Read Dikateny Iombonana Eto Madagasikara 1 Samoela 29 Bible Online

1 Samoela 29 - Dikateny Iombonana Eto Madagasikara bible

1 Samoela 29

¹Namory ny miaramilany rehetra tao Afeka ny Filistinina, raha nitoby akaikin’ny loharano iray tao Jizrehèla[147] kosa ny Israelita.

²Nilahatra teo alohan’ny andian-tafiny ireo filohan’ny Filistinina; fa i Davida sy ireo olony kosa dia tatỳ aoriana no nilahatra niaraka tamin’i Akisy.

³Dia hoy ireo filohan’ny Filistinina: — Inona no ataon’ireo Hebreo ireo eto? Ka hoy i Akisy namaly ireo filohan’ny Filistinina: — I Davida mpanompon’i Saoly mpanjakan’i Israely io, saingy efa niaraka tamiko aman-taonany izy izao. Ary tsy mbola hitako izay tsininy hatramin’izay nialany tany ka nifindrany tatỳ izay.

⁴Tezitra tamin’i Akisy ireo filohan’ny Filistinina ka nanao taminy hoe: — Roahy any io lehilahy io hiverina any amin’ny tanàna izay efa nomenao hitoerany. Aza avela hidina hiara-kiady amintsika izy, fandrao dia isika indray no hifoterany rehefa miady. Fa inona moa no hahazoany sitraka amin’i Saoly tompony, raha tsy ny fanolorany azy ny lohan’ireo olontsika?

⁵Moa tsy io Davida io ve ilay nihirana sy nandihizana hoe: «I Saoly nahafaty an’arivoarivo, fa i Davida kosa nahafaty an’alinalina[148].»

⁶Dia niantso an’i Davida i Akisy ary nanao taminy hoe: — Velona ny TOMPO ka milaza marina aho fa olona mahatoky ianao; tiako ny hiarahanao amiko amin’izao ady izao, satria tsy mbola hitako izay tsininao hatramin’izay nahatongavanao teto amiko izay. Kanefa tsy mahazoazo anao ireo filohan’ny Filistinina ireo.

⁷Koa mandehana miverina mody am-piadanana mba tsy hanaovanao izay tsy mahafaly ireo filohan’ny Filistinina.

⁸Hoy kosa i Davida tamin’i Akisy: — Fa inona no nataoko, ry mpanjaka tompoko, ary inona no tsiny hitanao tamiko mpanomponao hatramin’izay nipetrahako tatỳ aminao ka mandraka androany izay, no tsy mahazo mandeha miady amin’ny fahavalonao aho?

⁹Dia hoy i Akisy namaly an’i Davida: — Tsy misy. Fa mahafinaritra ahy tahaka ny anjelin’Andriamanitra ianao. Saingy ireo filohan’ny Filistinina no nanao hoe: «Aoka izy tsy hiaraka hiady amintsika!»

¹⁰Koa mifohaza maraina be ianao sy ireo mpanompo izay niara-dia taminao; samia mifoha maraina ianareo, ary mandehana rehefa mazava ny andro.

¹¹Dia nifoha maraina be i Davida sy ny olony ny ampitso mba hiverina any amin’ny tanin’ny Filistinina. Ary ny Filistinina kosa niakatra any Jizrehèla.