Read Dikateny Iombonana Eto Madagasikara Apôkalipsỳ 9 Bible Online

Apôkalipsỳ 9 - Dikateny Iombonana Eto Madagasikara bible

Apôkalipsỳ 9

¹Dia nitsoka trompetra ilay anjely fahadimy; ka hitako nisy kintana anankiray avy tany an-danitra, nilatsaka tetỳ an-tany; ary nomena io kintana io ny fanalahidin’ny vavalavaky ny hantsambe.

²Dia nosokafany ny vavalavak’ilay hantsambe, ka nisy setroka niakatra avy ao tahaka ny setroka avoakan’ny lafaoro lehibe[54]; ary nihamaizina ny masoandro sy ny habakabaka noho ny setroka navoakan’ny vavalavaka.

³Ary nisy valala navoakan’io setroka io mba hankamin’ny tany sady nomena hery toy ny an’ny maingoka etỳ an-tany[55].

⁴Dia nilazana ny valala mba tsy hamely ny ahitra amin’ny tany na ny zava-maitso na ny hazo, fa ny olona tsy manana ny tombokasen’Andriamanitra eo an-kandriny ihany[56].

⁵Kanefa tsy navela hahafaty ireo olona ireo ny valala fa ny hampanaintaina azy dimy volana ihany; ary ny fanaintainana nafitsony dia tahaka ny fanaintainana afitsoky ny maingoka rehefa manindrona olona.

⁶Amin’izany andro izany dia hitady fahafatesana ny olona, fa tsy hahita; ary haniry ho faty izy, fa handositra lavitra azy ny fahafatesana[57].

⁷Ny endrik’ireo valala ireo dia mitovy amin’ny soavaly vonon-kiady; toa satroboninahitra volamena no teny an-dohany ary tahaka ny tavan’olona ny tavany.

⁸Manana volo tahaka ny volom-behivavy izy ireo, ary ny nifiny dia tahaka ny an’ny liona.

⁹Manana fiarovantratra tahaka ny akanjo vy fiarovantratra izy ireo; ary ny fikopakopaky ny elany dia tahaka ny fikotrokotroky ny kalesy tarihin-tsoavaly maro miriotra hiady[58].

¹⁰Manana rambo sy fanindrona tahaka ny an’ny maingoka izy ireo; ary ny rambony no misy ny hery entiny hamely ny olona mandritra ny dimy volana.

¹¹Manana mpanjaka ireo valala ireo, dia ilay anjely mifehy ny hantsambe; ka ny anaran’io anjely io amin’ny teny hebreo dia «Abadôna» ary amin’ny teny grika dia «Apôliôna» (izany hoe «Mpandrava»).

¹²Lasa izay ny loza voalohany; fa aorian’izany, indreo hisosoka ny loza roa hafa.

¹³Dia nitsoka trompetra ilay anjely fahenina, ka nisy feo reko nivoaka avy tamin’ny zoro efatry ny alitara volamena izay teo anatrehan’Andriamanitra[59].

¹⁴Ary hoy ilay feo tamin’ny anjely fahenina nitana trompetra: «Vahao ny anjely efatra mifatotra eo akaikin’ny Eofrata[60], ony lehibe!»

¹⁵Dia novahana ireo anjely efatra ireo; fa voaomana ho amin’izany ora sy andro ary volana sy taona izany rahateo izy ireo, mba hahafaty ny ampahatelon’ny olombelona.

¹⁶Ary ny isan’ny miaramila an-tsoavaly dia roanjato tapitrisa, fa nahare ny isany aho.

¹⁷Ary toy izao no nahitako ny soavaly sy ny mpitaingina azy, nandritra ny fahitana: ny mpitaingina dia manana fiarovantratra mena toy ny afo sy manga toy ny vatosoa safira ary mavo toy ny solifara[61]; ny soavaly kosa dia tahaka ny lohan-diona ny lohany, ary nivoaka afo aman-tsetroka sy solifara ny vavany.

¹⁸Ireo loza telo ireo, izany hoe ny afo aman-tsetroka sy solifara izay nivoaka avy tamin’ny vavan-tsoavaly, no nahafaty ny ampahatelon’ny olombelona.

¹⁹Fa ny herin’ny soavaly dia eo amin’ny vavany sy ny rambony; satria toy ny bibilava ny rambony ka misy loha izay entiny mamely.

²⁰Kanefa ny olombelona, sisa tsy matin’ireo loza ireo, dia tsy niova toetra hiala tamin’ireo andriamanitra voatran’ny tanany, ka tsy nitsaha-nivavaka tamin’ny demony sy tamin’ny sampy volamena sy volafotsy sy halimo ary vato aman-kazo, sampy izay tsy afaka mijery na mandre na mamindra[62];

²¹ary tsy niova toetra koa izy ireo hiala amin’ny vonoana olona na ny ody ratsy na ny fijangajangana na ny halatra fanaony.