Read Dikateny Iombonana Eto Madagasikara Rota 4 Bible Online

Rota 4 - Dikateny Iombonana Eto Madagasikara bible

Rota 4

¹Dia niakatra ho eo am-bavahadin’ny tanàna toerana fandaminan-draharaha i Bôhaza, ka nipetraka teo. Ary indro nandalo ilay havana mahavotra voalazan’i Bôhaza, ka nantsoiny hoe: — Avia kely ianao, ranona, mipetraha eto. Dia nanatona izy, ary nipetraka.

²Dia naka folo lahy tamin’ny loholona tao an-tanàna i Bôhaza, ka nanao hoe: — Mipetraha eto ianareo. Ary rehefa nipetraka ireo,

³dia hoy i Bôhaza tamin’ilay havana mahavotra: — Vidio ny saha izay an’i Elimelèka izay havantsika fa amidin’i Nahômỳ izao izy tafaverina avy tany amin’ny faritr’i Môaba izao.

⁴Tapa-kevitra aho manko fa hampandre anao mba hampividy anao azy eo anatrehan’ireo olona manatrika eto sy ireo loholona. Koa raha hanavotra ianao, dia avoty; fa raha tsy hanavotra ianao, dia ambarao ahy ho fantatro, satria tsy misy afa-tsy ianao no tokony hanavotra ary izaho no manarakaraka anao. Ary hoy ny navaliny hoe: — Izaho no hanavotra!

⁵Dia hoy kosa i Bôhaza: — Amin’ny andro ividiananao ny saha eo an-tanan’i Nahômỳ, dia halainao ho vady koa i Rota vehivavy môabita mba hamelo-maso ny anaran’ny maty eo amin’ny lovany[16].

⁶Fa novalian’ilay havana mahavotra hoe: — Tsy afaka hanavotra ho an’ny tenako aho raha izany, sao manimba ny anjara lovako. Avoty ho anao izay tokony havotako fa tsy afaka hanavotra aho.

⁷Fa taloha, tany Israely, raha misy manavotra lova na mifanakalo fananana, dia esorin’ny olona ny kapany[17] ka omeny ny namany, mba hanamafy ny faharaiketan’ny raharaha. Tany Israely dia izany no antoka fa raikitra ny raharaha.

⁸Ka ilay havana mahavotra, raha niteny tamin’i Bôhaza hoe «Vidio ho anao izany», dia nanaisotra ny kapany sy nanome azy an’i Bôhaza[18].

⁹Tamin’izany dia hoy i Bôhaza tamin’ny loholona sy ny vahoaka rehetra: — Ianareo no vavolombelona manatri-maso androany fa efa novidiko teo an-tanan’i Nahômỳ izay rehetra an’i Elimelèka sy izay rehetra an’i Kiliôna sy i Mahalôna;

¹⁰miaraka amin’izany koa i Rota, vehivavy môabita, dia efa noraisiko ho vadiko mba hamelo-maso ny anaran’ny maty ao amin’ny lovany, ka tsy ho tapaka ny anaran’ny maty eo amin’ny mpiara-monina sy eo am-bavahadin’ny tanàna toerana fandaminan-draharaha.

¹¹Dia hoy ireo vahoaka rehetra izay teo am-bavahady sy loholona hoe: — Eny, vavolombelona manatri-maso izahay. Hotahin’ny TOMPO anie ity vehivavy izay hankao an-tranonao, ka ho tahaka an-dRahely sy i Lea fa izy roa vavy no niavian’ny vahoaka Israely; hataony manan-karena eo amin’ny Efratîta[19] anie ianao, ary halaza eran’i Betlehema anie ny anaranao!

¹²Enga anie ny tokantranonao ho tahaka ny an’i Peretsa[20], izay naterak’i Tamara reniny tamin’i Joda, ka ho betsaka ny taranaka izay homen’ny TOMPO anao amin’ity vehivavy tanora ity!

¹³Dia nampakarin’i Bôhaza ho vadiny i Rota. Niray tamin’i Rota izy; ary nambinin’ny TOMPO ravehivavy ka bevohòka, dia niteraka zazalahy.

¹⁴Dia hoy ireo vehivavy tao Betlehema tamin’i Nahômỳ: — Hisaorana anie ny TOMPO fa tsy navelany tsy hanan-kavana mahavotra ianao ankehitriny! Halaza eo amin’i Israely anie ny anaran’ny zafinao!

¹⁵Io zafinao io dia hampitombina ny fanahinao sy ho mpanolokolo anao amin’ny fahanteranao, satria ilay vinantovavy fatra-pitia anao sady tsara lavitra ho anao noho ny zanakalahy fito no efa niteraka azy.

¹⁶Dia nandray ny zaza i Nahômỳ ka namihina azy teo an-tratrany[21], ary lasa mpitaiza azy.

¹⁷Ny vehivavy mpiara-monina kosa no nanome ny anarany, fa hoy ireo hoe: «Zazalahy no naterak’i Rota ho an’i Nahômỳ!»; koa ny anarany dia nantsoin’ireo hoe Hôbeda: Izy no rain’i Jisay izay rain’i Davida.

¹⁸Izao no taranak’i Peretsa: i Peretsa no ray niteraka an’i Hetsirôna,

¹⁹i Hetsirôna, ray niteraka an’i Rama; i Rama, ray niteraka an’i Haminadaba;

²⁰i Haminadaba, ray niteraka an’i Nahasôna; Nahasôna, ray niteraka an’i Salmôna;

²¹i Salmôna, ray niteraka an’i Bôhaza; i Bôhaza, ray niteraka an’i Hôbeda;

²²i Hôbeda, ray niteraka an’i Jisay; ary i Jisay no ray niteraka an’i Davida.