Read Dikateny Iombonana Eto Madagasikara 1 Samoela 18 Bible Online

1 Samoela 18 - Dikateny Iombonana Eto Madagasikara bible

1 Samoela 18

¹Rehefa vita ny resak’i Saoly sy i Davida, dia voasinton’i Davida ny fon’i Jônatàna, fa tiany tahaka ny itiavany ny tenany i Davida.

²Tamin’io andro io dia notazonin’i Saoly tao aminy i Davida fa tsy navelany nody tany amin-drainy.

³Fa i Jônatàna kosa tia fatratra an’i Davida, ka nanao dinam-pisakaizana taminy.

⁴Nalain’i Jônatàna ny akanjobe teny aminy, dia nomeny an’i Davida; natolony azy koa ny akanjo fentiny miady mbamin’ny sabany sy ny tsipîkany ary ny fehikibony.

⁵Fa isaky ny misy fanafihana ampanaovin’i Saoly azy, dia fahombiazana hatrany no azon’i Davida, koa dia izy no nataon’i Saoly ho kômandin’ny miaramila mpanafika; ary nahafaly tokoa ny tafika manontolo sy ny manamboninahitry ny mpanjaka izany.

⁶Tamin’ny fiverenan-dry Davida avy nahafaty an’ilay Filistinina, dia nivoaka hitsena an’i Saoly mpanjaka ny vehivavy avy tamin’ny tanàna israelita rehetra; nihira sy nandihy tamin’ny feon’ampongatapaka sy ny zava-maneno hafa izy ireo, ary velona hobim-pifaliana.

⁷Dia nibitaka ireo vehivavy sady nifamaly niredona hoe: «I Saoly nahafaty an’arivoarivo. fa i Davida kosa nahafaty an’alinalina[92].»

⁸Nahatezitra mafy an’i Saoly izany tononkira izany, ka hoy izy anakampo hoe: «An’alinalina lahy no nomeny an’i Davida, fa an’arivoarivo fotsiny kosa no nomeny ahy! Angamba homeny azy koa ny fanjakana atsy ho atsy!»

⁹Nanomboka tamin’io andro io, dia ratsy fijery an’i Davida izy.

¹⁰Ny ampitso, dia nisy fanahy ratsy nalefan’Andriamanitra nilatsaka tamin’i Saoly, ka nampirediredy azy eran’ny trano. Toy ny fanaony dia nitendren’i Davida feon-kira tamin’ny harpa i Saoly izay efa nitana lefona.

¹¹Natorak’i Saoly ny lefona sady hoy izy hoe: «Hasiako hifantsika amin’ny rindrina i Davida.» Nefa indroa tsy nahavoa izay satria nahay niala hatrany i Davida.

¹²Natahotra an’i Davida i Saoly, satria fantany fa nomba azy ny TOMPO, saingy ny tenany kosa efa nialany.

¹³Izany no antony nampihatahany an’i Davida tsy ho eo aminy, ka nanaovany azy ho filohan’ny andian-tafika iray. Izy no nitarika ny miaramila niantafika,

¹⁴ary fahombiazana hatrany no azon’i Davida tamin’izay rehetra nataony, satria nomba azy ny TOMPO.

¹⁵Nitombo hatrany kosa ny tahotr’i Saoly, rehefa hitany ireo fahombiazana azon’i Davida.

¹⁶Eo an-danin’izany anefa, ny Israelita sy ny Jodeanina dia samy tia an’i Davida avokoa, satria izy no nitarika azy isaka izay niantafika.

¹⁷Hoy i Saoly anakampo hoe: «Aoka aho tsy haninona an’i Davida, fa avelao ny Filistinina no hamono azy!» Izany no nitenenany tamin’i Davida hoe: — Indro i Meràba zanako vavimatoa homeko ho vadinao, raha toa ka manompo ahy amin-kerim-po ianao, ary koa mazoto amin’ireo adin’ny TOMPO.

¹⁸Ka hoy ny navalin’i Davida an’i Saoly: — Ry mpanjaka, iza moa aho ary zinona ny fiainako sy ny fianakaviamben’ny raiko, no ho tonga vinantonao aho?

¹⁹Nefa tamin’ny fotoana izay tokony hanomezan’i Saoly an’i Meràba ho vadin’i Davida, no nanomezana azy indray ho vadin’i Hadriela avy any Mehôlà[93].

²⁰Fa i Mikàla zanakavavin’i Saoly iray kosa, raiki-pitia tamin’i Davida. Koa rehefa nambara tamin’i Saoly izany zavatra izany, dia nahafaly azy;

²¹hoy izy manko anakampo: «Homeko ho vadiny i Mikàla hahazoako mamandrika azy, ary dia hamono hahafaty azy ny Filistinina.» (Fanindroany izao no nilazan’i Saoly tamin’i Davida ny hahavinantony azy)

²²Ary i Saoly nibaiko ireo minisitra tao aminy mba hiresaka mangina amin’i Davida hoe: «Mankasitraka tsara anao ny mpanjaka ary tia anao koa izahay minisitra. Koa ekeo re ankehitriny ny ho tonga vinanton’ny mpanjaka.»

²³Dia naverin’ireo minisitr’i Saoly tamin’i Davida izany teny izany. Fa hoy i Davida tamin’izy ireo: — Heverinareo fa zavatra kely moa izany ho vinanton’ny mpanjaka izany? Izaho anefa dia olo-mahantra tsy misy dikany.

²⁴Notantarain’ireo minisitr’i Saoly taminy izay teny navalin’i Davida azy ireo.

²⁵Ka hoy i Saoly hoe: — Izao indray àry no holazainareo aminy: «Ny mpanjaka dia tsy mila vodiondry aminao afa-tsy tsitsy zato avy amin’ny Filistinina[94], mba hamaliana faty ny fahavalon’ny mpanjaka.» Izany no noheverin’i Saoly fa hianjeran’i Davida eo an-tanan’ny Filistinina.

²⁶Dia nentin’ireo minisitra tany amin’i Davida izany teny izany, ka nankasitrahiny ihany ny ho vinanton’ny mpanjaka. Raha tsy mbola dila akory ny fetra nomen’ny mpanjaka,

²⁷dia efa lasa nanafika i Davida sy ny olony ka nahafaty Filistinina roanjato lahy. Nentin’i Davida ny tsitsin’izy ireo ka nasehony tsirairay an’i Saoly, mba hahatonga azy ho vinanton’ny mpanjaka. Dia neken’i Saoly ho vadin’i Mikàla zanany vavy i Davida.

²⁸Nazava tamin’i Saoly izao fa nomba an’i Davida ny TOMPO ary koa tia azy i Mikàla zanany vavy.

²⁹Koa nihamafy hatrany ny tahotr’i Saoly an’i Davida, hany ka loza ny fankahalany azy.

³⁰Tamin’izany fotoana izany dia nandeha nanafika ny Israelita ireo andriana filohan’ny Filistinina. Ary isaky ny misy fanafihana, dia mahery hatrany noho ireo miaramila manamboninahitr’i Saoly i Davida, hany ka tonga nanan-daza tokoa izy.