Read Dikateny Iombonana Eto Madagasikara 1 Samoela 23 Bible Online

1 Samoela 23 - Dikateny Iombonana Eto Madagasikara bible

1 Samoela 23

¹Indray andro dia nisy nampandre an’i Davida fa notafihin’ny Filistinina ny tanànan’i Kehilà[120] ka norobainy izay teo am-pamoloana sy tany an-tsompitra.

²Ary i Davida nanontany tamin’ny TOMPO hoe: — Handeha hiady amin’ireo Filistinina ireo ve aho? Ka hoy ny navalin’ny TOMPO azy; — Mandehana miady aminy ka vonjeo Kehilà.

³Dia hoy ny olon’i Davida taminy: — Indreto atỳ Joda aza isika matahotra, koa mainka rehefa mankany Kehilà hiady amin’ny tafika filistinina?

⁴Ary i Davida nanontany indray ny Tompo, ka novaliany hoe: — Mandehana mankany Kehilà, fa hatolotro ho eo an-tananao ny Filistinina.

⁵Lasa nankany Kehilà i Davida sy ny olony ary notafihiny ny Filistinina. Nentiny an-kery ny biby fiompiny, ka faharesena tsy nisy toy izany no nahazo azy ireo. Izany no nanafahan’i Davida ny mponin’i Kehilà.

⁶Raha nialokaloka eo amin’i Davida tany Kehilà i Abiatara zanakalahin’i Ahimelèka, dia nitondra ny efôda niaraka taminy.

⁷Vao fantatr’i Saoly fa tafiditra tao Kehilà i Davida, dia hoy izy hoe: — Efa natolotr’Andriamanitra eto an-tanako izy, fa namandri-tena niditra an-tanàna mihidy vavahady.

⁸Nohetsehin’i Saoly ny tafika manontolo hidina any Kehilà mba hanao fahirano an’i Davida sy ny olony.

⁹Fantatr’i Davida fa nisaina hanao ratsy azy i Saoly; koa nasainy nentin’i Abiatara mpisorona ny efôda hanontaniana ny Tompo.

¹⁰Dia hoy i Davida taminy: — Ry TOMPO Andriamanitr’i Israely ô, ren’ny mpanomponao fa miomana hankatỳ Kehilà i Saoly handrava ny tanàna noho ny amiko.

¹¹Moa hanolotra ahy eo an-tanany ve ny manampahefana eto Kehilà? Ary ho avy amiko araka ny reko tokoa ve i Saoly? Mba valio re, ry TOMPO Andriamanitr’i Israely ô! Ka hoy ny navalin’ny TOMPO azy: — Eny, ho avy tokoa izy.

¹²Dia nanontany indray i Davida hoe: — Hanolotra ahy sy ny oloko eo an-tanan’i Saoly ve ireo manampahefana eto Kehilà? Ary novalian’ny TOMPO hoe: — Eny, hanolotra anareo izy.

¹³Dia niainga nandao an’i Kehilà i Davida sy ny olony miisa ho eninjato lahy, ary nandeha tamin’ny lalana anjoanjo. Rehefa ren’i Saoly fa nandositra niala tao Kehilà i Davida, dia najanony ny dia.

¹⁴Nijanona tany an-taniefitra tao amin’ny toerana be harambato i Davida, ary nonina tany amin’ny havoan’ny taniefitr’i Zifa[121]. Nitady azy isan’andro i Saoly, kanefa tsy navelan’Andriamanitra hatolotra eo an-tanany i Davida.

¹⁵Hitan’i Davida fa niainga hiantafika mba hifofo ny ainy i Saoly, ka dia nijanona tao Hôresa[122] tany an-taniefitr’i Zifa izy.

¹⁶Ary i Jônatàna zanakalahin’i Saoly nankany amin’i Davida any Hôresa ka nankahery azy tamin’ny anaran’Andriamanitra.

¹⁷Hoy izy tamin’i Davida: — Aza matahotra fa tsy hahazo anao akory ny tanan’i Saoly raiko. Ianao no ho mpanjakan’i Israely fa izaho kosa ho lefitrao; ary na i Saoly raiko aza dia mahalala tsara izany!

¹⁸Ary nanao dinam-pisakaizana[123] teo anatrehan’ny TOMPO izy roa lahy. Dia nijanona tany Hôresa ihany i Davida fa i Jônatàna kosa niverina nody.

¹⁹Nankany amin’i Saoly tany Gibehà ny mponin’i Zifa ka nanao taminy hoe: — Moa tsy fantatrao fa i Davida anie ka miafina any aminay ao amin’ny toerana be harambato any Hôresa, any amin’ny havoanan’i Hakilà[124] eo atsimon’ny faritra be lobolobo?

²⁰Koa raha te hanampoka azy ianao, ry mpanjaka, dia midina any, fa anjaranay ny manolotra azy eo an-tananao.

²¹Dia hoy i Saoly hoe: — Hitahy anareo anie ny TOMPO noho izao fiahianareo ahy izao!

²²Koa mandehana indray ianareo, dia alaivo antoka sy fantaro tsara izay toerana marina misy azy sy izay nahita azy tany, fa tena fetsy lahy hono izy izany.

²³Ataovy fantatra avokoa izay toerana rehetra mety iafenany, dia miverena atỳ amiko rehefa tena azonareo antoka, fa hiaraka aminareo aho. Raha mbola eto amin’ny faritany koa iny, dia hosavako avokoa ny isam-pianakaviamben’i Joda mba hahitako azy.

²⁴Dia lasa nankany Zifa nialoha an’i Saoly izy ireo, fa i Davida sy ny olony kosa dia tao amin’ny taniefitr’i Mahôna[125], amin’ny lemaka eo atsimon’ny faritra be lobolobo.

²⁵Niainga i Saoly sy ny miaramilany hitady an’i Davida. Raha nandre izany i Davida, dia nitsontsorika nidina ny harambato ka nijanona tao amin’ny taniefitr’i Mahôna. Rehefa fantatr’i Saoly izany dia nanenjika an’i Davida hatrany koa izy.

²⁶Tamin’ny lafiny ilan’ny tendrombohitra no nandehanan’i Saoly, fa i Davida sy ny olony kosa nandroso tamin’ny lafiny iray hafa. Nohafainganin’i Davida ny diany mba tsy hahazoan’i Saoly azy, satria ny mpanjaka sy ny olony efa manodidina vonon-kisambotra an’i Davida sy ny namany.

²⁷Fa nisy iraka iray tonga nilaza tamin’i Saoly hoe: — Faingàna ianao fa manafika ny tanin’i Israely ny Filistinina.

²⁸Dia natsahatr’i Saoly ny fanenjehana an’i Davida, fa lasa izy niady tamin’ny Filistinina. Izany no niantsoana io toerana io hoe: «Vatolampin’ny Fisarahana».