Read Dikateny Iombonana Eto Madagasikara Apôkalipsỳ 7 Bible Online

Apôkalipsỳ 7 - Dikateny Iombonana Eto Madagasikara bible

Apôkalipsỳ 7

¹Taorian’izany, dia hitako nisy anjely efatra nijoro teo amin’ny vazan-tany efatra sady nihazona ny rivotra efatra amin’ny tany[43] mba tsy hisy rivotra hitsoka na amin’ny tany, na amin’ny ranomasina, na amin’ny hazo iray akory aza.

²Ary hitako nisy anjely iray hafa koa niakatra avy any atsinanana sady nitana ny tombokasen[44]’ilay Andriamanitra velona. Dia niantso tamin’ny feo mahery an’ireo anjely efatra navela hanimba ny tany aman-dranomasina io anjely io

³nanao hoe: «Aza manimba ny tany na ny ranomasina na ny hazo ianareo, mandra-panisinay tombokase eo an-kandrin’ireo mpanompon’Andriamanitsika[45].»

⁴Ary reko ny isan’izay voaisy tombokase teo an-kandrina: ka 144 000 no voaisy tombokase, avy tamin’ny fitambaram-pokon’ireo israelita.

⁵Avy tamin’ny fokon’i Joda: 12 000 no voaisy tombokase. Avy amin’ny fokon’i Reobena: 12 000. Avy tamin’ny fokon’i Gada: 12 000.

⁶Avy tamin’ny fokon’i Asera: 12 000. Avy tamin’ny fokon’i Naftalỳ: 12 000. Avy tamin’ny fokon’i Manase: 12 000.

⁷Avy tamin’ny fokon’i Simehôna: 12 000. Avy tamin’ny fokon’i Levỳ: 12 000. Avy tamin’ny fokon’i Jisakara: 12 000.

⁸Avy tamin’ny fokon’i Zebolòna: 12 000. Avy tamin’ny fokon’i Jôsefa: 12 000. Avy tamin’ny fokon’i Benjamîna: 12 000 no voaisy tombokase.

⁹Taorian’izany, dia indreo hitako nisy olona betsaka tsy tambo isaina avy tamin’ny firenena sy ny fokom-pirenena ary ny vahoaka mbamin’ny olona samy hafa fiteny rehetra, niakanjo fotsy lava sy nitana sampan-drofia teny an-tanany. Nijoro teo anoloan’ny sezafiandrianana sy ny Zanakondry ireo,

¹⁰sady niantso tamin’ny feo mahery nanao hoe: «Ny famonjena dia an’ilay Andriamanitsika, Izay mipetraka eo ambony sezafiandrianana, ary koa an’ny Zanakondry!»

¹¹Dia nanodidina ny sezafiandrianana sy ireo loholona ary ny zava-miaina efatra ny anjely rehetra ka niankohoka teo anoloan’ny sezafiandrianana sady nitsaoka an’Andriamanitra

¹²nanao hoe: «Amen! An’Andriamanitsika ny dera sy ny voninahitra amam-pahendrena, ny saotra sy ny haja ary ny fahefana sy ny hery, mandrakizay mandrakizay! Amen.»

¹³Dia niteny tamiko ny anankiray tamin’ny loholona nanao hoe: — Iza moa ireo miakanjo fotsy lava ireo ary avy taiza no niaviany?

¹⁴Ka novaliako hoe: — Ianao, tompoko, no mahalala! Dia hoy izy tamiko: — Ireo no avy tamin’ny fahoriana lehibe[46] ka nanasa sy namotsy ny akanjony tamin’ny ra nafoin’ilay Zanakondry.

¹⁵Noho izany, dia mitoetra eo anoloan’ny sezafiandrianan’Andriamanitra izy ireo ka manompo an’Andriamanitra andro aman’alina ao an-tempoliny; ary Ilay mipetraka eo ambony sezafiandrianana dia hiara-monina aminy ka hiaro azy.

¹⁶Tsy ho noana na hangetaheta intsony ireo; ary tsy haninona azy ny masoandro na izay hafanana.

¹⁷Fa ny Zanakondry Izay mipetraka eo afovoan’ny sezafiandrianana no ho Mpiandry azy ka hitondra azy ho amin’ny loharano velona; ary hofafàn’Andriamanitra ny ranomaso rehetra amin’ny masony[47].