Read Dikateny Iombonana Eto Madagasikara 1 Samoela 3 Bible Online

1 Samoela 3 - Dikateny Iombonana Eto Madagasikara bible

1 Samoela 3

¹Fa i Samoela kely kosa nanompo ny TOMPO teo ambany fitantanan’i Helỳ. Tamin’izany fotoana izany, dia efa nahalana ny fitenenan’ny TOMPO mivantana tamin’olona ary efa vitsy koa ny fahitana avy aminy.

²Indray alina dia natory teo amin’ny toerana nahazatra azy i Helỳ izay efa akaiky ho jamba.

³I Samoela koa mba natory tao an-tranon’ny TOMPO, tao amin’izay nisy ny Vatamasina. Nony hadiva haraina ny andro, raha mbola nirehitra ny jiro tao amin’ny Toeramasin’ny TOMPO[8],

⁴dia niantso an’i Samoela ny TOMPO, ary izy namaly hoe: «Inty aho, tompoko»;

⁵avy teo dia nihazakazaka nankany amin’i Helỳ i Samoela ka nanao taminy hoe: — Niantso ahy ianao, koa intỳ aho! Fa hoy i Helỳ hoe: — Tsy niantso anao aho, fa ’ndeha miverina matory. Dia lasa niverina natory i Samoela.

⁶Niantso azy fanindroany ny TOMPO hoe: «Ry Samoela!» Dia nitsangana i Samoela ka nankany amin’i Helỳ ary niteny taminy hoe: — Niantso ahy ianao, koa intỳ aho! — Tsy niantso anao aho, anaka, fa miverena matory.

⁷Ary i Samoela tsy mbola nahalala ny TOMPO, satria tsy mbola nitenenany mivantana.

⁸Niantso fanintelony an’i Samoela ny TOMPO, koa dia nitsangana indray izy nankany amin’i Helỳ ka nanao taminy hoe: — Niantso ahy ianao, koa intỳ aho! Izay vao fantatr’i Helỳ fa ny TOMPO no niantso ny zaza.

⁹Ary hoy izy taminy: — ’Ndeha miverina matory; fa raha toa mbola misy miantso anao, dia valio hoe: «Mitenena, TOMPO ô, fa mihaino ny mpanomponao!» Dia lasa natory teo amin’ny fatoriany indray i Samoela.

¹⁰Ary avy ny TOMPO, dia nitsangana teo, ka niantso toy ny fanaony hoe: «Ry Samoela, ry Samoela!» Dia hoy izy namaly: — Mitenena fa mihaino ny mpanomponao.

¹¹Ary hoy ny TOMPO tamin’i Samoela: — Indro hanao zavatra amin’i Israely Aho, dia zavatra hampangirintsina ny sofin’izay rehetra mandre azy.

¹²Hampihariko amin’i Helỳ sy ny taranany amin’izany andro izany ny loza rehetra, efa nambarako hamelezana azy; eny, hampihariko hatramin’ny voalohany ka hatramin’ny farany izany.

¹³Efa nampitandrina azy Aho manko fa hohelohiko mandrakizay ny fianakaviany noho ny fahotan-janany izay fantany tsara nefa tsy mba nosakanany.

¹⁴Koa izany no nianianako tamin’ny fianakavian’i Helỳ fa tsy misy sorona na fanatitra hahafa-pahotana azy.

¹⁵Dia nandry mandra-maraina i Samoela; ary novohany avy eo ireo varavaran’ny tranon’ny TOMPO, nefa dia natahotra ny hilaza amin’i Helỳ ny fahitàny i Samoela;

¹⁶kanjo niantso azy i Helỳ ary nanao taminy hoe: — Samoela zanako ô! Dia hoy i Samoela namaly: — Ahoana izay, tompoko? Ary i Helỳ nanontany hoe:

¹⁷— Ahoana, hoy ny TOMPO taminao? Aza misy afeninao ahy. Fa raha misy afeninao ahy na dia teny iray fotsiny amin’izay nambarany taminao aza ianao, dia hosazîn’Andriamanitra mafy tokoa anie ianao!

¹⁸Dia notaterin’i Samoela tamin’i Helỳ avokoa tsy nisy nafenina azy ny zava-drehetra. Ka hoy i Helỳ hoe: — Izy no TOMPO, hataony anie izay heveriny fa tsara!

¹⁹Ary nihalehibe i Samoela sady nomba azy ny TOMPO; ka tsy nisy tsy tanteraka izay teny rehetra nasainy nambaran’i Samoela.

²⁰Izany no nahafantaran’i Israely manontolo, manomboka any Dana ka mipaka any Beera-Seba[9], fa mpaminanin’ny TOMPO i Samoela.

²¹Dia mbola niseho hatrany ny TOMPO tao Silao; satria tao no fisehoan’ny TOMPO mivantana tamin’i Samoela mba hampahafantatra azy ny teniny.