Read Dikateny Iombonana Eto Madagasikara 1 Samoela 22 Bible Online

1 Samoela 22 - Dikateny Iombonana Eto Madagasikara bible

1 Samoela 22

¹Niala avy teo i Davida, dia nandositra niery tao an-johin’i Hadolama[113]. Raha nahafantatra izany ny rahalahiny sy ny fianakavian-drainy rehetra, dia nirohotra nankany aminy avokoa.

²Nitangorona teo aminy ny olona tokony ho efajato lahy, dia ireo olona sahirana sy ireo bokan-trosa ary ireo tsy faly; izy no tonga filohany.

³Avy teo Hadolama i Davida, dia nankany Mitsepà[114] any Môaba, ka hoy izy tamin’ny mpanjakan’i Môaba: — Avelao re, tompoko, ny ray aman-dreniko mba ho avy hipetraka eto aminao mandra-pahafantarako izay tian’Andriamanitra hatao amiko.

⁴Dia nentin’i Davida teo anatrehan’ny mpanjakan’i Môaba izy ireo ka nipetraka tao aminy nandritra ny fotoana rehetra nialokalofan’i Davida tao amin’ny fiereny.

⁵Indray andro dia hoy i Gada mpaminany tamin’i Davida: — Aza mijanona ao amin’ny fierenao fa mandehana miverina any amin’ny tanin’i Joda. Dia lasa i Davida ka nankany amin’ny alan’i Hereta[115].

⁶Fantatr’i Saoly fa nisy nahita i Davida sy ireo niaraka taminy. Tany Gibehà[116] i Saoly tamin’izay nipetraka teo ambanin’ny hazo tamariska tambony havoana, sady nitana lefona. Nijoro teo anilany ny mpanompony rehetra; ka hoy i Saoly tamin’izy ireo:

⁷— Henoy tsara, ry taranak’i Benjamîna! Moa ny zanakalahin’i Jisay[117] ve hanome anareo rehetra saha sy tanim-boaloboka, ary hanendry anareo rehetra ho mpifehy ny antokon-tafiny? Tsia!

⁸Koa nahoana no mioko hikomy amiko ianareo rehetra? Ka tsy mba nisy nilaza tamiko fa ny zanako dia nanao dinam-pisakaizana tamin’ny zanakalahin’i Jisay. Tsy mba nisy taminareo nanahy kely akory ny amiko, raha nitaona ny mpanompoko hamela-pandrika ahy ny zanako, dia tahaka izay mitranga anio izao.

⁹Dia hoy i Dôega, ilay Edômita izay nijoro teo akaikin’ireo mpanompon’i Saoly, hoe: — Izaho nahita ny zanakalahin’i Jisay tonga tany Nôba tao amin’i Ahimelèka zanakalahin’i Ahitoba[118].

¹⁰Ary i Ahimelèka nanontany ny TOMPO ho azy, sady namatsy azy no nanome azy ilay sabatr’i Gôliata Filistinina[119].

¹¹Koa nampiantsoan’ny mpanjaka i Ahimelèka mpisorona sady zanakalahin’i Ahitoba, mbamin’ny mpisorona rehetra tao amin’ny fianakaviany izay nipetraka tao Nôba; ary tonga niseho teo anatrehan’ny mpanjaka avokoa izy rehetra.

¹²Dia hoy i Saoly tamin’i Ahimelèka: — Henoy àry, ry zanakalahin’i Ahitoba. Ka novaliany hoe: — Inty aho, tompoko.

¹³Dia hoy i Saoly taminy: — Nahoana no nioko hanohitra ahy ianao sy ny zanakalahin’i Jisay. Nomenao mofo sy sabatra izy; ary nanontany ny Tompo ho azy koa ianao, mba hijoroany hanohitra sy hamandrika ahy tahaka izao anio izao.

¹⁴Hoy kosa no navalin’i Ahimelèka azy: — Iza amin’ny mpanomponao rehetra ireo no mba mahatoky indrindra tahaka an’i Davida vinanton’ny mpanjaka, mpiambina ny tenanao ary nohajaina fatratra tao an-dapa?

¹⁵Ary moa sambany androany no nanontaniako ho azy tamin’Andriamanitra? Koa sanatriaviko ny hikomy aminao, ry mpanjaka! Aza ahiahînao aho mpanomponao na ny fianakaviako fa tsy mahalala na inona na inona momba izany rehetra izany aho.

¹⁶Fa hoy ny mpanjaka hoe: — Ry Ahimelèka, tsy maintsy matiko ianao sy ny fianakavian-drainao manontolo.

¹⁷Avy eo dia hoy ny mpanjaka tamin’ny miaramila mpanotrona azy teo akaikiny: — Ndeha vonoy ho faty ny mpisoron’ny TOMPO, fa niray tsikombakomba tamin’i Davida izy ireo, satria nahafantatra ny fandosiran’i Davida izy, kanefa tsy nampandre ahy. Fa ny mpanompon’ny mpanjaka kosa tsy sahy nikasi-tanàna ny mpisoron’ny TOMPO.

¹⁸Koa hoy ny mpanjaka tamin’i Dôega: — Mandehana vonoy ho faty ireo mpisorona ireo. Dia lasa tokoa i Dôega ilay Edômita ka izy mihitsy no namono nahafaty ny mpisorona. Lehilahy 85 mpisalotra ny akanjo masina no matiny androtrio ihany.

¹⁹Ary i Nôba tanànan’ny mpisorona koa nasiany tamin’ny lelan-tsabatra, ka ringana avokoa na ny lehilahy na ny vehivavy, na ny ankizy na ny zaza minono, na ny omby na ny boriky na ny ondry.

²⁰Izany Abiatara zanakalahin’i Ahimelèka sy zafikelin’i Ahitoba izany ihany no hany afa-nandositra, ka namonjy nankany amin’i Davida.

²¹Nambaran’i Abiatara an’i Davida ny nandringanan’i Saoly ireo mpisoron’ny TOMPO.

²²Ka hoy i Davida tamin’i Abiatara: — Tamin’iny andro iny, dia hitako tsara fa tao Nôba koa i Dôega ilay Edômita, ka fantatro fa hitantara ny zava-drehetra tamin’i Saoly izy. Koa ny tenako no tompon’andraikitra tamin’ny fahafatesan’ny fianakavian-drainao manontolo.

²³Mitoera eto amiko ary aza matahotra; fa izay mitady ny ainao dia mitady ny aiko koa. Ho tsara antoka ianao eto.