Read Dikateny Iombonana Eto Madagasikara 1 Samoela 1 Bible Online

1 Samoela 1 - Dikateny Iombonana Eto Madagasikara bible

1 Samoela 1

¹Tao Ramà, tany amin’ny faritra be tendrombohitra any Efraîma, dia nisy lehilahy anankiray anisan’ny taranak’i Tsofo[1]. Io lehilahy io dia natao hoe Elkanà, zanak’i Jerohama, zafikelin’i Elihò, zafiafin’i Tôhò ary zafindohalik’i Tsofo.

²Nanam-bady roa izy, dia i Hanà sy i Peninà. I Peninà dia nanan-janaka, fa i Hanà kosa tsy mba niteraka.

³Isan-taona i Elkanà dia nandao an’i Ramà tanànany mba hivavaka sy hanao sorona amin’ny TOMPOn’izao rehetra izao tany Silao[2]; mpisoron’ny TOMPO tao koa i Hôfnỳ sy i Pinehasa zanakalahin’i Helỳ.

⁴Fanaon’i Elkanà rehefa manao sorona ny manome anjara ho an’i Peninà sy ny zanany rehetra;

⁵fa i Hanà kosa dia notolorany anjara manokana, satria tiany aoka izany izy na dia nataon’ny TOMPO momba aza.

⁶Nitady hatrany izay hanorisorenana an’i Hanà anefa ny rafivaviny, ka nandrabiraby azy noho io nanaovan’ny TOMPO azy momba io.

⁷Ary isan-taona dia izany foana no zava-mitranga rehefa mba tonga ao an-tranon’ny TOMPO i Hanà; nanao izay hampalahelo azy foana i Peninà, ka nitomany sy tsy nety nihinan-kanina izy.

⁸Dia hoy i Elkanà vadiny taminy: «Hanà ô, nahoana ange ianao no mitomany sy tsy mety mihinan-kanina? Nahoana koa ianao no malahelo toa izao, moa tsy mihoatra noho ny zanaka folo ve ny tenako aminao?»

⁹Indray andro, tao Silao, rehefa tapi-nisakafo ny olona, dia nitsangana i Hanà fa i Helỳ mpisorona kosa nipetraka teo an-tokonam-baravaran’ny TOMPO.

¹⁰Nalahelo mafy i Hanà, ka sady nigogogogo nitomany no nanao tamin’ny Tompo izao vavaka

¹¹sy voady izao: «Ry TOMPOn’izao rehetra izao ô, mba jereo tokoa ny alaheloko ka tsarovy fa aza hadinoina; raha mba omenao zanakalahy anankiray aho, dia hatolotro ho ANAO kosa izy amin’ny androny rehetra; ka tsy hokasihin-kareza ny lohany[3].»

¹²Raha mbola naharitra nivavaka teo anatrehan’ny TOMPO i Hanà, dia nodinihin’i Helỳ ny vavany;

¹³nivavaka am-po izy, ka ny molony ihany no hita mihetsiketsika, fa tsy re akory izay feony. I Helỳ kosa efa nihevitra azy ho mamo,

¹⁴ka nanao taminy hoe: — Mbola haharitra ve ny fahamamoanao? Ndeha ampisindao aloha izany!

¹⁵Dia novalian’i Hanà hoe: — Tsia, tompoko, tsy mamo aho. Malahelo fotsiny aho fa tsy nisotro divay na zava-pisotro mahamamo hafa akory. Mamboraka ny ato am-poko eto anatrehan’ny TOMPO aho.

¹⁶Aza heverinao ho toy ny vehivavy ratsy fanahy aho; fa raha nivavaka ela aho, dia satria efa tsy tantiko intsony ny alahelom-poko sy ny fahoriam-panahiko.

¹⁷Dia hoy i Helỳ hoe: — Mandehana amim-piadanana, ary homen’ilay Andriamanitr’i Israely anao anie izay nangatahinao taminy!

¹⁸Ary niteny indray i Hanà hoe: — Ho tsara fo amiko hatrany anie ianao! Dia lasa i Hanà ary nihinan-kanina, ka mirana endrika tsy toy ny teo aloha.

¹⁹Ny ampitso vao maraina, rehefa avy nivavaka tamin’ny TOMPO i Elkanà sy ny fianakaviany, dia nody tany Ramà. Ary i Elkanà niray tamin’i Hanà vadiny, ary nohenoin’ny TOMPO ny vavaka nataon-dravehivavy.

²⁰Dia bevohòka i Hanà, ka tera-dahy, sady loa-bava hoe: — Ny anarany dia hataoko hoe Samoela, satria nangatahiko tamin’ny TOMPO izy[4].

²¹Dia niakatra nankany Silao indray i Elkanà sy ny fianakaviany mba hanao ny sorona fanao isan-taona amin’ny TOMPO ary hanefa ny voadiny.

²²Tsy niaraka tamin’ny vadiny i Hanà tamin’ity indray maka ity; fa hoy izy taminy: «Aoka aloha hisara-nono ny zaza, vao hoentiko hiseho eo anatrehan’ny TOMPO, ary dia hitoetra eo mandrakizay izy.»

²³Ary namaly azy i Elkanà hoe: «Tsara izany, ataovy izay fantatrao fa mety; mijanòna ihany àry atỳ mandra-pisara-nono ny zaza. Hotanterahin’ny TOMPO anie ny fampanantenainy!» Dia nijanona tao Ramà nampinono ny zanany i Hanà mandra-pisara-nono azy.

²⁴Ary rehefa nisara-nono ny zaza, dia nentiny nankany an-tranon’ny TOMPO tao Silao, na dia mbola vao mena vava aza. Ireto no nentin’izy mivady niaraka tamin’ny zaza: vantotr’ombilahy telo taona sy lafarinina iray gony ary divay eran’ny siny hoditra.

²⁵Novonoiny natao sorona ilay vantotr’omby, ary nentiny tany amin’i Helỳ ny zaza.

²⁶Dia hoy i Hanà tamin’i Helỳ: — Azafady tompoko, tsaroanao ve ilay vehivavy nitsangana teto indray andro tsy lavitra anao akory, ary nivavaka tamin’ny TOMPO? Raha marina fa velona koa ny ainao, dia izaho izy.

²⁷Ny hananako ity zaza ity no nivavahako; ary dia nomen’ny TOMPO ahy izay nangatahiko taminy.

²⁸Koa anjarako kosa ny manolotra azy ho an’ny TOMPO; eny, mandritra ny androny rehetra, dia ho an’ny TOMPO izy. Dia nivavaka tamin’ny TOMPO izy mianakavy.