Nomena fahefana tamin’ny ampahefatry ny tany izy ireo, hamono amin’ny sabatra sy ny mosary ary ny areti-mifindra sy ny bibidia etỳ an-tany[40].

⁹Rehefa novahan’ny Zanakondry ny tombokase fahadimy, dia hitako teo ambanin’ny alitara ny fanahin’ireo voavono ho faty satria nitory ny tenin’Andriamanitra sy nitana ny hafatra nijoroan’i Kristy ho vavolombelona.

¹⁰Ary niantso tamin’ny feo mahery izy rehetra nanao hoe: «Ry Tompo masina sy marina ô, rahoviana no hotsarainao ny mponina eny ambonin’ny tany ka hovalianao ny ranay nalatsany?»

¹¹Dia samy nomena akanjo fotsy lava izy rehetra; ary nasaina mbola niala sasatra fotoana fohy mandra-pahafeno ny isan’ireo mpanompo namany sy ireo havana iray finoana, izay efa hovonoina tahaka azy koa.

¹²Ary nijery aho rehefa novahan’ny Zanakondry ny tombokase fahenina, ka nisy horohorontany mahery vaika; tonga mainty tahaka ny akanjo volon’osy ny masoandro; tonga mena tahaka ny ra ny volana manontolo;

¹³ary ny kintan’ny habakabaka dia niraraka tamin’ny tany, tahaka ireo voa manta ahintsan’ny aviavy hozongozonin’ny rivo-mahery.

¹⁴Dia lasa tsy hita teo tahaka ny boky voahorona ny habakabaka; ary ny tendrombohitra sy ny nosy rehetra dia nafindra niala tamin’ny toerany[41].

¹⁵Ny mpanjakan’ny tany, ireo lehibe sy ireo komandin-tafika, ireo mpanankarena sy ireo lehilahy matanjaka, mbamin’ny olona rehetra na mpanompo na tsy mpanompo, dia lasa niery tany anatin’ny zohy sy tany ambanin’ny vatolampy teny an-tendrombohitra,

¹⁶ka nilaza tamin’ny tendrombohitra sy ny vatolampy hoe: «Ianjerao izahay ary afeno lavitry ny tavan’Ilay mipetraka eo ambony sezafiandrianana sy lavitry ny hatezeran’ny Zanakondry;

¹⁷fa tonga ny andro lehibe isehoan’ny hatezeran’Andriamanitra mbamin’ny an’ny Zanakondry, ka iza no mahatanty izany[42]?»